Smiley face
Smiley face
Smiley face

لە قەسری شیرین ئاوی خواردنەوە نەماوە و هاوڵاتیان لە شەقامەکان دەژین

2017-11-20 09:32:32



ڕۆژنیوز - قەسری شیرین

 

شارۆچکەی قەسری شیرین-ی سەربە پارێزگای کرماشان، یەکێکە لەو ناوچانەی کە بەهۆی بومەلەرزەکەی ١٢ی ئەم مانگەوە، زیانێکی زۆری گیانی و ماددی لێکەوتووە، ئێستاکەش ئاوی خواردنەوە لەو شارۆچکەیەدا نەماوە.

 

لەو رۆژە بەدواوە تا ئێستاش، ڕۆژانە بومەلەرزە قەسری شیرین دەهەژێنێت، بەڵام بە پلەی کەمتر لەوەی ١٢ی مانگ، هەر ئەوە بووەتە هۆکاری ئەوەی هەزاران کەس لەسەر شەقامەکان و دوور لە ماڵەکانیان بژین.

 

گەنجێک لە قەسری شیرین کە نەیوسیت ناوی ئاشکرا بکرێت، بۆ ڕۆژنیوز دواو، وتی: لێرە خانووەکان کەم ڕووخاون، لە دەرەوە سەیری خانووەکان دەکەیت بەپێوەن، بەڵام لە ژوورەوە هەمووی تێکچووەو شیاوی ژیان نین، بۆیە کەس ناوێرێت بچێتە ماڵەوە.

 

ئێستا تەواوی هۆتێلەکانی شارۆچکەکەش داخراون، تەواوی تۆڕی ئاوی خواردنەوە تێکچووە، هۆکاری ئەمانەش بوومەلەرزەکەی ١٢ی ئەم مانگە بووە.

 

 

لەبارەی قوربانیانی ئەو شارۆچکەیە، هاوڵاتییەک بە ڕۆژنیوزی وت: لەناو شارۆچکەکەدا تەنها شەش کەس مردوون، گوندەکانی سەربە قەسریش ٢٢ کەس مردوون، بەگشتی ٢٨ کەس گیانیان لەدەستداوە و سەدان کەسیش بریندار بوون.

 

هاوڵاتیانی ئەو شارۆچکەیە لەبارەی هۆکاری بەجێهێشتنی ماڵەکانیان، جگە لەوەی تێکچوونی خانووەکانیان بە هۆکار دەزانن، هاوکات دەشڵێن: بەشی بومەلەرزەزانی زانکۆی تاران ڕایگەیاندووە کە پێویستە هاوڵاتیان بۆ ماوەی سێ مانگ خۆیان بپارێزن، باسی لەوەش کردووە کە دوای بومەلەرزەکەی ١٢ مانگ، هەموو ١٣ خولەک جارێک بومەلەرزەیەکی دیکە هاتوەتەوە، هاوکات کارەساتی ساڵانی پێشووی شاری بەم لە ئێران وەبیر دێننەوە کە پێش ١٥ ڕۆژ لە کارەساتەکە، بوومەلەرزە لێی داوەو هێزی زۆر نەبووە، بەڵام دواتر خەڵک گەڕاوەتەوە ماڵەوە، کەچی دواتر جارێکیتر شارەکە بوومەلەرزە لێی داوە و دەیان هەزار کەس گیانیان لەدەستداوە، هەربۆیە لە شەقامەکاندا ڕۆژ دەکەینەوە.

 

 

ڕۆژانە هەزاران کەس لەبەردەم مانگی سوری ئێران لە چاوەڕوانی وەرگرتنی چادر و بەتانیدا دەوەستن، بەهۆی ئەوەی سوپای پاسداران سەرپەرشتی دابەشکردنی هاوکارییەکان دەکات، بەردەوام شەڕ و ئاڵۆزیی لەنێوان قوربانیان و سوپای پاسداراندا ڕوودەدات، هەربۆیە هاوڵاتیان ئاماژەیان بەوە دەکرد، ئەوەی بەباشی بگاتە دەست ئەوان تەنها هاوکاری مرۆڤ دۆستانەی گەلی کورد و گەلانی ئێرانە.

 

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin