Smiley face
Smiley face
Smiley face

ژنانی کارکەر داوا لە هاوڕەگەزەکانیان دەکەن بچنە مەیدانەکانی کارەوە

2017-05-15 14:47:25



ڕۆژنیوز – ژیان محەمەد

 

ئەو ژنانەی، کە لە بازاڕی کاردان و بە ڕەنجە شانی خۆیان بژێوی ژیانیان پەیدا دەکەن، داوا لە ژنانی دیکە دەکەن، کە کە لە چوارچێوەی ماڵەوەدا نەمێننەوە و دەست بە کارکردن بکەن.

 

لە هەرێمی کوردستان لەم ساڵانەی دواییدا ژنان بە شێوەیەکی بەرچاو هاتنە بازاڕی کارکردنەوە و بێ  گوێگرتن بۆ توانجەکانی کۆمەڵگا، دەستیان بە کارکردن کرد.

 

مەنیجە شەریف، ژنێکی تەمەن ٦٥ ساڵ-ی شاری سلێمانییە و سەرەڕای زۆریی تەمەنەکەی لە کارگەیەک خەریکی دروستکردنی نانی تیریی-یە.

 

مەنیجە، دەمە و بەیان کاتژمێر ٥:٠٠ لەماڵ دەردەچێت و بەرەو کارگەکە بەڕێدەکەوێت، سەرەتا دەست بە بێژاندنەوەی ئاردەکە دەکات، دواتریش هەویرەکە ئامەدە دەکات و دەست بە دروستکردنی نانەکان دەکات.


سەبارەت بە حەقدەستی کارەکەیان، مەنیجە بە ڕۆژنیوزی وت: بەگوێرەی بە هێڵەک-ی ئارد پارەمان بۆ حساب دەکرێت، واتە هەتا ئاردی زیاتر بکەین بە نان، ئەوا پارەی زیاترمان دەست دەکەوێت.

 

مەنیجە شەریف

 

تەمەنی مەنیجە شەریف لەسەروو تەمەنی کارکردنەوەیە، ئەمە سەرنجی ڕاکێشاین و پرسیاری هۆکاری کارکردنمان لێکرد لەو تەمەنەدا، ناوبراو، وتی:"بەهۆی قەیرانی داراییەوە، بەدوای کاردا گەڕام تاوەکو ئەم کارەم دۆزییەوە، ئێستا لە کارەکەمدا زۆر مورتاحم، داواکاریم لە ژنان ئەوەیە کە لە چوارچێوەی ماڵەوەدا دانەنیشن و بۆخۆیان بێنە دەرەوە و کاربکەن".

 

 ڕووپاک ڕەسوڵ، تەمەن ٣٨ ساڵ کە لە یەکێک لە کارگەکانی دروستکردنی کاری هەویریدا کاردەکات، سەبارەت بە کارەکەی بە ڕۆژنیوزی وت: من ڕۆژانە کاتژمێر ١١:٠٠ی پاش نیوەڕۆ دێمە شوێنی کارکردنەکەم و دەست دەکەم بە دروستکردنی ناوەشکێنە، کە کڕیاری تایبەت بە ناوەشکێنەکەمم هەیە، ڕۆژانە نزیکەی ٦٠ ناوەشکێنە دروست دەکەم.

 

 ڕووپاک ڕەسوڵ

 

ڕووپاک، وتیشی: زۆر حەزم لە کارەکەمە و داوا لە ژنان دەکەم ئەو توانایەی، کە هەیانە دەریبخەن و بێنە مەیدانی کارکردنەوە.

 

ڕێزان محەمەد-یش دایکی شەش منداڵە و بۆ بژێوی ژیانی خۆی و خێزانەکەی ماوەی ساڵێکە کاری ناوساجی دروستکردن دەکات لە کارگەیەکی کاری هەویردا و بە ڕۆژنیوزی وت: من ناوساجی دروست دەکەم، کڕیاریشم هەیە لە هەموو پارێزگاکانی تری هەرێم، تەنانەت لێرەشەوە دەیبەنەوە ئەڵمانیا.

 

ڕێزان محەمەد

 

ڕێزان، هیوای خواست، کە ژنان لەهەموو کایەکانی ژیاندا بەشدارییان هەبێت و شەرم لە کارکردن نەکەن، بەپێویستیشی زانی کە ژنان پش بە خۆیان ببەستن.

 

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin