Smiley face
Smiley face
Smiley face

بەرپرسێکی یەکێتی لە خانەقین: وەک پێشمەرگە مامەڵە لەگەڵ حەشدی شەعبی دەکەین

2017-10-24 08:26:03



ڕۆژنیوز ـ هاوڕێ کرێکار

 

بەرپرسێکی یەکێتی لە خانەقین لەبارەی مانەوەی حەشدی شەعبی لە خانەقین ئاماژە بەوە دەکات کە حەشدى شەعبی نەهاتوەتە خانەقین تا بکشێتەوە، ئەوەى هاتوەتە سنووری خانەقین سوپاى عێراق و پۆلیسی فیدرالییە، پێش ئەم ڕووداوانەش ئێمە هەندێ خەڵکمان لە ئەنجامى نەبوونى کار و سود وەرنەگرتنى وەزارەتى پێشمەرگە لە تواناى ئەو گەنجانەى خانەقین و کردنیان بە پێشمەرگە و ڕزگارکردنیان لە بێکاری، بەشێکى زۆریان بۆ بژێوى ژیانیان ڕۆیشتونەتە ناو هێزەکانى حەشدی شەعبییەوە، ئێستا ئەوان حزوریان هەیە لەسنوری خانەقین، زۆر هاوکاری ئێمەن وئێمەش وەک پێشمەرگە مامەڵەیان لەگەڵ دەکەین.

 

شێرکۆ میروەیس، بەرپرسی مەڵبەندى هەشتى خانەقینى یەکێتى نیشتیمانى کوردستان، لەسەر دۆخی ئێستا خانەقین و ناوچە دابڕیندراوەکان و ئەو کێشە و گرڤتانەى هاتونەتە ئاراوە, بۆ ڕۆژنیوز دەدوێ ت وەڵامی چەندین پرسیاری ئاژانسەکەمان دەداتەوە.



دەقی چاوپێکەوتنەکە:
 

ناوچەدابڕێنراوەکان بۆ واى لێهات؟

 

"نەمانتوانى پلانێکى ستراتیژیمان هەبێت"

 

شێرکۆ میروەیس: لەئەنجامى ئەو دۆخە نائارامەى لەدواى ڕووخانى ڕژێمى بەعس، کە سەرتاپاى عێراقی پێدا تێپەڕی، دەستى دەستى پێکردنى سیاسییەکانى عێراق لە جێبەجێکردنى مادەکانى دەستوور و کەڵەکە بوونى کێشە سیاسییەکان، هەموو ئەوانە هۆکار بوون بۆ ئەوەى ئەم دۆخە بێتە ئاراوە، لەهەمان کاتیشیدا، بۆ ئێمە وەک سەرکردایەتى سیاسی کورد، بەشێک لەم بەرپرسیاریەتییە دەکەوێتە سەر شانمان، کە نەمانتوانى پلانێکى ستراتیژیمان هەبێت بۆ کێشە وگرفتەکانى ئێستا و داهاتووى ناوچەکە، نەشامانتوانى لەسێبەری مادەى ١٤٠ وەبەرهێنانێکی باش بونیاد بنێین بۆ ئەوەى کایەکانى ژیان ببەستینەوە بە قوڵایی ژیانى کوردستان چ لەڕووى ئابورییەوە چ لەڕووى سیاسییەوە، بۆ ئەو هەموو پایە گرنگانەى کورد لە ناوچە دابڕێنراوەکان، سیاسەتى کورد بەداخەوە بۆ ناوچە دابڕێنراوەکان سیاسەتێکى دڕێژخایەن نەبوو، بەڵکو سیاسەتى ڕۆژ بوو، بۆیە بەشێک لەو هەڵانەى کە ئێستا دەگوزەرێن دەکەوێتە سەرشانی سەرکردایەتى کورد.

 

 

دۆخی ئێستاى خانەقین، چۆنە؟

 

"هەموومان پێکەوە هەوڵماندا، کێشە ئاڵۆزەکان کپ بکەینەوە"

 

شێرکۆ میروەیس: دۆخى ئێستاى ناو شارۆچکەى خانەقین زۆرباشە، باشبوونى دەگەڕێتەوە بۆ بەر لەم ڕووداوانە، پێشتر لەگەڵ پارێزگاری دیالە و فەرماندەیی پۆلیسى دیالە و بەشێکى زۆری دامودەزگاکانى دیالە، پەیوەندیەکى باشمان هەبوو، ئەم دۆخە نەخوازراوە هاتە پێشەوە هەموومان پێکەوە هەوڵماندا، کێشە ئاڵۆزەکان کپ بکەینەوە ودۆخى ئارامى بۆ شارۆچکەکەمان بگەڕێنینەوە و خەڵکى شارۆچکەکەش لەگەڵمان وەستانەوە، تائێستا ئەوەى ئەبینرێ دۆخێکى زۆر باش هەیە لەخانەقین.

 

دەنگۆی ڕێککەوتنى حکومەتى عێراق و یەکێتى هەیە، تۆ تاچەند ئاگاداری ئەو ڕێککەوتنانەى؟

 

"بێ ئاگام لێی"

 

شێرکۆ میروەیس: بەهیچ شێوەیەک ئاگاداری ئەو ڕێکەوتنانە نیم وهیچ پرسیارێکى سەبارەت بەو ڕێکەوتنانەش وەڵام نادەمەوە، چونکە بێ ئاگام لێی.

 

نەبوونی یەکێتی نەتەوەیی و بەپیرەوە نەچوونی کەنەکە بۆ بەستنی کۆنگرەی نەتەوەیی، تا چەند هۆکار بوو بۆ دروستبوونی ئەو دۆخە و لەدەستدانی دەستکەوتەکانی کورد؟

 

"هەرهێزێک لەبەر مەرامەکانى خۆی ڕێگیر بووە لەبەستنى ئەم کۆنگرەیە"

 

شێرکۆ میروەیس: بەداخەوە پەرتەوازەیی نێو ماڵی کورد، ئەرکى بەستنى کۆنگرەى نەتەوەیی کوردی قورس تر کرد، بۆیە زەرورە هەموو کورد ڕێگا بۆ پرسێکى وا گەورەى چارەنووسساز خۆش بکات، بۆ ئەوەى بەکاری خۆی هەستێت، ئێستا ناوچەکە بە بارودۆخێکى هەستیاردا تێدەپەڕێت و پێویستى بە یەکێتیەکى نەتەوەیی گرنگ و کۆنگرەى نەتەوەیی کورد هەیە، هەرهێزێک لەبەر مەرامەکانى خۆی ڕێگیر بووە لەبەستنى ئەم کۆنگرەیە، دەبێت واز لەو مەرامانە بهێنرێت، نێو ماڵی کورد زۆرجار مەرامى سیاسی لابەلاى هەر یەک لەو هێزە سیاسیانەى لە نێو کایەکەدان، بوەتە هۆی تێکدانى، بەڵام بەهیواین لە دوایدا ئەم پرسە ببێتە هۆی ئەرکى لە پێشینەى هەر هێزێکى سیاسی لەو هێزانەى کە ڕێگیرن لەبەردەم بەستنى ئەو کۆنگرەیە، پێویستە هەوڵی جدى بدەین بۆ ئەو یەکێتیە نەتەوەیی، بۆ ئەوەى گەلەکەمان ڕزگاری بێت لەژێر دەستى نەیارەکانمان.

 

چی کراوە بۆ هێورکردنەوەی دۆخەکە؟

 

شێرکۆ میروەیس: لەسەرەوە ئاماژەم پێدا، بەشێکى زۆری فەرمانگەکانى خانەقین، فەرمان لەحکومەتى ناوەندییەوە وەردەگرن، دۆخی سیاسی عێراق، دۆخێکى نائارام و شێواوە، ئەمە وایکردووە زۆر جار خەڵکى نامەسئول لەم بازاڕە شێواوییەدا بە دوای پشێویدا بگەڕێت، زیادەڕەوى بکەنە سەر بەڕژەوەندی گشتى، بۆیە ئێستا لە خەمى ئەوەین پێکەوە بتوانین، وێنەى ڕاستەقینەى ناوچەکە وەک خۆی بگەیەنینە دەسەڵاتدارانى سەرەوە لە هەردوو حکومەتى هەرێم و ناوەند، بۆ ئەوەى ڕێگری لەخەڵکى خراپ بکەن، تا دۆخەکە ئارام تر بێتەوە، لەگەڵ هاوکارەکانمان لە دیالە بە پێی تێگەیشتنێکى سیاسی و مێژوویی ناوچەکە، دۆخی خانەقینمان وا هێور کردەوە، کە ئێستا ئەبینرێ.

 

 

حەشدی شەعبی کشاوەتەوە؟ یان هیچ بەڵێنێکی داوە بۆ کشانەوە؟

 

"ئێمە وەک پێشمەرگە مامەڵەیان لەگەڵ دەکەین"

 

شێرکۆ میروەیس: حەشدى شەعبی نەهاتوەتە خانەقین تا بکشێتەوە، ئەوەى هاتوەتە سنووری خانەقین سوپاى عێراق و پۆلیسی فیدرالییە، پێش ئەم ڕووداوانەش ئێمە هەندێ خەڵکمان لە ئەنجامى نەبوونى کار و سود وەرنەگرتنى وەزارەتى پێشمەرگە لە تواناى ئەو گەنجانەى خانەقین و کردنیان بە پێشمەرگە و ڕزگارکردنیان لە بێکاری، بەشێکى زۆریان بۆ بژێوى ژیانیان ڕۆیشتونەتە ناو هێزەکانى حەشدی شەعبییەوە، ئێستا ئەوان حزوریان هەیە لەسنوری خانەقین، زۆر هاوکاری ئێمەن وئێمەش وەک پێشمەرگە مامەڵەیان لەگەڵ دەکەین.

 

لە داهاتوودا ئاسایشی کێ خانەقین دەپارێزێت؟

 

شێرکۆ میروەیس: پۆلیسی خانەقین سەر بە حکومەتى ناوەندییە،٤٥٠ پۆلیسمان هەیە و داوا دەکەین ٢٥٠ پۆلیسی ترمان بۆ زیاد بکرێت، واتە دابمەزرێنن بۆ ئەوەى ببێت بە ٧٠٠ پۆلیس، بۆ ئەوەى بتوانن کارەکانیان بە باشی ئەنجام بدەن و هێزەکانى ئاسایشیش بەردەوامن لەکارەکانى خۆیان لە ناو خانەقین.

 

ئەوانەی خەڵکیان کوشت و ئەشکەنجەیان دان، تا چەند لەلایەن حکومەتی عێراقەوە سزادراون؟ ئێوە چ بەدواداچوونێکتان کردووە لەم بارەیەوە؟

 

"ئەوەى کە بە ئاشتى بەدەست دێت بە توندوتیژی بەدەست نایەت"

 

شێرکۆ میروەیس: ئێمە وەک کورد بەدواداچونمان کردووە، ڕاستە یەک دوو خۆپیشاندان لەخانەقین دژ بە هاتنى ئەو هێزانە کرا، ئێمە لەگەڵی نەبووین و ناشتوانم کەس تۆمەتبار بکەم، بەچاوى ڕێزەوە لە جوهدی هەر یەکێک لەوانە ئەڕوانم بۆ ئازادى خەڵک و پاراستنى شارۆچکەکە، بەدەنگى بەرز داکۆکی ئەکەن، بەڵام لەگەڵ ئەوەشدا ئێمە پێمان وایە ئەوەى کە بە ئاشتى بەدەست دێت بە توندوتیژی بەدەست نایەت.

 

 

بارەگای چەند لایەنی سیاسی لە خانەقین ماوە؟ ئەگەر نەماوە، چ گرنگییەکی هەیە حزبەکان بگەڕێنەوە خانەقین؟

 

" تەنها برادەرانمان لە پارتى دیموکراتى کوردستان، پاشکشەیان کردووە"

 

شێرکۆ میروەیس: بارەگاى هەموو هێز و لایەنە سیاسییەکان لە شارۆچکەى خانەقین ماون و لە ئەرکدان، تەنها برادەرانمان لە پارتى دیموکراتى کوردستان، پاشکشەیان کردووە، دۆخەکە وەک جاران ئاسایی بوەتەوە جگە لە پارتی، هەموو لایەنەکان هەن.

 

تا چەند کێشەکانى خانەقین چوونەتە بازنەى ململانێی مەزهەبییەوە؟

 

"هیچ ململانێیەکى مەزهەبی لەخانەقین بەدی ناکەم"

 

شێرکۆ میروەیس: هیچ جۆرە ململانێیەکى مەزهەبی لەخانەقین بەدی ناکەم،٦٠%دانیشتوانى خانەقین، شیعە مەزهەبن، ئەوانی دیکە و سونە مەزهەب و کاکەیین، لە ڕۆژی عاشورادا هەموو مەزهەب و نەتەوەکان پێکەوە شین بۆ ئیمامی حوسێن دەکەن، سونە و شیعە و کاکەیش، هەریەکەیان مەوکبی تایبەتى خۆیان هەیە، لە هەڵبژاردنى ڕابردوودا خانەقین ٧٢ هەزار دەنگدەری تێدابوو، هێز و لایەنە سیاسییە شیعەکان کاندیدیان هەبوو، بانگەشەشیان کرد، لەو ڕێژە دەنگدەرەى خانەقین، هەموو هێزە شیعییەکان نەیانتوانی ٧٠٠ دەنگ بێنن.

 

دەنگۆ هەبوو، سەرۆکى ئەرکانى سوپاى عێراق، ڕازى بوو بە مانەوەى لیوایەکى پێشمەرگە لە سنورەکە، ئەوە تا چەند ڕاستە؟

 

"سەرۆکى ئەرکانی سوپاى عێراق تکای کرد، پێشمەرگە لە شوێنى خۆی بمێنێتەوە"

 

شێرکۆ میروەیس: لیوای ١٠٣ پێشمەرگە لە کۆباشی هەبوو، پێکهاتبوو لەهێزەکانى پارتى و یەکێتى، برادەرانى پارتى بەبڕیارێک کشانەوە بۆ دواوە، ئەوەش کاریگەری سلبی کردە سەر ئەو ژمارەی تری هێزەکەى یەکێتى، لە هەمان کاتیشدا لایەنى عێراقی پابەند نەبوون بەو ڕێکەوتنەى لەگەڵ ئێمە کردیان، لەکاتى شەڕەکەى کەرکوک، سەرۆکى سوپاى عێراق تکای کرد، پێشمەرگە لە شوێنى خۆی بمێنێتەوە، چونکە دۆخى ئەمنى ئەو سنورە ناجێگیرە و دوژمنێکى هاوبەشمان هەیە، بەڵام بەداخەوە، ئەو کەسانەى لەگەڵ سەرۆکى ئەرکانى سوپا پابەند نەبوون بەقسەى سەرۆکى ئەرکانى سوپاوە.

 

باس لە گەڕانەوەى هۆزى کەرەوى دەکرێ بۆ گوڵاڵە، دەشوترێت ئازاری خەڵک دەدەن؟

 

"ئەو هۆزە دەیانەوێت دەستى داعش ڕابکێشنەوە بۆ ناو گوڵاڵە"

 

شێرکۆ میروەیس: بەداخەوە ژمارەیەک لەهاوڵاتیانى عەشیرەتى کەرەوى گەڕاونەتەوە گوڵاڵە، لەچەند ڕۆژى ڕابردوودا زۆر نابەرپرسانە مامەڵیان لەگەڵ هاوڵاتیان کردووە و هەڵسوکەوتى نابەجێیان ئەنجام داوە، ئێمەش دەزگا ئەمنییەکانمان ئاگادار کردووەتەوە، هەندێکیان لێ دەستگیرکراون و بڕیاریشە ئەوانەى تریشیان دووربخرێنەوە، لەبەرئەوەى ئێمە بەهیچ جۆرێک، دەستدرێژی بۆ سەر هاوڵاتیانى گوڵاڵە قبوڵ ناکەین، لەماوەى ڕابردوو و تا ئێستاش، نزیکەى ٧٠ هەزار ئاوارەى ئەو شارۆچکەیەمان گەڕاندوەتەوە، ئێستا ئەندامانى ئەو هۆزە دەیانەوێت بە هەرشێوەیەک بێت دەستى داعش ڕابکێشنەوە بۆ ناو گوڵاڵە و ئاژاوە دروست بکەنەوە.

 

قسە لەسەر گەڕانەوەیەکى لیواى پێشمەرگە دەکرێ بۆ سنوری خانەقین، ئەوەیان تاچەند ڕاستە؟

 

"ماوەتەوە سەر گفتوگۆی سەرکردایەتى یەکێتى و ناوەند"

 

شێرکۆ میروەیس: بەڵێ وایە، گەڕانەوەى لیوایەکى هێزى پێشمەرگە بۆ سنوری شارۆچکەى خانەقین، ماوەتەوە لەسەر گفتوگۆی سەرکردایەتى یەکێتى لەگەڵ حکومەتى ناوەند، بۆ زیاتر هەماهەنگى هەردوولامان بۆ ڕوو بەڕووبونەوەى چەتەکانى داعش، بۆیە هەڕەشەی تیرۆر هەڕەشەیەکى هاوبەشە لەسەر کورد و حکومەتى ناوەند، بۆ ئەوەى دۆخی ئارامى باشتر هەبێ پێویستە هەردوولامان بەرگری بکەین.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin