Smiley face
Smiley face
Smiley face

پژاک: ئەو داستانەی لە ڕۆژهەڵات خوڵقاوە پیشاندەری یەکڕیزی جەماوەرە

2017-11-20 11:11:43



ڕۆژنیوز - ناوەندی هەواڵەکان

 

پژاک لە ڕاگەیەندراوێکدا ڕایگەیاند، گەلی کورد لە ڕۆژهەڵاتی کوردستان بە یەکدەنگی و یەکڕیزی داستانیان خوڵقاندو سەلماندیان، کە تاکە ڕێگای سەرکەوتن یەکێتی و یەکدەنگی گەلانە.

 

پارتی ژیانی ئازادی کوردستان- پژاک، لە بارەی یەکڕیزی و یەکدەنگی گەلی کورد لە ڕۆژهەڵاتی کوردستان بۆ هاوکاریکاردنی لێقەوماوانی بوومەلەرزەکە، ئەمڕۆ ڕاگەیەندراوێکی بڵاوکردەوە.

 

پژاک ڕایگەیاند: ڕووداوی دڵتەزێنی بوومەلەرزەی کرمانشان هەتاکو دێت گۆشە نادیارەکانی خۆی دەردەخات و لە زۆر بوارەوە ڕومەتی نگریسی ئەم سیستەمە لە بەرامبەر گەلی چەوساوەمان پێشان دەدات، بۆ کەس شاراوە نەبووە کە دەستەڵاتدارانی ئێران بۆ دژایەتی گەلانی ناوچەکە بە تایبەت گەلی کورد هەمو یارییەکی سیاسی و مەدەنی و ئابوری و کۆمەڵایەتیان بە کار هێناوە، کە ئیرادەیان تێک بشکێنێت و تەسلیمیان بکات، و ئێستاش بەردەوام دەبینین بۆ پەرەپێدانی دوکتورینی سیاسەتی دەرەوەی سنورەکانی بە میلیار خەرج دەکات و لە چارەنوسی گەلانی چەوساوەی ئێران خۆ بە بەرپرس نازانێت.

 

لە بەردەوامیدا ڕایگەیاند: کوردستان سەرەڕای ئەم هەموو نەهامەت و هێرشانەی کە لە لایەن سیستمی کۆماری ئیسلامی ئێرانەوە پەیڕەو دەکرێت بۆ بێ ئیرادەکردنی گەل، بەڵام لەم ڕووداوە دڵ تەزێنەی بوومەلەرزەی کرماشان گەل نیشانیان دا کە زاگڕۆس نشینان بەردەوام بە ئیرادەوە لە سەر پێیە و ڕۆحی شۆڕشگێڕیی و هاوکاری لەم کەلتورەدا لە بن نەهاتووەو لە پڕاتیک دا ئەم وانەیان بە حکومەت و سیستم دایەوە، کە گەل ئیرادەیە و ئیرادەی گەلیش داستان دەخوڵقێنێت و کارەسات دەکەنە دەستکەوت، ئەم داستانەی لە ڕۆژهەڵاتی کوردستان خوڵقاوە پیشاندەری یەکڕیزی جەماوەرەو بینیمان بە یەکڕیزی ئیرادە دەخوڵقێت و بە ئیرادەش هەمو کارێک دەکرێت.

 

لە بەشێکی دیکەشدا پژاک ڕایگەیاند:"ئەم ڕوداوە ماڵوێرانکەرە پێشانی دا کە حکومەتی داگیرکەری ئێران هیچ بەهایەک بۆ خەڵک دانانێت و ئەوەی بۆی گرنگ نەبێت خەڵکی لێقەوماوە، بەڵام بینیمان بە دەستپێشخەری گەلی تێکۆشەری کورد و پێشەنگی کردنی بۆ کۆکردنەوەی پێداویستیەکان هەڵمەتێکی بەرفراوانی دەستپێکرد و لە ماوەیەکی کورت دا سەرەڕای هەموو ئاستەنگییەکانی سوپای پاسداران و دەست و پەیوەندیەکانیان ئەم یارمەتیانەیان ئۆرگانیزەکردو گەیاندە دەستی خەڵک و سەرکەوتوانە بەهانای ئەو خەڵکەوە چوون، هاوکات ئەوەش پیشان درا کە گەلانی ناوچەکە هەموو یەک ئێش و ئازاریان هەیە و بەپێی دەرفەت لە هەموو ناوچەکانی ئێران یارمەتی کۆکراوەی گەل گەیشتە دەستی لێقەوماوانی ئەو کارەساتە، هەڵویستی گەلانی تریش لە بەرامبەر لێقەوماوانی بوومەلەرزەی سەرپێڵ زەهاو و کرمانشان، هەنگاوێکی مرۆڤانە و جێگای ڕێزە.

 

لە کۆتاییدا پژاک ئاماژەی بە چەند خاڵێک داوەو ڕایگەیاندووە: ئەو ڕووداوە سەلماندی کە گەلانی پەراوێزخراو دەتوانن پشتی یەکدی بگرن و بە هەمووانی بسەلمێن کە یەکڕیزی و یەکدەنگی تەنیا ڕەمزی سەرکەوتنە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin