Smiley face
Smiley face
Smiley face

145 خوێندنكاری ئاوارەی كەركوك و خورماتوو لە خوێندن بێبەشن

2017-11-19 09:49:52



ڕۆژنیوز- هاوكار مستەفا


سەرەڕای تێپەڕبوونی نزیکەی دوو مانگ بەسەر دەستپێكردنەوەی ساڵی نوێی خوێندن، تائێستا 145 خوێندكاری ئاوارەی كەركوك و خورماتوو كە لە كەمپی بەرزنجەی سەر بە شارۆچكەی سەیدسادق نیشتەجێن، نەچونەتەوە بەر خوێندن و مەترسی فەوتانی ساڵێكی خوێندنیان دەكەن.

خوێندكاران و كەسوكاری خوێندكارانی ئاوارەی نیشتەجێی كەمپی بەرزنجەی سەر بەشارۆچكەی سەیدسادق داوكارن کە بە زووترین كات گرفتی نەبوونی خوێندنگایان بۆ چارەسەر بكرێت و ساڵێكی خوێندنییان بە فیڕۆ نەڕوات، بەرپرسانی پەروەردەش باس لە گرفتەكانی نەكردنەوەی خوێندنگای تایبەت بە ئاوارەكان دەكەن.

 


ئەحمەد كەریم، یەكێك لە خوێندكارانی پۆلی دووەمی ئامادەیی كە لە لەكەمپی بەرزنجە نیشتەجێیە بە ڕۆژنیوزی ڕاگەیاند: ئێمە ژمارەیەكی زۆر خوێندكارین كە هەریەكەمان لە قۆناغێكی جیاوازدایە و تا ئێستا كە زیاتر لە مانگێك بەسەر دەستپێكردنەوەی ساڵی نوێی خوێندندا دەستی پێكردووە، بەڵام نەچوینەتەوە بەرخوێندن، ئەگەر هەربەم شێوەیە بەردەوام بێت مەترسی فەوتانی ساڵێكی خوێندنمان هەیە.



 

ئاماژەی بەوەش كرد، داواكارین لەبەرپرسانی حكومەتی هەرێم یان كارئاسانیمان بۆ بكەن بۆ گەڕانەوەمان بۆشوێنەكانی خۆمان یاخود لەم كەمپەشدا بێت بتوانرێت خوێندنگایەكمان بۆ بكرێتەوە و دەست بكەینەوە بە وانە خوێندن، بۆ ئەوەی دوانەكەوین لە پرۆسەی پەروەردە و فێركردن.

نیاز ڕەشید، باوكی سێ‌ خوێندكاری نیشتەجێی كەمپی بەرزنجەیە بە ڕۆژنیوزی وت: سەرەڕای ئاوارەبوونمان بەردەوامی گرفتەكانمان دووركەتنەوە لەماڵ و حاڵمان، لەهەمان كاتیشدا دووركەوتنەوەی منداڵەكانمان لە پرۆسەی خوێندن هێندەی تر نیگەرانی كردوین، چونكە نامانەوێت وەك چۆن خۆمان ماڵوێران بووین، بەو شێوەیەش منداڵەكانمان چارەنوسییان نادریار بێت، بۆیە چەندین جار داوای كردنەوەی خوێندنگامان كردووە، بەڵام هیچ كەسێك نەهاتووە بەدەممانەوە.

 


ئەوشی وت: چەند ڕۆژێك لەمەوبەر لیژنەیەك هاتن سەردانی كەمپەكەیان كرد و سەرژمێری خوێندكارەكانیان كرد، بۆ ئەوەی ڕێگاچارەیەك بدۆزنەوە بۆ نەفەوتانی خوێندنی ئەو خوێندكارانەی كە لەكەركوك و ناوچەكانی ترەوە ئاوارەبوون و لەم كەمپە نیشتەجێن، بەڵام تائێستا دیارنییە چارەنووسی منداڵەكانمان چی بەسەردێت.

لای خۆیشیەوە، یاسن عەلی، سەرپەرشتیاری یەكەمی پەروەردەیی لە بەڕێوەبەرایەتی پەروەردەی شارۆچكەی سەیدسادق، بە ڕۆژنیوزی ڕاگەیاند: بە گوێرەی ئەو سەرژمێرییانەی كە لە كەمپی بەرزنجە كردومانە، بۆمان دەركەوتووە كە 145 خوێندنكار لە پۆلی یەك تا پۆلی 12 ی ئامادەیی هەن، بەڵام گرفتەكە لەوەدایە كە هەموو ئەم خوێندكارانە لەیەك جۆر خوێندنگا نەیان خوێندووە، بەڵكو هەندێكیان خوێندنی كوردییان هەبووە و هەندێكیان عەرەبی، ئەمەش كارێكی وا ئاسان نییە بۆ ئێمە مامۆستایان بۆ دابین بكەین.

 


ئاماژەی بەوەش كرد، لەڕووی بینای خوێندنگاوە هیچ كێشەیەكمان نییە، لەناو شارەدێی بەرزنجە خوێندگایەكی گونجاومان هەیە، بەڵام گرفتمان لە كەمی میلاكی مامۆستایە كە لە توانای ئێمەدا نییە مامۆستایان بۆ دابین بكەین، بۆیە بە نووسراوی فەرمی بەڕێوەبەرایەتی گشتی پەروەردەی سلێمانیمان لەو گرفتە ئاگاداركردوەتەوە، ئەوانیش لای خۆیانەوە ڕێكخراوی یونیسێف یان ئاگادار كردووە بۆ دامەزراندنی ژمارەیەك مامۆستا بۆ ئەو ئاوارانە بەشێوەی گرێبەست.

ئەو سەرپەرشتیارەی بەرێوەبەرایەتی پەروەردەی سەیدسادق ئەوەشی خستەڕوو، ئێمە زۆر هەوڵماندا كە لەناو خودی ئاوارەكاندا بتوانین مامۆستایان بۆ دابین بكەین، بەڵام هیچ كەسێكی تێدا نەبوو توانای وتنەوەی وانەی هەبێت، بۆیە چاوەڕێی ڕێكخراوە نێودەوڵەتییەكان دەكەین کە گرفتەكەمان بۆ چارەسەر بكەن و ژمارەیەك مامۆستامان بۆ دابمەزرێنن، بۆئەوەی ساڵێكی خوێندنی ئەو خوێندكارانە بە فیڕۆ نەڕوات.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin