Smiley face
Smiley face
Smiley face

باشور، تەنیا ١٠ برینداری بومەلەرزەکە لە نەخۆشخانەدا ماون

2017-11-14 15:14:48



ڕۆژنیوز – پەیامنێران

 

لە شار و شارۆچکەکانی باشوری کوردستان بریندارانی بومەلەرزەکە نەخۆشخانەکانیان بەجێهیشتووە و تەنها ١٠ برینداری دەربەندیخان لە نەخۆشخانەی فریاکەوتنی سلێمانی-دا ماون.

 

شەوی ١٢ی ئەم مانگە بومەلەرزەیەکی بەهێز بە گوڕی ٧.٣ بەشێکی زۆری وڵاتانی ڕۆژهەڵاتی ناوەڕاستی گرتەوە و بە هەزاران قوربانیی لێکەوتەوە، لە باشوری کوردستانیش ٨ کەس گیانیان  لەدەستدا، بەسەدان کەسیش برینداربوون و یانیش بەهۆی ترس و بەرزبوونەوەی فشاری خوێنەوە گەیەندرانە نەخۆشخانە.

 

د.میران محەمەد، بەڕێوەبەری گشتی تەندروستی سلێمانی، لەسەر بریندارانی نەخۆشخانەکانی سلێمانی بە ڕۆژنیوزی ڕاگەیاند: لەسەرەتاوە نزیکەی ٨٥ بریندار هێندرانە نەخۆشخانەی فریاکەوتنی سلێمانی لە ئێستادا نزیکەی ١٠ هاوڵاتی، کە خەڵکی دەربەندیخانن لەناو نەخۆشخانەدا ماون، ئەویش بەهۆی ئەوەی کە قاچ و دەست و شوێنێکی جەستەیان بەهۆی بومەلەرزەکەوە شکاوە.

 

هەروەها، د. ئاراس حەمە سەعید، بەڕێوەبەری نەخۆشخانەی فریاکەوتنی هەڵەبجە، بە ڕۆژنیوزی وت: بەهۆی بومەلەرزەکەوە نزیکەی ١٠٠ بریندار گەیەندرانە نەخۆشخانەی فریاکەوتنی هەڵەبجە و هیچ حاڵەتێکی گیان لەدەستدا ڕووی نەدابوو، بەڵام لە ئێستادا هیچ نەخۆشێک لە نەخۆشخانەکاندا نەماون.

 

سەبارەت بە گەرمیان-یش، هەڵگورد حەمە ئەمین جێگری بەڕێوەبەرى نەخۆشخانەى فریاکەوتنى شەهید هەژار لە گەرمیان بە رۆژنیوزى وت: لە سنووری ئیدارەى گەرمیان منداڵێکى تەمەن ١٢ ساڵان و پیاوێکی تەمەن ٨٦ ساڵ گیانیان لەدەستداوە و ١٠ حاڵەتى دەست و قاچ شکان-یش هەبووە و ٨٥ حاڵەتی شۆک و تەنگەنەفەسی و بەرزبوونەوەی فشاری خوێن و بێھۆشی لە کفری و کەلار تۆمارکراوە، بەڵام لە ئێستادا هیچ نەخۆش و بریندارێکى بومەلەرزەکە لە نەخۆشخانەى فریاکەوتنى شەهید هەژار نەماوە و هەموویان نەخۆشخانەیان جێهیشتووە.

 

لە شارۆچکەی خانەقین-ی سەر بە پارێزگای دیالە-ش، ئەو شەوە پێنج بریندار ڕەوانەی بەشی فریاکەوتنی نەخۆشخانەی گشتی خانەقین کرا و هەروەها ٣٠ بۆ ٤٠ هاوڵاتی تر بەهۆی بەرزبوونەوەی فشاری خوێن و ترس لە بومەلەرزەکە، سەردانی نەخۆشخانەیان کرد، بەگوێرەی ئەو زانیارییانەی، کە لە نەخۆشخانەکەوە بە ڕۆژنیوز دراوە، ئێستا هیچ بریندارێک لە نەخۆشخانەکە نەماوە.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin