Smiley face
Smiley face
Smiley face

هاوسەرۆکی پەیەدە: گەلی ئێمە زۆربەی زەحمەتییەکانی تێپەڕاند

2017-08-10 08:39:43



ڕۆژنیوز – سۆران حسێن

 

هاوسەرۆکی گشتی پەیەدە ڕایدەگەیەنێت: ئامانجی گەورەی ئێمە دروستکردنی سوریایەکی دیموکراتە لەگەڵ پێکهاتە جیاوازەکاندا، ئەم شۆڕشە بە پێشەنگایەتی ژنان و گەنجانی کورد پێشکەوت، دەشڵێت، دەتوانین بڵێین سەرکەوتنی ڕۆژئاوا سەرکەتنی باکووری سوریایەو زەحمەتییەکانی گەل بەرەو کۆتایی دەچێت.

 

ئاسیا عەبدوڵا،هاوسەرۆکی گشتی پارتی یەکێتی دیموکراتی-پەیەدە، لە چاوپێکەوتنێکی تایبەتی ڕۆژنیوزدا، باس لە هۆکاری هێرشەکانی تورکیا بۆ کانتۆنی عەفرین دەکات، هەروەها تیشک دەخاتە سەر پەیوەندییەکانیان لە گەڵ هاوپەیمانان و پشڕەوییەکانی شەڕڤانان و پرۆژەکانیان بۆ دوای لەناچوونی داعش، لەگەڵ ڕەخنەکردنی داخستنی سنورەکاندا، بۆ ئەم قۆناغەش دەڵێت، داوا دەکەین کەنەکە بۆ یەکێتی نەتەوەیی درێژە بە دیدارەکانی بدات، هەروەها وەڵامی چەندین پرسیاری دیکە دەداتەوە.

 

دەقی چاوپێکەوتنەکە:

 

تورکیا بەردەوام کانتۆنی عەفرین تۆپباران دەکات، ئەمە بۆ؟

 

ئاسیا عەبدوڵا:"وەکوو ڕۆژئاوای کوردستان و باکوری سوریا وە بۆ تەبایی گشتی سوریا، ئێستا عەفرین وەکوو بابەتێکی گرنگ لە ڕۆژەڤدایە، کە لەلایەن دەوڵەتی تورکەوە، هێرش و هەڕەشە دروستبوە بۆ سەر ئەو هەرێمە، هەر لە سەرەتاوا هەتا ئێستا تورک بەشداربووە لە هێرش و دەستدرێژی بۆ سەر ڕۆژئاوا، لە دریژەی ئەو موداخەلەکردنەدا، ئێستا عەفرینی کردوە بە ئامانج".

 

لەسەر ئەو هێرشانە لەگەڵ کۆمەڵگای نێودەوڵەتیدا قسەتان نەکردووە؟

 

"پێویستە هاپەیمانان هەڵوێستیان ڕوون بێت"

 

ئاسیا عەبدوڵا: پێویستە تەوایی گەلی کورد لە ڕۆژئاوا، وە تەواوی پێکهاتەکانی ڕۆژئاواو باکوری سوریا و هاوپەیمانی نێودەوڵەتی بە پێشەنگایەتی ئەمریکا، وە تەواوی ئەو لایەنانەی کە دژی داعشن، چ لە ڕووی سیاسی و چی عەسکەری، جدیتان هەبێت لە بەرامبەر هێرشی تورک بۆ سەر هەرێمی شەهبا و عەفرین، بەڵام هەڵوێستیکی بڵند کە بە ڕاستی بتوانێت ڕێگری لەو هێرشانەی سوپای تورک بگرێت.

 

ئۆپەراسیۆنەکانی سوریای دیموکرات لە چی ئاستێکدایە و هاوڵاتیانی سوریا چۆن پێشوازییان لێ دەکەن؟

 

" ئۆپەراسیۆنەکان ئومێدێکن بۆ ژنانی ئێزیدی کە لە دەستیی داعشدان".

 

ئاسیا عەبدوڵا: دەبینین  کە ئۆپەراسیۆنەکانی هێزەکانی سوریای دیموکرات و یەکینەکانی پاراستنی گەل و یەکینەکانی پاراستنی ژن، بۆ ڕزگارکردنی رەقە و تەبقە، دەسکەوتی باشی لیکەوتۆتەوە، دانیشتوانی، شارەکان پیشوازی گەورەیان لێکردوون، بەتایبەتی ژنان، چونکە پیلانگێڕی تورک و داعش زیاتر بۆ بێ ئیرادەکردن و دەستەمۆکردنی ژنی کوردە، ئەم ئۆپەراسیۆنە بووە هۆی ڕزگاربونی سەدان ژن و کەسی ئەو هەرێمانە، وە ئەمەش ئومێدێکە بۆ ژنانی ئێزیدی کە لە دەستیی داعشدان.

 

ئامانجی کورد لە باکوری سوریا چییە؟

 

"ئەم شۆڕشە بە پێشەنگایەتی ژنان و گەنجانی کورد پێشکەوت"

 

ئاسیا عەبدوڵا: ئامانجی گەورەی ئێمە تەبایی سوریایە، دروستکردنی سوریایەکی دیموکرات، لەگەڵ تەبایی پێکهاتە جیاوازەکان، هەوڵدان و بەرخۆدانی فیدراڵی باکوری سوریا تا ئاسستێکی باش پێشەکوتووە، لەسەر بنەمای ئەزموونی، بەڕێوبەرایەتی خۆسەری ڕۆژئاوای کوردستان، هەمووکەس بە رەنگ و زمان و نەتەوەی جیاواز لە ناو سیستەمەکەدا، جێی گرتووە، ئەم شۆڕشەش بە پێشەنگایەتی ژنان و گەنجانی کورد پێشکەوت، بەتایبەتی بە پێشەنگایەتی ژنانی کورد، بۆیە ئەتوانین بڵێین کە سەرکەوتنی ڕۆژئاوا سەرکەتنی باکووری سوریایە، وە سەرکەوتنی باکوری سوریاش سەرکەوتنی تەبایی پێکهاتە جیاوازەکان و گەلانی سوریایە".

 

دوای شەڕی داعش چ پرۆژەیەکتان لەبەردەستە بۆ باکوری سوریا؟

 

"گەل خۆی دەتوانێت بڕیار بدات"

 

ئاسیا عەبدوڵا: لە ڕۆژهەڵاتی ناویندا کورد تاکە هێزە کە بتوانێ شەڕی داعش بکات، وە ئێستا کورد خاوەنی ستراتیژییەکی دیموکراتییە، بۆ چارەسەرکردنی کێشەی کورد و نەتەوە بندەستەکان، لەسەر بنەمای سیستمێکی دیموکراتی، گەل ئیتر دەتوانێت بۆ خۆی بڕیاربدات، وە دەتوانیت ژیانبکات، لە ژێر سیستمێکی پاریزراو و دادپەروەر و ئازاد و دیموکراتیک، بە پێشەنگایەتی ژنان و گەنجان.

 

بۆچی تورکیا ئەم سیستمەی ئێوەی پێ قبوڵ ناکرێت و دژایەتی دەکات؟

 

"تورکیا بە پشتیوانی چەتەکانی داعش دەیەوێت پێش بە نەخشەی کورد بگرێت"

 

ئاسیا عەبدوڵا: ئامانجی دەوڵەتی تورک ئەوەیە، کە گۆڕانکارییەک دروستبکات لە ڕۆژهەڵاتی ناوەڕاست، جارێکیتر بە هاوپەیمانی نێودەوڵەتی و بە پشتیوانیکردنی گروپی چەتەی داعش ڕێگە لە نەخشەی کورد بگرێت، وە ڕێگە لە سەرکەوتن و دەسکەوتەکانی کورد بگرێت، گۆڕانکارییەک دروستکات کە کورد لە ڕۆژئاوا بکاتە دەرەوە، یان تەواو لاوازی بکات کە توانای چارەسەری نەمێنێت، تەواوی دۆسییە و مەلەفی تورکیا ئاشکرابووە کە بەشێوەیەکی ڕاستەوخۆ هاوکاری و پشتگیری داعش دەکات، لە ڕوی سیاسی و سەربازیش، وە هەوڵدەدات کە ئاڵۆزییەک لە ناو نەتەوەکاندا دروستبکات بە شەڕی تائیفی و مەزهەبی.

 

"بۆ جیهان ئاشکرابووە کە ئاکەپە نە چارەسەرییە، نە ئازادی گەلانە"

 

وتیشی: بەڵام بە بەرخۆدانی کوردان و سیستمی دیموکراتی کوردان، تورکیا نەگەیشتە ئەنجام و ناشگات، ئەمەش سەرکەوتنێکی گەورەیە بۆ گەلی کوردو پیکهاتە جیاوازەکانی سوریا و تەواوی گەلانی بندەستی ناوچەکە، نەک تەنها لە ڕۆژهەڵاتی ناوین بەڵکو بۆ تەواوی جیهان و نێودەوڵەتیش ئاشکرابوو کە ئەم سیاسەت و زیهنیەتەی تورکیا بە تایبەت ئاکەپە و لە کەسایەتی خودی ئەردۆغاندا، نە چارەسەریی و نە ئازادی گەلان هەیە، بەڵکوو سیاسەتێکی دیکتاتۆری دەسەڵاتخوازە کە بۆ بەرژەوەندییەکانی خۆی، دەستی خستۆتە سوریا و بەتایبەتی ڕۆژئاوای کوردستان.

 

هاوکارییە نێودەوڵەتییەکان بۆ شەڕڤانان لە چی ئاستێکدایە؟

 

"پێویستە هاوکارییەکان زیاد بکرێن"

 

ئاسیا عەبدوڵا: هەموو ئۆپەراسیۆنەکان سوریا دیموکرات بەهاوکاری هاوپەیمانی نێودەوڵەتی بەڕێوەی دەبات لەگەڵ هێزی گەل، کەواتە ئەم شۆڕشە موڵکی گەلە، ئەو سەرکەوتنەش کە هەیە بە تێکۆشان و بەرخۆدانێکی بڵند هاتووەتەدی، لە ڕووی سیاسی و دیبلۆماسیشەوە زۆر پێشکەوتووە، هاوکاریکردنی وڵاتانیش مانای بەرەوپێشچونی ئەم شۆڕشەیە، ئەوەی کە لەگەڵ هاوپەیماناندا ئێستا درووستبووەو کردنەوەی نوێنەرایەتییەکانی ڕۆژئاوای کوردستان لە وڵاتانی دەرەوە، هەمووی ئاست و بەرخۆدانی یەپەگە و یەپەژە بووەو دەستکەوتی ئەو شۆڕشەیە کە لە کۆبانێ و عەفرین و کانتۆنی جزیرە بەڕێوەچوو.

 

 

وتیشی: ئێمە ئەوە بەگرنگ دەبینین کە هەموو ئەوهێزانەی پێکەوە بەرامبەر داعش شەڕیان کردووە، وەک پەیەدە لە ڕووی سیاسییشەوە پێمان وایە دەبێت ئەو یەکدەنگییانە فراوانتر بکرێن، بەتایبەت لەنا هێزە دیموکراتەکان و گەلانی سوریادا، ئەگەر چارەسەرییەکان پێشبکەون، دەکرێت ئەزموونی ڕۆژئاوای کوردستان و باکوری سوریا بگوازرێتەوە بۆ تەواوی سوریا بۆ بەئامانج گەیشتنی پێکەوە ژیانی گەلان، وە پێویستە هاوکاریکردنی وڵاتان بۆ ڕۆژئاواو باکوری سوریا زۆر زیاتربێت، چونکە تاکە هێزێک لە ڕۆژئاوای کوردستان و باکوری سوریا کە شەڕی داعش بکات و لە ئاستێکی بڵنددا پێشەنگایەتی بەرخۆدان بکات و سەرکەوتن بەدەستبێنێت بەتایبەت کە ئێستا لە ڕەقەدا بەرخۆدان دەکات، هێزەکانی سوریای دیموکراتە.

 

هەوڵی پەیەدە بۆ ئێستا و داهاتووی سوریا چییە؟

 

"لەگەڵ هەموو لایەنەکاندا لە وتووێژداین بۆ بنادنانی نەتەوەی دیموکرات"

 

ئاسیا عەبدوڵا:"ئێمە وەک پەیەدە لە خەبات و وتوێژداین لەگەڵ هەموو لایەنە سیاسییەکانی ڕۆژئاوای کوردستان و سوریادا، دەمانەوێت دەستورێکمان هەبێت کە مافی هەموو گەلانی تێدا بیت، وە ئێمە سیاسەتمان لە سەر هێڵی سێیەمە، کە ئەویش بنادنانی نەتەوەی دیموکراتە، بۆ ئەمەش هەموو هەوڵ و توانا سیاسییەکانی خۆمان بەگەڕ خستووەو بەردەوامیش دەبین بۆ سوریایەکی دیموکرات، گەر باکوری سوریا و سوریاش بەگشتی ئامەدی دیالۆگی هاوبەش نەبن، ئەوە کاریگەری خراپی بۆ گەلانی سوریا دەبێت.

 

ئابوری ڕۆژئاوای کوردستان ئێستا لە چی ئاستێکدایە؟

 

"دەبێت ئەو ئیمکانە کەمەی هەمانە بە باشی بەکاری بهێنین"

 

ئاسیا عەبدوڵا: گەلی ڕۆژئاوا و باکوری سوریا و جیهان ئەوە دەزانن، کە هەموو دەرگاکان داخراون و ئابڵوقە خراوەتە سەر ڕۆژئاواو باکوری سوریا، لە ئەنجامی ئەمەدا گەلانی ڕۆژئاوای کوردستان گەشتنە ئەو بڕیارەی کە گەل خۆی پرسەکانی خۆی چارەسەر بکات، دەرفەتێکی کەم لەبەردەستە، بەڵام ئیرادەیەکی بەرز هەیە، ئێمە دەبێت بزانین لە چوارچێوەی نەتەوەی دیموکراتیدا بزانین چۆن ئابووری پێش دەخەین، ئەو ئیمکانەی هەمانە ئێمە چۆ بەکاری بهێنین، لەم ڕووەوە پێشکەوتن دروستبووە، ئابوری کۆمەڵگا مەسەلەیەکی زۆر جدییە بەلای ئێمەوە.

 

وتیشی:"کۆمەڵگایەک ئەگەر ژێرخانی ئابوری نەبێت و خۆی نەتوانێت ئابوری خۆی پێشبخات و بەرهەمی خۆی دەربکات و زیادی بکات، ئەوە هەرگیز پێش ناکەوێت، بۆ ئەمە لە کانتۆنی کۆبانێ و جزیر و بەگشتی باکوری سوریا هەوڵدانی باش هەیە، بەڵام کێشەی ئەساسیش سنورەکانە، کە لە ناوەو دەرەوە بەسەرماندا داخراوەو کاریگەری لەسەر هاوڵاتیان دەبێت، بەتایبەت لە ڕووی تەندرووستییەوە.

 

بۆچی ئەو سنوورانە ناکرێنەوەو ئامانج چییە لە داخستنی؟

 

"گەلی ڕۆژئاوا زۆر نیگەرانن لە دەسەڵاتی باشور"

 

ئاسیا عەبدوڵا:"کێشەی سەرەکی ڕۆژئاوا کێشەی سیاسییە کە سنورەکانیان لێمان داخستوە، ڕۆژئاوای کوردستان زۆر نیگەرانن لە دەسەڵاتی باشوری کوردستان، نمونە ئێستا دەرگای سێمێلکایان داخستوە، گەلی ڕۆژئاوا هیچ ناڵێن لەسەری، چونکە دەزانن ئەم کارە هەڵوێستێکی سیاسییەو وەک فشارێک بەرامبەر گەلی ڕۆژئاوا بەکاردەهێندرێت بۆئەوەی ژیانی خەڵک سەختتر بێت، ئەمەش بەڕاستی وەڵامێکی بۆ سەرکەوتنەکان، بەڵام دەتوانین بڵێین کە گەلی ئێمە زۆربەی زەحمەتییەکانی بەڕێ کردووەو لە داهاتوودا کێشەکان چارەسەر دەبن.

 

پەیوەندیی نێوان پارچەکانی کوردستان چۆ هەڵدەسەنگێنن؟

 

"سەرکەوتن و مەترسییەکانمان هاوبەشن"

 

ئاسیا عەبدوڵا: خۆشبەختانە ئێستا لە هەر شارێک و هەرێمێک و جێیەکی کوردستان سەرهەرڵدانێک دروستبووە، دەستکەوت و سەرکەوتنەکانی ڕۆژئاوا هەم لە ڕووی سیاسی و هەم لە ڕوی مەعنەوی و ستراتیژییەوە، دەستکەوتیکی نەتەوەییە بۆ گەلی کورد لە هەر چواربەشی کوردستان بۆ تەبایی گەلان، وە مەترسی سەر ڕۆژئاواش مەترسییە بۆسەر هەموو ئەوانە، پێویستە وەک چۆن دوژمنان بەردەوامن لە دروستکردنی مەترسی بۆ سەرمان و داگیرکردنمان، پێویستە ئێمەش خەباتکردنێکی هاوبەشمان هەبێت، بە  بەرخۆدانکردنێکی بڵند لە دژیان.

 

سەرەنجتان لەسەر ئامادەکارییەکان بۆ کۆنگرەی نەتەوەیی کورد؟

 

"داواکارین کەنەکە بەردەوامی بە کۆبوونەوەکان بدات"

 

ئاسیا عەبدوڵا: کۆبوونەوەی ڕاوێژی نەتەوەیی بۆ ئامادەکاری کۆنگرەی نەتەوەیی بەڕێوەچوو، بە بۆچونی ئێمە کۆبونەوەیەکی سەرکەوتوبوو، لەرووی ئەنجامدان و لەڕووی هەڵوێستی هاوبەشەوە وەکو بابەت، وە هەوڵدان و خەباتی کەنەکە  گرنگ نرخێنرا، پێویستی ئێمە لەم کاتدا لە هەموو کات زیاترە بە کۆنگرەی نەتەوەیی، بۆ هەبوونی هەڵوێستێکی نەتەوەیی هاوبەش، وە بۆ ستراتیژییەکی هاوبەش، هەم لە ڕووی سیاسی و هەم بۆ پاراستنی ئەو دەسکەوتانەی کە هەیە، بۆ  چارەسەرکردنی کێشەی کورد لە ڕۆژهەڵاتی ناوەڕاست، ئێمە داواکارین کە کۆبوونەوەکانیان بەردەوام بکەن، بەڵام بە ڕۆژەڤی نوێ-وە، ئێمەس وەک پارتێکی سیاسی ڕۆڵی خۆمان دەگێڕین لە بەستنی کۆنگرەی نەتەوەییدا.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin