Smiley face
Smiley face
Smiley face

بەرپرسێکی گۆڕان: پارتی پێیوایە پەرلەمان مارکێتە بە دڵی خۆی بیکاتەوە و دایبخات

2017-08-06 08:28:54



ڕۆژنیوز - ڕێزان محەمەد

 

ڕێکخەری ژووری توێژینەوەی سیاسی بزووتنەوەی گۆڕان ڕایدەگەیەنێت، بەبڕوای ئێمە ڕیفراندۆم پرسێکی حزبی نایاساییە و بەکاردەهێنرێت بۆ مەبەستێکی سیاسی، دەشڵێت: پارتی وادەزانێت پەرلەمان مەکتەب و مارکێتە کەی بییەوێت بیکاتەوەو کەی بیەوێت دای بخات.
 

محەمەد عەلی، ڕێکخەری ژووری توێژینەوەی سیاسی بزووتنەوەی گۆڕان کە لە هەمان کاتدا ئەندامی جڤاتی نیشتیمانی بزوتنەوەی گۆڕانە، لە چاوپێکەوتنێکی ڕۆژنیوز باس لە پەیوەندییەکانیان لە گەڵ یەکێتی و گۆڕان دەکات و هەروەها تیشک دەخاتەسەر هەوڵدانەکان بۆ کاراکردنەوەی پەرلەمان، ئەر ڕەخنانەی لەسەر هەڵبژاردنەکانی خانەی ڕاپەڕاندن ڕووبەڕوویان بووەتەوە پرسێکیتری ئەم چاوپێکەوتنەیە.

 

دەقی چاوپێکەوتنەکە:

 

ئێستا ئاستی په‌یوه‌ندییه‌کانتان له‌گه‌ڵ پارتی دیموکراتی کوردستان چۆنه‌؟

 

"کێشەی ئێمە لەگەڵ پارتی لەسەر پرسە چارەنووسسازەکانە"

 

محەمەد عەلی: هیچ کێشەیەکی شەخسی و حزبیمان لەگەڵ پارتی دیموکراتی کوردستان-عێراقدا نییە، ئەوەی کە هەمانە لەسەر پرسە چارەنووسسازەکانە، لەسەر سەروەری یاسا پەیوەندییەکانمان تێکچووە لەگەڵ پارتیدا، کە ئێمە لەکاتی خۆیدا لە پەرلەماندا کارمان کردووە کە یاسا سەروەر بێت، هەروەها کارمان کردووە بۆ ئەوەی کە حکومەتێکی ئەکتیڤ و چالاک هەبێت، لەسەر ئەو پرسانە لەگەڵ پارتی ناکۆکین، وە ئەم ئاڵۆزییەی هەیە دەگەڕێتەوە بۆ پەیوەندی پارتی لەگەڵ سەروەری یاسا، پەیوەندی پارتییە لەگەڵ یەکگرتنەوەی هێزی پێشمەرگە و شەفاف بوونی ئابووری و وە پەیوەندی پارتیە لەگەڵ ئەوەی تا چەندێک گەندەڵی دەکات، ئێمە لەگەڵ حزبەکانی دیکەدا هەڵسوکەوت دەکەین، کە ئایا تا چەندێک لەگەڵ ئەم مەبدەئانەدان یان نا.

 

" بارزانی پرسە شەخسی و حزبییەکانی خۆی کردووە بە پرسی خەڵکی کوردستان"

 

وتیشی: لە ئێستادا بۆیە پەیوەندیەکانمان لەگەڵ پارتیدا بەو شێوەیەیە، لەبەر ئەوەی کە ئەو پەرلەمانی داخستووەو ئینقیلابی کردووە بەسەر پەرلەماندا، ئابووری کوردستانی ڕۆژبەڕۆژ بەرەو داڕوخان دەبات، پرسە شەخسی و حزبییەکانی خۆی کردووە بە پرسی خەڵکی کوردستان وەک ڕیفراندۆم، هەر بۆیە هەتاوەکو پارتی پێداچوونەوە نەکات بەو پرسانەدا و باوەڕی بە سەروەری یاسا و دامەزراوەکان نەبێت، ئەوا پەیوەندییەکان بەو شێوازە دەبێت کە هەیە.

 

ڕێکه‌وتنه‌ سیاسییه‌که‌ی یه‌کێتی و گۆڕان بۆ خاڵەکانی جێبه‌جێ نەکراوە تا ئێستا؟

 

"یەکێتی هۆکارە بۆ جێبەجێ نەکردنی ڕێکەوتننامە سیاسییەکە"

 

محەمەد عەلی: پێموایە کە هۆکار زۆرە، بەڵام سەرەکیترینیان لای یەکێتی نیشتیمانی کوردستانە، کە خۆشیان نایشارنەوە و خەتای ئەوانە و بەشێکی بیانووەکانیان ئەوەیە کە کێشەی ناوخۆییان هەیە و چەندین بیانووی دیکەی جیا جیا، وەکو بزوتنەوەی گۆڕان هیچ ڕێگرییەک نیە، هەر بۆیە ئێمە وەکو بزوتنەوەی گۆڕان بە هیچ شێوازێک داوایی هەڵوەشانەوەی ئەو ڕێکەوتننامەیە ناکەین، لەبەرئەوەی کە هەموو خاڵەکانی ناو ڕێکەوتتنامەکە لە بەرژەوەندی خەڵکی کوردستاندایە و هیچ بەرژەوەندی حزبی و شەخسی تێدا نییە، بۆیە ئێمە دەستمان بەو ڕێکەوتنامەیەوە گرتووە، بەڵام سیاسەتی خۆشمان لەسەر ئەو ڕێکەوتنە پەکنەخستووە.

 

له‌ دوای کۆچی کاک نه‌وشیروان یه‌کێتی به‌ فه‌رمی داوای یه‌کگرتنه‌وه‌ی له‌ گۆڕان کرد، ئه‌و بابه‌ته‌ چی به‌سه‌رهات؟

 

"پرسی یەکگرتنەوە لەناو بزووتنەوەی گۆڕاندا هیچ بابەت نییە"

 

محەمەد عەلی: پێویستە ئەو پرسیارە لە یەکێتی بکرێت، کە بۆچی ئەم داواکارییەیان کردووە، لەبەر ئەوەی بە هیچ شێوازێک ڕێکەوتتنامەکە باسی یەکگرتنەوە ناکات، ئێمە دوو حزبی جیاوازین، پرسی یەکگرتنەوە لەناو بزووتنەوەی گۆڕاندا هیچ بابەت نیە.

 

سه‌باره‌ت به‌ ڕیفراندۆم، هه‌ڵوێستی بزوتنه‌وه‌ی گۆڕان چیه‌، ئایا هه‌مان هه‌ڵوێستی پێشووی هه‌یه‌؟

 

"ڕیفراندۆم پرسێکی حزبی نایاساییە و بەکاردەهێنرێت بۆ مەبەستێکی سیاسی"

 

محەمەد عەلی: دەبێت دوو شت هەیە جیای بکەینەوە، ڕیفراندۆم بە شێوازێکی گشتی و ڕیفراندۆمی ٢٥ی ئەیلول بەتایبەتی، ڕیفراندۆم بە شێوازە گشتیەکەی لە دەستوور و پەیامی بزوتنەوەی گۆڕاندا ڕوونە، بەڵام ئەو ڕیفراندۆمەی لە ٢٥ی ئەیلول دەکرێت، بەلای ئێمە پرسێکی حزبی نایاساییە و بەکاردەهێنرێت بۆ مەبەستێکی سیاسی، چۆن حزبێک دەیەوێت کێشەکانی لەبیر خەڵکی کوردستان بەرێتەوە، لەوانە کێشەی نایاسایی بوونی پۆستی سەرۆکی هەرێمی کوردستانە، وە پەرلەمانێکی پەکخراو و ناچالاکمان هەیە و گەندەڵی هەیە، بۆیە ڕیفراندۆم هیچ بابەتێکی نەتەوەیی نیە، تێبینی تەکنیکی و جەوهەریمان هەیە لەسەر ڕیفراندۆمی مانگی نۆ.

 

بۆچونتان له‌سه‌ر هه‌ڵوێستی یه‌کیتی و بارزانی چییه‌ له‌ کاراکردنه‌وه‌ی په‌رله‌مان، که‌ یه‌کێتی بڕیاریداوه‌ تاکو ده‌ی ئه‌م مانگه‌ په‌رله‌مان کارابکرێته‌وه‌ و بارزانیش له‌ دووه‌مین کۆبونه‌وه‌ی ئه‌نجومه‌نی باڵای ڕیفراندۆم بڕیاری داوه‌ له‌ دوو هه‌فته‌دا په‌رله‌مان کارابکرێته‌وه‌؟

 

" گرەنتی چیە کە جارێکی دیکە پەرلەمان داناخرێت؟"

 

محەمەد عەلی: ئەو حزبانە بۆیان نییە پەرلەمان دابخەن و بیکەنەوە، وە ئەسڵەن پارتی پێیوایە کە پەرلەمان مەکتەب و مارکێتە بە ئارەزووی خۆی بیکاتەوە و دایبخات، بۆیە ئێمە ناچینە ژێر بڕیاری مەکتەبێکی سیاسی و  ئینقلابێکی پارتیەوە کە کاتی خۆشی نەچوینەتە ژێر باریەوە، دوو ساڵە پەرلەمان پەکیخراوە، دەبێت پێمان بوترێت کە بۆچی داخراوەو گرەنتی چیە کە جارێکی دیکە داناخرێت، گومانمان لە کاراکردنەوەی پەرلەمان هەیە، پێمان وایە جۆرێکە لە سیناریۆ، وە ئەم دوو سێ مانگە دەبێت پێمان بوترێت کە پارتی و سەرۆکەکەی خۆیان خستووەتە شوێنی تەشریعی و دەسەڵاتی جێبەجێکاری و دەسەڵاتی دادوەری و بە ئارەزووی خۆیان کۆبوونەوە دەکەن و بڕیاردەدەن بۆ هەڵبژاردن و بۆ ڕیفراندۆم، ئێ کەوایە پەرلەمانیان بۆ چییە! ئەو ئیشانەی کە کردوویانە بۆخۆیان بچن تەواوی بکەن و تەواو.

 

ئەگەر پەرلەمان کارا کرایەوە لەسەر سەرۆکایەتی هەرێم بریار دەدات یان ریفراندۆم ؟

 

" ئەگەر پەرلەمان کارابێتەوە ئەو کارانە دەکات کە خۆی باوەڕی پێیەتی"

 

محەمەد عەلی: نازانین پەرلەمان کارادەبێتەوە یاخود نا، وە ئەگەریش کارابێتەوە پەرلەمان ئەو کارانە دەکات کە خۆی باوەڕی پێیەتی نەک ئەو کارانەی کە لە مەکتەبی سیاسی حزبێکەوەو لە دەسەڵاتی تەنفیزیەوە بۆی بچێت بڵێت ئەوە بکە و ئەمە مەکە، پەرلەمان خۆی بەرزترین دەسەڵاتە لە کوردستاندا و خۆی بڕیار دەدات چی کارێک بکات، وەک چاودێری حکومەت و ڕیفراندۆم و گۆڕینی یاسایی سەرۆکایەتی هەرێمە، بۆیە پێویستە ئەو حزبانە وازبهێنن لە دانانی بەرنامە و ئەجێندا بۆ پەرلەمانی کوردستان.

 

په‌یوه‌ندییه‌کانتان له‌گه‌ڵ حزبه‌ ئیسلامییه‌کان به‌تایه‌بت کۆمه‌ڵی ئیسلامی له‌ چ ئاستێکدایه‌؟

 

"لەگەڵ کۆمەڵ نزیکی زیاترمان هەیە"

 

محەمەد عەلی: پەیوەندییەکانمان لەگەڵ لایەنە ئیسلامیەکاندا زۆر باشە، بە پێی ئەو ئەجێندا و پرەنسیپانەی کە هەمانە و مەسافەی دووری و نزیکیمان لە حزبەکانەوەیە هیچ بەرژەوەندییەکی حزبی و شەخسیمان نییە، تا لەسەر ئەو بنەما پەیوەندییەکانمان دابڕێژین، وە لەگەڵ حزبەکانی دیکە نەیاری سیاسین نەک دوژمنی سیاسی، ئێستا لەگەڵ کۆمەڵدا نزیکیەکی زیاترمان هەیە.

 

وه‌ک ده‌زانین له‌ 25ی مانگی ڕابردوو بزوتنه‌وه‌ی گۆڕان خانه‌ی ڕاپه‌ڕاندنی هه‌ڵبژارد، به‌ڵام ئه‌وه‌ی جێگه‌ی سه‌رنج بوو، له‌نێو کاندیده‌کاندا گه‌نجه‌کان کشانه‌وه‌ هۆکاری چیبوو؟

 

"یەکەم ئەزموون بوو، بێگومان ڕەخنەش هەر دەبێت"

 

محەمەد عەلی: یەکەم ئەزموون بوو بۆ خانەی ڕاپەڕاندن و ڕێکخەری گشتی، توانیشمان ئەو قۆناغە بە باشی ببڕین، بێگومان ڕەخنە و سەرنج هەیە کە هەمووی بە هەند وەرگیراوە، ئەکرێت لە ئەزموونەکانی دیکەدا ئەو هەڵانە دووبارە نەبنەوە، بۆ کشانەوەی کاندیدە گەنجەکان نازانم هۆکار چیبوو کە دەکرێت لە خۆیان بپرسرێت.

 

پێگه‌ی ژنان له‌ناو بزوتنه‌وه‌ى گۆڕان چۆنه‌، بەتایبەت لە ناوەندەکانی بڕیاردا؟

 

"ڕێگری یاسایی و دەستوریی نیە لەبەردەم ژندا بۆ هاتنە پێشەوە"

 

محەمەد عەلی: لەناو بزوتنەوەی گۆڕاندا دەرفەتێکی باش هەیە بۆ ئەوەی کە ژن بێتە پێشەوە، ئەکرێت کەموکوڕی هەبێت، بەڵام گرنگ ئەوەیە کە هیچ ڕێگرییەکی فەرمی و دەستور و یاسایی نییە کە پێشێلی مافەکانی ژنان بکات، بەڵام دەکرێت لە مامەڵەدا سەرکەوتوو نەبووبین، بۆیە هەوڵ دەدەین کە ئەو کەموکورتیانە نەهێڵین.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin