Smiley face
Smiley face
Smiley face

خانەقینییەکان: ڕێگە نادەین پێکەوەژیانی نێو شارۆچکەکەمان تێکبدرێت 

2017-10-23 09:00:14



ڕۆژنیوزـ هاوڕێ کرێکار 

 

بەشێک لە هاوڵاتیانی شارۆچکەی خانەقین دەڵێن، ئێمە چەندین ساڵە لەگەڵ هەموو جیاوازییەکانیدا، پێکەوە وەک برا دەژیین، ڕێگە نادەین هیچ هێز و گروپ ئاشتی و پێکەوە ژیانی نەتەوە و مەزهەبەکانی نێو شارۆچکەکە تێک بدات، هاوڵاتییەکیش دەڵیت:"خانەقینییەکان هەمیشە برایەتى و پێکەوەژیانیان لا گرنگتر بووە".

 

خانەقین، شارۆچکەیەکی سەر بە پارێزگای دیالەیە، دانیشتووانەکەی لە نەتەوەی کورد، عەرەب و توکمان پێکدێن، شیعە، سوننە،کاکەیی و مەسیحی، پێکهاتە مەزهەبی و ئاینییەکانی ئەو شارۆچکەیە، ڕۆژی ١٧ی ئەم مانگە، چەکدارانی حەشدی شەعبی، هاوشێوەی زۆرینەی ناوچە دابڕێنراوەکانی دیکە، شارۆچکەی خانەقینیشیان خستە ژێر کۆنترۆڵی خۆیانەوە.

 

ستار عەلی ڕەحیم، هاوڵاتییەکى دانیشتووى شارۆچکەى خانەقین-ە و بۆ ڕۆژنیوز وتى:ئێمە وەک دانیشتووانى شارۆچکەى خانەقین، هیچ کات ڕێگەمان نەداوە، هیچ هێز و لایەنێکى سیاسی تەبایی و برایەتی نێوان مەزهەب و ئاینە جیاوازەکان تێکبدات، بەداخەوە ئەو هێزەى حەشدی شەعبی، کە لەم چەند ڕۆژەى ڕابردوو هاتنە نێو خانەقین، هەوڵیاندا ئەو برایەتى و تەباییە لەناو ببەن بەڵام نەیتوانى، چونکە خانەقینییەکان هەمیشە برایەتى و پێکەوە ژیانیان لە هەموو شتێک لا گرنگتر بووە و هەموو  هەوڵێکیشمان پوچەڵکردووەتەوە، کە ویستبێتی ئاژاوەمان لە نێو دروست بکات. 

 

(ستار عەلی ڕەحیم)


محەمەد جومعە،  هاوڵاتییەکى تری دانیشتووى شارۆچکەی خانەقین، لەبارەی دۆخی ئێستای شارۆچکەکە، بە ڕۆژنیوزی وت:ئێستا هیچ گرژییەک لە شارۆچکەکەمان نییە، ژیان تا دێت ئاسایی تر و ئارام تر دەبێتەوە، وەک ڕۆژانى پێش ئەم پرسەش، خەڵک بە ئارەزووى خۆی هاتووچۆ دەکات و گەڕاوەتەوە سەر کاری خۆی.

 

(محەمەد جومعە)
 


دیار عەلی، هاوڵاتیەکى تری دانیشتووى شارۆچکە خانەقینە، بۆ ڕۆژنیوز قسەیکرد و وتی:١٤  ساڵە بە ئازادی دەژین، ئێستا بەشەو و ڕۆژێک خەڵکانێک هاتوون بەتانک و ئۆتۆمبیلی ڕەشی پڕ چەکەوە، سوکایەتى بە پیرۆزترین شتى ئێمە دەکەن، کە ئەویش ئاڵای کوردستانە، ئەو هێزانەى هاتوون بۆ خانەقین، ئەگەر بەفعلی کێشەى بۆ دانیشتووانى شارۆچکەى خانەقین دروست نەکردووە، بەڵام کاریگەری لەسەر دەروونمان داناوە، چونکە ئەو هێزە وەک داگیرکەر هاتووە و دەیەوێ  ئاژاوەگێڕی و ناتەبایی بخاتە نێو پێکهاتەکانى خانەقینەوە.

 

(دیار عەلی)



دیار عەلی وتیشی:ئەو  هێزە نەهاتووە بڵێت هێزێکى ئاشتیخوازم و لەسەر ئەم خاکە هەموومان وەک یەک واین و پێویستە بە ئاشتییانە و برایانە دوور لەبیر کردنەوەى مەزهەبی و بیر و فکری جیاوازەوە بژین، بەڵکو هاتووە ئەیەوێ شەڕت لەگەڵ بکات و ململانێی مەزهەبی دروست بکات، بەڵام ئەو ناتوانێت بە هاتنى دوژمنایەتى و ڕق و کینە بخاتە نێو دڵی هاوڵاتیانى خانەقین، کە لە پێکهاتە جیاوازەکانن و چەندین ساڵە پێکەوە ژیان دەگوزەرێنین.

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin