Smiley face
Smiley face
Smiley face

بەرپرسێک: هیچ پارەیەک بۆ چاککردنەوەی سیمبۆلەکەی گەرمیان نەگەیشتووە

2017-11-20 10:28:36



ڕۆژنیوز ـ هاوڕێ کرێکار

 

بەرپرسێکى شوێنەواری گەرمیان ڕایدەگەیەنێت، تا ئێستا هیچ بڕە پارەیەک نەگەیشتوەتە دەستمان بۆ نۆژەنکردنەوە و چاککردنەوەى زیانەکانى قەڵاى شێروانە، تەنها بەڵێن دراوە و هیچی تر.

 

دوای ئەوەی لە بومەلەرزەکەی شەوی ١٢ی ئەم مانگە، قەڵای شوێنەواریی شێروانە لە شاری کەلاری ناوەندی ئیدارەی گەرمیان، تووشی داڕووخان بوو لە بەشی سەرەوەی قەڵاکە، تا ئێستا هیچ برە پارەیەک بۆ چاککردنەوەی ئەو شوێنەوارە تەرخان نەکراوە.

 

 

ساڵەح محەمەد سەمین، جێگری بەڕێوەبەری بەڕێوەبەرایەتى شوێنەواری گەرمیان، بۆ ڕۆژنیوز وتى: لە بومەلەرزەکەى شەوی یەکشەمەى ڕابردوو، قەڵاى شێروانە زیانى زۆری پێگەیشتووە و بوەتە هۆی داڕمان و تێکچوونى نهۆمى سێیەمى قەڵاکە، کە بە کلاوە فەرهەنگى ناسراوە.

 

 

هەروەها وتیشی: ئیستا سەرقاڵی ئەوەین دەیهێنینە خوارەوە بۆ ئەوەى زیانى تر بە قەڵاکە نەگەیەنێت لەکاتى بومەلەرزەى تردا، هەروەها نهۆمى یەکەم و دووەمیش زیانى زۆری پێگەیشتووە بەتاییەت قۆڵەکانى، کە دەبنە هۆی ڕاگرتنى قەڵاکە.

 

ساڵەح محەمەد، وتیشی: ئێستا سەرقاڵی پاککردنەوەى قەڵای شێروانەین بۆ ئەوەى دواى پاککردنەوەى بزانین کۆی گشتى زیانەکان چەندە تا دەرخستەیەک بۆ زیانەکانى ئامادە بکەین، تا لەگەڵ ئیدارەى گەرمیان و لایەنە پەیوەندیدارەکان بتوانین پێکەوە کار بۆ نۆژەنکردنەوەى قەڵاى شێروانە بکەین، قەڵاکە پێویستى بە پارەى زۆر و ئەندازیاری باش هەیە بۆ نۆژەنکردنەوە .

 

 

هەروەها ناوبراو باسی لەوەشکرد، ئەو شوێنەوارە مێژوویانەى وەک قەڵاى شێروانە بینان و بە پێوەن لە سنوری ئیدارەى گەرمیان، زیانیان پێگەیشتووە، بەڵام وەک زیانەکانى قەلا نییە، هەروەها شوێنەوارەکانى تری گەرمیان زیانیان بەرکەوتووە، بەڵام زیاتر درزیان بردووە.

 

جێگری بەڕێوەبەرى بەڕێوەبەرایەتى شوێنەواری گەرمیان، ئاماژەى بەوەش کرد، بەڕێوەبەرایەتى گشتیى شوێنەوار لە هەولێر و بەڕێوەبەرایەتى گەشتوگوزاری گەرمیان لە یەکەم ساتى بومەلەرزەکەوە لەگەڵمانن، ئامادەییان بۆ هەموو هاوکارییەکان پێشانداوە بۆ قەرەبووکردنی زیانەکانى قەڵاى شێروانە.

 

 

ساڵح ئەوەشی خستەڕوو: شاندێک لە نووسینگەى سەرۆکى ئەنجومەنى وەزیرانى عێراق سەردانى قەڵاى شێروانەیان کرد و بەڵێنیاندا هەوڵی جدی بدەن بۆ دابینکردنى بودجەی تایبەت و خەڵکى شارەزا لە بواری شوێنەوار بۆ نۆژەنکردنەوە و چاککردنى زیانەکانى قەڵاى شێروانە، بەڵام تا ئێستا لە هیچ جێگایەکەوە، هیچ بڕە پارەیەکمان بەدەست نەگەیشتووە بۆ دەستپێکردنی چاککردنەوەى قەڵاى شێروانە.

 

لە بومەلەرزەکەى شەوی ١٢/١٣- ١٠، قەڵاى شێروانە لە شارۆچکەى کەلاری ناوەندى ئیدارەى گەرمیان، زیانێکى زۆری بەرکەووتوو و تاکە شوێنەواری مێژووییە لە باشور بە هۆی ئەو بومەلەرزەوە زیانى زۆری پێگەیشتبێت.

 

د.خ

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin