Smiley face
Smiley face
Smiley face

لە سەیدسادق یەكەم دیداری یەڵماز گیونەی بۆ نمایشی فیلم بەڕێوەچوو

2017-10-17 18:36:02



ڕۆژنیوز - هاوكار مستەفا


بە چاودێری قائیمقامییەتی شارۆچكەی سەیدسادق، بەڕێوەبەرایەتی ڕۆشنبیری و هونەری سەیدسادق بە هاوبەشی بەڕێوەبەرایەتی هونەری سینەمای سلێمانی، یەكەمین دیداری یەڵماز گیونەی بۆ نمایشی فیلم دەستپێكرد، كە ئەمڕۆ دوو كورتە فیلم نمایشكران و بڕیاریشە سبەینێ‌ بەردەوامی هەبێت.

سەرلەئێوارەی ئەمڕۆ لە هۆڵی ڕۆشنبیری شارۆچكەی سەیدسادق-ی سەربە پارێزگای سلێمانی، بەئامادەبوونی ژمارەیەك لە هاوڵاتیان و گەنجان، یەكەم دیداری یەڵماز گیونەی بۆ نمایشی فیلم بەڕێوەچوو، كە تیایدا دوو كورتە فیلم بەناوەكانی 'ڕیكۆرد و ماڵ و كلیل' نمایشكران.

ئازاد سەوزە، بەڕێوەبەری ڕۆشنبیری و هونەری سەیدسادق و سەر پەرشتیاری یەكەم دیداری یەڵماز گیونەی، بە ڕۆژنیوزی ڕاگەیاند: ئامانجمان لە سازكردنی ئەم دیدارە بۆ ئاشتكردنەوەی هونەری سینەماو نمایشكردنی فیلم-ە لەگەڵ گەنجان و هاوڵاتیانی ئەم شارۆچكەیە، چونكە ماوەیەكی زۆرە ئەم جۆرە چالاكییانە لە سنورەكەدا ئەنجام نەدراون و دەرفەتێكی وەها نەڕەخساوە، كە گەنجان و هونەر دۆستانی سەیدسادقیش بێبەش نەبن لە هونەری سینەما.

 


وتیشی: بەرنامە ڕێژیمان كردبوو، كە لە مانگی ڕابردوودا ئەم دیدارە ساز بكەین، بەڵام بەهۆی هاتنە پێشی بابەتی ڕیفراندۆم و هەروەها كۆچی دوایی مام جەلال-ەوە، دومانخست بۆ ئەمڕۆ، هەرچەندە ئەمڕۆش بەهۆی ئەو بارودۆخە نەخوازراوەی بەسەر شاری كەركوكدا هاتووە وەك پێویست هاوڵاتیان نەهاتوون بۆ هۆڵەكە، بەڵام ئێمە بڕیارمانداوە كە درێژە بەم جۆرە چالاكییانە بدەین و سبەینێش ڕۆژی دووەمی دیداری یەڵماز گیونەی درێژەی دەبێت.

بەڕێوەبەری ڕۆشنبیری و هونەری سەیدسادق ئەوەشی وت: لە ڕۆژی یەكەمدا دوو كورتە فیلم نمایشكران، كە یەكەمییان بەناوی( ڕیكۆرد) بوو لە دەرهێنانی هەوراز محەمەد و ئەویتریشان بەناوی ( ماڵ و كلیل) لە دەرهێنانی شوان عەتوف-بوو، هاوكات سبەینێش فیلمی (10 چركە) نمایش دەكرێت، کە لە دەرهێنانی ئاكۆ عەزیزە، فیلمەكەی سبەینێ‌ باس لەو توندوتیژییانە دەكات بەرامبەر بەژنان دەكرێن، هەروەها بەرنامەمان داڕشتووە، كە هەر دوو هەفتە جارێك لە هۆڵی ڕۆشنبیری فیلمێكی سینەمایی نمایش بكەین.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin