Smiley face
Smiley face
Smiley face

شەقامی شەست مەتریی شاری سلێمانی بازاڕێک بۆ فرۆشتن و کڕینی ماسی

2017-11-19 12:50:36



ڕۆژنیوز – ڕێزان محەمەد

 

شەقامی شەست مەتریی شاری سلێمانی بووەتە بازاڕێک بۆ فرۆشتنی ماسی و لە بەرەبەیانەوە تا کاتژمێرەکانی شەو کڕیاران و فرۆشیارانی ماسی لەو شەقامە دەبیندرێن.

 

ئەگەر بە شەقامی شەست مەتریی شاری سلێمانی-دا تێپەڕیت، لە قەراغ شەقامەکە چەندین ئۆتۆمبێلی جۆری پیکاپ دەبینیت، کە بە ڕیزی یەکدا ڕاگیراون و حەوزی ماسییان تێدایە و کڕیاریارانی ماسی-ش لەدەوری ئۆتۆمبێلەکان کۆبوونەوەتەوە.

 

 

لەم ڕاپۆرتەی ڕۆژنیوزدا ژمارەیەک لە ماسی فرۆش و کڕیارانی ماسی زانیاریی لەبارەی کارەکە و جۆر و تامی ماسی دەخەنەڕوو.

 

فەرهەنگ عەتا-ی تەمەن ٢١ ساڵ ماوەی زیاتر لە دوو ساڵە ڕۆژانە لە کاتژمێر ٧ی سەر لە بەیانیەوە لە خەو هەڵدەستێت و بەرەو شەقامی ٣٠ی مەتریی بەڕێدەکەوێت تاوەکو لەلای ئەو دوکانەی کە ڕۆژانە ماسی لێدەکڕێت ماسی دەستبکەوێت و بیبات لە شوێنی هەمیشەیی خۆی لە بەرامبەر نەخۆشخانەی شار بیفرۆشێت.

 

 

فەرهەنگ، لە کاتژمێر ٣٠: ٨  یان٩:٠٠ی سەر لە بەیانی دەگاتە شەقامی بەردەم نەخۆشخانەی شار و کەلوپەلەکانی دادەنێت، کە پێکهاتوون لە مێزێک و ماسی و کێشانە و چادر و دەست بە کارەکانی دەکات.

 

 

ئەو جۆرە ماسیانەی کە لەلای فەرهەنگی ماسی فرۆش دەست دەکەوێت بریتین لە ماسی سورە و کارب و سەلەمون و قاشنە، فەرهەنگ دەڵێت: ماسی سەلەمون ئێرانیە و دڕکی تێدانییە، ماسی کارب بۆ برژاندن زۆر خۆشە و لە هەموو جۆرە ماسییەکانی دیکە زیاتر دەفرۆشرێت، وە ماسی سورە و ماسی سەلەموون گرانترین جۆری ماسی-ن.

 

 

گەورەترین ماسی، کە لەلای ئەو ماسی فرۆشە دەست دەکەوێت بریتیە لە ماسی ٦-٧ کیلۆیی، فەرهەنگ دەڵێت: خەڵک زیاتر حەزیان لە ماسی بچوکە کە کیلۆکانیان نزیکەی ٢-٣ کیلۆ بێت، ئێمە لێرە پاکیشی دەکەین، بە جۆرێک یەکسەر حازر بێت بۆ برژاندن، هەروەها ماسی حەوز خەڵک زیاتر دەیکڕێت وەک لە ماسی ڕووبار، چونکە هەرزانترە، بەڵام وەک تام ماسی ڕووبار خۆشترە.

 

لە وەرزە ساردەکاندا کڕیاری ماسی زۆر دەبێت و وەک فەرهەنگ خۆی دەڵێت، کڕیارەکاندا دوو هێندە زیاد دەکات، چونکە لە سەرمادا خەڵک زیاتر حەزیان لە خواردنی ماسی-یە.

 

 

فەرهەنگ، ئاماژەی بەوەشدا، کە لای ئێواران خەڵک زیاتر سەردانیان دەکەن بۆ کڕینی ماسی و ڕۆژانەش نزیکەی ١٠٠ کیلۆ یاخود ٨٠ کیلۆ ماسی دەفرۆشن، بەڵام لە ڕۆژانی پێنج شەمە و هەینی زۆرترین ماسی دەفرۆشن.

 

بەختیار ڕەشید، کە باوکی چوار منداڵە و کڕیاری هەفتانەی فەرهەنگ-ی ماسی فرۆشە، وەک خۆی باسیکرد، هاوسەرەکی زۆر حەزی لە ماسی-یە و ماسییەکەش بە دار دەبرژێنن و دەیخۆن.

 

 

سەبارەت بە جۆری ماسی-یەکان-یش، بەختیار، وتی: حەزم زیاتر لە ماسی کارب-ە، بەلەزەتە و بۆ برژاندن خۆشە.

 

دانەر فەرید، فرۆشیارێکی دیکەی ماسیە و ماوەی پێنج مانگە لە شەقامی شەست مەتریی ئەو کارە دەکات، دانەر چەند زانیارییەکی لەبارەی تامی ماسییەوە ئاشکرا کرد و وتی: ماسی هەیە تامی خۆڵ دەدات، بەهۆی ئەو عەلەفەی کە دەدرێت بە ماسییەکە، بۆیە دەبێت سەرەتا پشکنین بۆ ماسییەکە بکەیت، لەڕێگای بۆنکردنی گوێچکەکانی ماسییەوە، پاشان بیدەیت بە کڕیارەکە، بۆئەوەی لێی ڕازیی بن.

 

 

ئەو ماسی فرۆشە، دوای ١٢ کاتژمێر لە کارکردن و لە کاتژمێر ٨ی شەو بە ماندوێتی بەرەو ماڵەوە ملی ڕێگا دەگرێتەبەر و بە چوونەوە ناو خێزانەکەی ماندوێتی ڕۆژی بیرەچێتەوە.

 

 

ش.ف

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin