Smiley face
Smiley face
Smiley face

"دەبێت نەهێڵین گەلەکەمان چاوی لە دەستی دوژمن بێت"

2017-11-21 15:27:49



ڕۆژنیوز - ئوموت و دجلە

 

ئەندامێکی کۆردیناسیۆنی کژار، ڕەخنە لە سیاسەتی ئێران دەگرێت بەرامبەر لێقەوماوانی بومەلەرزەکە و دەڵێت، کە دەوڵەت دەیەوێت گەل چاوی لەدەستی ئەو بێت و بومەلەرزەکە بۆ مەرامی سیاسیی بەکار دەهێنێت، ئەندامێکی پژاک-یش دەڵێت:"دەبێت نەهێڵێین گەلەکەمان چاوی لە دەستی دوژمن بێت".

 

دیلان جودی، ئەندامی کۆردیناسیۆنی کۆمەڵگەی ژنانی ئازادی ڕۆژهەڵاتی کوردستان (کژار) و شەروین مەزلوم، ئەندامی ئەنجومەنی پارتی ژیانی ئازادی کوردستان (پژاک)، سەبارەت بە بومەلەرزەکەی ڕۆژهەڵاتی کوردستان بۆ رۆژنیوز دوان و سەرەخۆشیان بۆ بنەماڵەی قوربانیان نارد و هیوای چاکبوونەوەی بە پەلەیان بۆ برینداران خواست.

 

دیلان جودی، ئەندامی کۆردانسیۆنی کژار وتی: لە بومەلەرزەکەدا گەلی کورد خۆی بەهانای گەلی خۆیەوە چوو، ئەوەش مانای ئەوەیە، کە گەل خۆی برینی خۆی دەپێچێت.

 

 

جودی، سەبارەت بە سیاسەتی جیاکارانە و مەزهەبپەرستیی ئێران لەبەرامبەر خەڵکی کرماشان قسەی کرد و ڕایگەیاند:"گەلێک گوندی کرماشان لەگەڵ زەوی یەکسان بوون، بەڵام دەوڵەتی ئێران وەکو ئەوە لەو بابەتە نزیک دەبێتەوە کە هیچ شتێک نەبوبێت".

 

 لە بەردەوامیی قسەکانیدا، دیلان جودی، سەرنجی ڕاکێشایە سەر لێدوانەکانی بەرپرسانی ئێران، کە وتیان "پێویستمان بە هاوکاریی کەس نییە" و وتی: دەوڵەت دەیەوێت گەل چاوی لەدەستی ئەو بێت، بەخۆیەوە گرێی دەدات، بومەلەرزەکە بۆ مەرامی سیاسی بەکاردەهێنێت، پێویستە گەلەکەمان هۆشیار بێت، دەوڵەت دەست بەسەر ئەو هاوکارییانەدا دەگرێت کە لەلایەن خەڵکەوە دەنێردرێنە ئەوێ، دواتر هەر ئەو هاوکارییانەی لە لایەن گەلەوە ڕەوانە کراوە، بەناوی خۆیانەوە دابەشی دەکەن، هەوڵ دەدەن گەل بخەڵەتێنن، ئەو جۆرە سیاسەتەش، خۆی لەخۆیدا زوڵمێکە.

 

هەروەها، شەروین مەزڵوم، ئەندامی ئەنجومەنی پژاک وتی:"دەوڵەتی ئێران لەکاتی دابەشکردنی هاوکارییەکاندا بێرێزیی بە گەل دەکات و لێیان دەدات، پێویستە گەلەکەمان نەدرێتە دەست ویژدانی ئێران، دەوڵەت کە شتێک دەداتە گەل منەت دەکات".

 

 

شەروین مەزڵوم، وتیشی:"ئەو هاوکارییانەی لەلایەن پارچەکانی دیکەوە کۆکراونەتەوە ئاستەنگ دەکرێن، ئەمە هەڵوێستێکی دژ بە مرۆڤایەتییە، بێ ویژدانیی و بێ ئەخلاقی-یە  لە بەرامبەر لێقەوماوانی بومەلەرزە، دەبێت ئێمە لە دژی ئەو سیاستەی ئێران یەکبگرین و برینەکانی خۆمان ساڕێژ بکەین، دەبێت خاوەنداریی لە یەکتر بکەین و نەهێڵین گەلەکەمان چاوی لە دەستی دوژمن بێت".

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin