Smiley face
Smiley face
Smiley face

یلدرم: دەبێت بە یەکێتی نەتەوەیی سیاسەتێکی هاوبەش بۆ کورد دیاری بکرێت

2017-10-07 13:28:13



ڕۆژنیوز - بێریتان زاگرۆس

 

نادر یلدرم، جێگری هاوسەرۆکانی گشتی پارتی دیموکراتی گەلان- هەدەپە، دەڵێت پێویستە کورد یەکێتی نەتەوەیی پێک بهێنێت و سیاسەت و دبلۆماسیی هاوبەش دیاری بکات و بەپێی ئەو بجولێتەوە.

 

لە چاوپێکەوتنێکی تایبەتدا بۆ ئاژانسی رۆژنیوز، نادر یلدرم سەبارەت بە یەکێتی نەتەوەیی، ڕیفراندۆمی هەرێمی کوردستان و کاردانەوەکان لە بەرامبەر ڕیفراندۆمەکەدا وەڵامی پرسیارەکانی دایەوە ئاماژەی بەوە کرد کە ئەوان وەک هەدەپە سێ ڕاگەیەندراویان بڵاوکردەوە و ڕایانگەیاندوە کە مافی گەلی کوردە بتوانێت چارەنووسی خۆی دیاری بکات، دەشڵێت: هەر لەو ڕاگەیەندراوەشدا وتمان، کە پێویستە کورد دۆخەکە بەباشی تاوتوێ بکات و کێشە ناوخۆییەکانی چارەسەر بکات، هەروەها ئاماژەمان دا کە پەرلەمانی هەرێمی کوردستان پێویستە بکرێتەوە، ئاماژە بەوەش دەکات کە هەمیشە وتوویانە کە پێویستە گەلی کورد یەکێتی پێک بێنێت و سیاسەتێکی هاوبەش بەڕێوەببات.

 

دەقی چاوپێکەوتنەکە:

 

دەوترێت کە ڕیفراندۆم ستراتژییەکی هاوبەشی پارتی و ئاکەپەیە، کە تێکچوو و کەوتە ناو ئاڵۆزییەوە، بە بۆچوونی ئێوە ئەو ئاڵۆزییانە بەردەوام دەبن؟

 

"ئەو پەیوەندییە تەنیا بە مەبەستی دژایەتیی پەکەکە پێکهاتبوو"

 

نادر یلدرم: هەرێمی کوردستان و بە گشتی کوردستان لە دۆخێکی هەستیار و دینامیکدا بەسەر دەبات و ئەگەری ڕوودانی هەموو شتی تێیدا هەیە، ئێستاکە پەیوەندییەکانی نێوان پارتی و ئاکەپە تێکچووە، من پێموا نییە پەیوەندیی ئەو دوو لایەنە ستراتیژی بووبێت، ئەو پەیوەندییە تەنیا بە مەبەستی دژایەتیی پەکەکە پێکهاتبوو، ئەو پەیوەندییە لە سەر بنەمای هەندێک بەرژوەندی بچوک دامەزرابوو، پەیوەندییەکانی تورکیا، ئێران و عێراق پێکەوە بەبۆنەی دژایەتیی کورد و کوردستانەوەیە، لەم نێووانەدا مەترسییەکی گەورە هەیە، وەکچۆن پارتی پێشتر لەپێناو هەندێک بەرژەوەندی بچوکەوە دژی پەکەکە پەیوەندی لەگەڵ تورکیا پێکهێنا، ئەگەری هەیە لە داهاتووشدا ئەوە ڕووبدات، نابێت لایەنە کوردییەکان بچنە ناو پەیوەندیگەلێکەوە کە مەترسین بۆ سەر بەرژوەندییە نەتەوەییەکان.

 

 

ڕیفراندۆمی باشوری کوردستان وایکرد، کە ئاکەپە دژایەتیی کورد ئاشکراتر ڕابگەیەنێت، ئایا ئەوە دەبێتە هۆی ئەوەی کە ڕاستییەکانی ئاکەپە باشتر ببینرێن لە باشوری کوردستان؟

 

"هەوڵیاندا هێرش بکەنە سەر کلتور و مێژووی گەلی کورد"

 

نادر یلدرم: ئێمە وەک هەدەپە چەندین ساڵە کە ڕووبەڕووی سیاسەتی لەناوبردن و هەڕەشە و فشاری ئاکەپە دەبینەوە، دەوڵەتی تورک لە سەر بنەمای ئینکاریی دامەزراوە، بۆیە دوژمنایەتی گەلی کوردیش بۆ ئەوان یەکێکە لە سەرەکیترین بنەماکانیان، سیاسەتی تواندنەوەیان دژی گەلی کورد گرتە بەر، ئاکەپە و مەهەپە ئەو قۆناغە لە سەرکوتیان گەیاندە بەرزترین ئاستەکەی، تێگەیشتن کە تواندنەوە تەنیا بە هێرشی فیزیکی ناکرێت و هەوڵیاندا هێرش بکەنە سەر کلتور و مێژووی گەلی کورد، عەقڵییەتێکیان لە کۆمەڵگادا بڵاوکردەوە کە ئێمە دۆستی گەلی کوردین بەڵام دژی پەکەکەین، هاوکات هێرشیان کردە سەر ڕۆژئاوا و ئێستاش دەستیان کردووە بۆ هێرشکردنەسەر گەلی کورد لە باشوری کوردستان، لە باکوری کوردستان کەس لایانگری ئاکەپە نییە، هەندێک کەس هەن کە لە باکور پێیان دەوترێت نۆکەر، ئەوانە بە لایەنگر لە قەڵەم نادرێن، بەڵکو بەکرێگیراوی دەوڵەتن، ٩٠٪ی ئەوانەی لە باکور لایەنگری ئاکەپە بوون، چیدی پشتگیریی ناکەن.

 

دەوترێت ژمارەیەکی زۆری ڕێکخراوەکانی پارتی لە ناو ئاکەپەدان، ئەگەر دەسەڵاتی ئاکەپە زیاتر بێت، ئەوە تا چ ڕادەیەک ڕاستە؟

 

"ئاکەپە و پارتی وەک یەک حزب سیاسەت دەکەن"

 

نادر یلدرم: باش دەزانین کە ئاکەپە و پارتی ماوەیەکی درێژە کە پەیوەندییان پێکەوە باشە، پێشتر وتبووم کە ئاکەپە و پارتی وەک یەک حزب سیاسەت دەکەن، ئەو کاتە بەم شێوەیە بوو، پارتی لە باشور سیاسەتەکانی ئاکەپەی بەڕێوەدەبرد، لە هەڵبژاردنی تورکیادا هاوکاریی ئاکەپەی کرد و تا ئەو ئاستەی مەسعود بارزانی ڕاگەیەندراوی بڵاوکردەوە و وتی ئاکەپە باشترین حزبە بۆ گەلی کورد، ئەوەی دەڵێن ڕێکخراوەکانی پارتی لە ناو ئاکەپەدان ڕاست نییە، پەیوەندییان پێکەوە هەیە، بەڵام نەک لەو ئاستەدا، سیاسەتی هاوبەشی پارتی و ئاکەپە پێکەوە لە باکوری کوردستان لە بەرامبەر بەرخۆدانی گەلی کورددا تێکشکا، هوموو کوردێکی خاوەن هەڵوێست نەفرەت دەکات لە ئاکەپە، کورد سیاسەتەکانی ئاکەپەی بینی بەرامبەر بە ڕۆژئاوا، ئێستاش بەرامبەر بە باشور، تانکەکانی هێناوەتە سەر سنوورەکان و دەڵێت بە هاوکاری ئێران و عێراق ئۆپەراسیۆن ئەنجام دەدات دژی کورد.

 

 

بینیمان سەرەڕای هەموو دژایەتییەکانی کۆمەڵگای نێودەوڵەتی، مەسعود بارزانی ڕیفراندۆمەکەی بەڕێوەبرد، پێتانوایە بارزانی پشتی بە کوێ گەرمە کە وا سوور بوو لە سەر ئەنجامدانی ڕیفراندۆم؟

 

"پێویستە کورد دۆخەکە بەباشی تاوتوێ بکات"

 

نادر یلدرم: ئێمە وەک هەدەپە سێ ڕاگەیەندراومان بڵاوکردەوە و ڕامانگەیاند، کە مافی گەلی کوردە بتوانێت چارەنووسی خۆی دیاری بکات، هەر لەو ڕاگەیەندراوەشدا وتمان، کە پێویستە کورد دۆخەکە بەباشی تاوتوێ بکات و کێشە ناوخۆییەکانی چارەسەر بکات، هەروەها ئاماژەمان دا کە پەرلەمانی هەرێمی کوردستان پێویستە بکرێتەوە، هەمیشە وتوومانە کە پێویستە گەلی کورد یەکێتی پێک بێنێت و سیاسەتێکی هاوبەش بەڕێوەببات، ڕیفراندۆم بە تەواوی پرسێکی ناوخۆییە، هەموو پرسە ناوخۆییەکانیش دەبێت لە کۆنگرەی نەتەوەیی دا بنرخێندرێن، بانگەوازی هەدەپە ئەوەیە، کە حزبە کوردییەکان بە زووترین کات کۆببنەوە و کۆنگرەی نەتەوەیی ببەستن و بەم شێوەیە هەوڵ بدەن بۆ پێکهێنانی یەکێتی نەتەوەیی.

 

ئایا دەوڵەتێکی بچوک دەتوانێت پرسەکانی گەلی کورد چارەسەربکات؟

 

"ئەو سیاسەتە لە ساڵی 1920 بەدواوە دژی کورد بەڕێوەدەچێت"

 

نادر یلدرم: ئەوەی لە سەد ساڵی ڕابردوودا پێش کەوتووە چی بووە؟ هەر لە ڕێگای ئەو دەوڵەتانەوە نەیانهێشتووە کورد ئازاد بێت، ئێستاش ڕەنگە بڵێن وڵاتێکی بچوکیان دەدەینێ و بێدەنگیان دەکەین، ئەو سیاسەتە لە ساڵی 1920 بەدواوە دژی کورد بەڕێوەدەچێت، بەڵام ئیدی لەوە تێگەیشتون کە ناتوانن، ڕەنگە بتوانن دەست بە سەر پارچەیەکدا بگرن، ئەو پارچانە دیکە چ لێدەکەن؟ تاکتیک و سیاسەتی عەبدوڵا ئۆجالان، ڕێبەری گەلی کورد سیاسەتی داگیرکەری پارچە کرد، ئەوە ئەگەر سیاسەتێک بەو شێوەیە ڕێبەر ئاپۆ باسی دەکات بەڕێوەبچێت، ئەو سیاسەتە بە دڵنیاییەوە ئەنجامی دەبێت.

 

 

هاوسەرۆکانی هەدەپە و بەرێوەبەرایەتی حزبەکەتان لە زینداندان، چ زانیارییەکی تازە لەبارەی کەیسەکانیانەوە هەیە؟ ئایا کەیسەکانیان پێش کەوتوون؟

 

"پێمانوایە کە دەسەڵاتداری ئاکەپە زۆر نەخایەنێت و تێک بشکێت"

 

نادر یلدرم: هاوسەرۆکانی حزبەکەمان ماوەی نۆ مانگە لە زیندانن، هەروەها ٨٠ شارەوانی باکوری کوردستان لە زینداندان، ئەوە شتێکی سەیر نییە، لە مێژووی تێکۆشانماندا، زیندان هەمیشە بەشێک بووە لە ڕێگا، چیدی بە دانوستان و دیالۆگ ناکرێت بیر لە چارەسەرکردنی کێشەکان بکرێتەوە، لە باکوری کورستان، حکومەتی تورکیا و سیاسەتەکانی بەرەو شکست دەچن، ئێمە هەموو رۆژێک لە پایتەختەکەیاندا دەیانبینین کە تا چ ئاستێک لاواز بوون، پێمانوایە کە دەسەڵاتداری ئاکەپە زۆر نەخایەنێت و تێک بشکێت.

 

هەدەپە و جەهەپە حزبەکانی ئۆپۆزسیۆنن لە تورکیا، ئەوەی کە دەوترێت هەدەپە و جەهەپە ڕێککەوتوون ڕاستە؟

 

"وەک هەدەپە بۆ هەموو ڕێککەوتنێکی دیموکراتی ئامادەین"

 

نادر یلدرم: ئێمە وەک هەدەپە بۆ هەموو ڕێککەوتنێکی دیموکراتی ئامادەین، ئێمە بەرگری لە ڕێساکانی ئازادی و یەکسانی و دیموکراسی دەکەین، لەبارەی ناردنی هێزی سەربازی بۆ ڕۆژئاوا و باشور سێ حزبی ئاکەپە و مەهەپە و جەهەپە وتیان بەڵێ و تەنیا ئێمە دەنگی "نا"مان دا، ئینکاری ناکەین کە جەماوەری جەهەپە ئارەزووی بەدیموکراتیبوونیان هەیە، ئێمەش پەیوەندیمان هەیە لەگەڵیان، جەهەپە لە نێوان جەمسەرە سیاسییەکانی تورکیادا دێت و دەچێت، پەیوەندیمان هەیە بە جەهەپەوە، بەڵام ئەوە بەو واتایە نییە کە لەگەڵیان ڕێککەوتووین.

 

 

ئایا لە نێوان حزبەکانی باکوری کوردستاندا یەکێتیی و یەکهەڵوێستی هەیە؟

 

"هەندێک لایەنی سیاسی سیاسەتی پیس و قێزەون بەڕێوەدەبەن"

 

نادر یلدرم: لە ناو خەڵکدا یەکێتی هەیە، بەڵام هەندێک لایەنی سیاسی سیاسەتی پیس و قێزەون بەڕێوەدەبەن، ئەوان هەوڵدەدەن دەسەڵاتداریی ئاکەپە وەک دەرفەت بۆ خۆیان بەکار بێنن و هەل بقۆزنەوە، بۆ پارچەکردنی خەڵک هەوڵدەدەن، ئەوەش لە سەر ناوی کورد ئەنجام دەدەن، لەلایەکی دیکەوە یەکگرتووییەک کە لە ناو خەڵکدا هەیە هیوادارمان دەکات بۆ گەیشتن بەو یەکێتی و یەکهەڵوێستییەی باسی دەکەن.

 

بە چ ڕێبازێک یەکێتی نەتەوەیی پێکدێت؟

 

"گەلی کورد دەبێت هەموو ناکۆکییەکانی وەلا نێت"

 

نادر یلدرم: پێویستە یەکێتی نەتەوەیی ببێتە بابەتی سەرکی قسە و باس و تێکۆشانمان، کاتێک هەڕەشە کرایە سەر باشور، گەلی کورد لە ڕۆژئاوای کوردستان دەستبەجێ وتیان، کە ئێمە بەرگری لە باشوری کوردستان دەکەین، ڕێکخراوەکانی باکوریش خاوەن هەڵوێست بوون، پەکەکە لەو بارەیەوە ڕاگەیەندراوی دا، لە کاتی وا دا گەلی کورد دەبێت هەموو ناکۆکییەکانی وەلا نێت و لە سەر بنەمای یەکێتی نەتەوەیی بیربکاتەوە، پێویستە کۆنگرەی نەتەوەیی ببەسترێت، هەموو پرسەکان و کێشەکانی کورد لە کۆنگرەی نەتەوەیی بخرێنە بەر باس، بەو شێوەیە سیاسەتێکی نەتەوەیی دیاری دەکرێت و هێرش و هەڕەشەکانی سەر گەلی کورد پوچەڵ دەکرێنەوە.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin