Smiley face
Smiley face
Smiley face

شێركۆ میروەیس: داعش لە سنووری خانەقین دەستی بەجوڵە كردووە

2017-12-07 09:15:27



ڕۆژنیوز - سۆران و دانا

 

ئەندامێكی سەركردایەتی یەكێتی، كە هاوكات بەرپرسی مەڵبەندی خانەقینی یەكێتییە ڕایدەگەیەنێت، كە داعش لە سنوری خانەقین دەستی بە جوڵە كردووە، دەشڵێت: هەموو لایەنە كوردییەكان دەبێت لەوە تێبگەین دۆخی پێش ڕیفراندۆم زۆر جیاوازە لە دۆخی دواتری.

 

شێركۆ میروەیس، ئەندامی سەركردایەتی یەكێتی نیشتیمانی كوردستان و بەرپرسی مەڵبەندی خانەقینی یەكێتی، لەم چاوپێكەوتنەی ڕۆژنیوز-دا وەڵامی چەند پرسێكی دەداتەوە، لەبارەی ڕەوشی خانەقین لەدوای ڕووداوەكانی 16ی ئۆكتۆبەر و كشانەوەی هێزی پێشمەرگە لە خانەقین و هاتنی حەشدی شەعبی و هێزە عێراقییەكان بۆ خانەقین، هەروەها باس لە جێهێشتنی شارۆچكەكە لەلایەن پارتییەوە، لەگەڵ چەند پرسێكی گرنگی تر.

 

دەقی چاوپێكەوتنەكە:

 

ئێستا کێ خانەقین‌ بەڕێوە دەبات؟

 

"لەڕووی سیاسییەوە ئێمە لێرەین"

 

شێركۆ میروەیس: خانەقین لەڕووی ئیدارییەوە قائیمقامی خانەقین بەڕێوەی دەبات، لەڕووی سیاسی-شەوە ئێمە وەك مەڵبەندی یەكێتی نیشتیمانی كورستان لێرەین و ئیدارەی كاروبارەكان دەكەین.

 

لە كاتی هاتنی حەشدی شەعبیدا، تا چەندە پێشێلکاری ئەنجام دراوە؟

 

"حەشدی شەعبی نەهاتووەتە ئەم شارە"

 

شێركۆ میروەیس: بە پێچەوانەوە هیچ پێشێلكارییەك نەكراوە و نەمبیستووە، لە دۆخی نائاسایدا هەندێك كێشە ڕوودەدات، بەڵام بەراورد بە ناوچە دابڕاوەكانی تر دۆخەكە لە خانەقیندا ئاساییە و كێشە نییە، حەشدی شەعبی نەهاتوونەتە ئەم شارە.

 

لە ناو خانەقیندا ئەمنیەت بە دەست حەشدی شەعبییەوەیە یان هێزی عێراق یان پێشمەرگە؟

 

شێركۆ میروەیس: پێش ئەو ڕووداوانەش ئەمنیەتی شار بەدەست پۆلیسی خانەقین و هێزی ئاسایشەوە بووە، لەدوای ڕووداوەكان ئاسایش بۆ ماوەیەك لە ئەركەكانیان وەستان، بەڵام پۆلیسی خانەقین هەر لە ئەركدا بوون، كار لەسەر ئەوە دەكەین كە ئاسایش لە چەند ڕۆژی داهاتوودا دەست بەكار بكەنەوە.

 

"لیژنەی هاوبەشمان دروستکردووە"

 

 

وتیشی: ئێمە لەدوای ئەو دۆخە تازەیەی خانەقین لیژنەیەكی باڵای ئەمنیمان دروست كرد، كە پێكهاتوون لە بەڕێوبەری ژوری عەمەلیات و بەڕێوبەرایەتی پۆلیسی دیالە و لایەنە ئەمنییەكان و تەنانەت ئاسایش و پۆلیسی خۆشمانی تێدایە، لەوێ‌ هەڵسەنگاندن بۆ دۆخەكە دەكەین و لەوێ‌ بڕیار دەدەین، هەروەها لەوێ‌ هەوڵدەدەین هەماهەنگی زیاتر بكەین.

 

بۆچی پارتی لە خانەقین دەرچووە؟

 

"پارتی لە خانەقین کار دەکات"

 

شێركۆ میروەیس: ئەوەندەی من ئاگاداربم پارتی وەك بارەگا لە خانەقین بوونیان نییە، ئەگینا ئەندامان و كادیرانی پێشكەوتوویان لێرە بوونیان هەیە و پەیوەندیمان لەگەڵیان هەیە و كار دەكەن، هاتنەوەیان یان مانەوەیان بەم شێوەیە پەیوەندی بە سەركردایەتی خۆیانەوە هەیە.

 

پارتی و میدیاکانی دەڵێن دۆخی ئەمنی خانەقین تەواو نییە بۆیە ناگەڕێنەوە، لەم ڕووەوە سەرنجات چییە وەک حزبێک کە هاوپەیمانیتان لەگەڵیان هەیە؟

 

"میدیاکانیش وەک حزبەکانیانن"

 

شێركۆ میروەیس: كەناڵەكانی ڕاگەیاندن بەشێوەیەكی گشتی لە دوورەوە باس لە دۆخی ناوچە دابڕاوەكان دەكەن، كەمیان لێرە نووسینگەیان هەیە و ڕووداوەكان وەك خۆی دەگوازنەوە، هەوەها هەر میدیایە و وەك حزبەكەی خۆی ڕووداوەكان دەبینێت، بۆیە حزبەكان پێش ئەوەی ڕاگەیاندنەكانیان ئاڕاستە بكەن با بزانن ئێمە لە چ دۆخێكداین، لە ئێستادا پێویستمان بە هەماهەنگی زیاتر و كاری پێكەوەیی زیاتر هەیە، پێویستمان بەوەیە لاپەڕەیەكی نوێی هەڵبدەینەوە.

 

"ئەو دەستکەوتانەی کە ماون لە مەترسیدان"

 

وتیشی: چۆن دۆخی عێراق پێش هاتنی داعش جیاواز بوو لە دۆخی عێراق دوای هاتنی داعش، ئێمەش ئەبێت تێبگەین، دۆخی كوردستان پێش ئەنجامدانی ڕیفراندۆم و دوای ئەنجامدانی ڕیفراندۆم دوو دۆخی جیاوازە، بۆیە پێویستە پێداچوونەوە بە سیاسەتی خۆماندا بكەین و هەماهەنگی زیاتر بكەین، چونكە ئەو دەستكەوتەی كەماویشمانە مەترسی لەسەرە، بۆ ئەوەی قەبارەی ئەو زیانە كەمبكەینەوە كە ڕووبەڕوومان دەببێتەوە، پێویستمان بەوە نییە كە دژایەتی یەك بكەین و دۆخی ئەمنی لەیەك تێك بدەین.

 

لە سنووری  خانەقیندا چەند دەروازەی سنووری هەیە لەگەڵ ئێراندا، كێ‌ بەڕێوەیان دەبات؟

 

"ئەوەی کراوەیە بەدەست بەغداوەیە"

 

شێركۆ میروەیس: لە سنووری خانەقین دوو دەروازەی سنوری هەیە، دەروازەی پەروێزخان كە لەدوای ڕیفراندۆمەوە تاوەكو ئێستا داخراوە، وە دەروازەی سنوری مونزریە-یە، کە پێش ڕووداوەكان حكومەتی عێراق بەڕێوەیبردووە، وە ئێستاش هەر ئەوان بەڕێوەی دەبەن.

 

لە خانەقین كۆمەڵَك نەتەوەی جیاواز و مەزهەبی جیاواز هەیە، پێكەوە ژیان لە خانەقین چۆنە لەنێوان پێكهاتەكاندا؟

 

"ئاین و نەتەوەکەیان پێکەوە دەژین"

 

شێركۆ میر وەیس: ئەوە بەشێكە لە كلتوری ناوچەكە، پێكەوە ژیان لە خانەقین مێژوویەكی هەیە، ئەوەی پەیوەندی بە عەرب و تورك و كوردەوە هەیە پەیوەندیەكی زۆر باشە، وە پێكەوە ژیانی ئاینەكان وەك كاكەیی 'ئیسلام و و شیعە و سوننە'، زۆر باشە، لە بۆنەكانی یەكتردا ئامادە دەبین و پەیوەندی بەهێزمان لەگەڵ یەك هەیە، لە دوای ئەو دۆخەش پەیوەندیەكان وەك خۆی ماوەتەوە.

 

دەوترێت ئەو عەرەبانەی دوای ٢٠٠٣ خانەقینیان جێهێشتبوو ئێستا دەگەڕێنەوە خانەقین، ئەوە تا چەند ڕاستە؟

 

"پێویستە هەرێم و بەغدا هەماهەنگی بکەن"

 

شێركۆ میروەیس: جوتیاری كورد هاوەكو ئێستا لەسەر زەوی و زاری خۆیەتی، ئێمە لە سنوری خانەقین ٨٣ گوندمان هەیە، ئەگەر لە گوندێك یان دوو گوند حاڵەتێك ڕوویدابێت ناتوانین بڵێن لە هەموو خانەقین وایە، هەرچەند نەمان هێشتووە ئەو چەند حاڵەتەش تێپەڕێت، بەڵام پێویستە سەركردایەتی سیاسی كورد و بەغدا پێداگری لەسەر هەماهەنگی و كاری پێكەوەیەی بكەن.

 

چەند ڕۆژ پێش ئێستا دوو هاوڵاتی لە خانەقین ڕفێندران، ماوەیەك بەر لە ئێستا دوو كادیری یەكێتی تیرۆر كران، ئەم ڕووداوانە چۆن ڕوویان دا؟

 

"جموجوڵی داعش زیادی کردووە"

 

شێركۆ میروەیس: بۆشاییەكی ئەمنی زۆر دروست بووە، لەبەر ئەوەی ماوەی پێشوو ڕێگە نەدرا هێزی ئاسایش ئەركەكانیان پێك بهێنن، جموجۆڵی داعش زۆر زیادی كردووە لە سنورەكە، بەشێكی زۆری ئەو تاوانبارانەی كە داواكراو بوون ئێستا گەڕاونەتەوە سنورەكە، ئەم جموجۆڵانە لە سنوری خانەقین و حەوزی حەمرین بوونیان هەیە، بەرنامەمان هەیە بۆ ئەوەی ڕێگری لێبكەین.

 

"ئەمانە زەنگی مەترسیدارن"

 

وتیشی: ئەوەی پەیوەندی بە تیرۆركردنی كارمەندێكی ئاسایشی ئێمە هەبوو، سەرە داوەكان دۆزراونەتەوە، بكوژەكان گیراون، كردارەكە زیاتر لە داعشەوە نزیكە، هەروەها یەكێكی تر لە قوربانیەكان كادری كۆمیتەی ئێمە بووە، ئەویش سەرەداومان دەست كەوتووە زیاتر پەیوەندی بە داعشەوە هەیە، ئەو دوو هاوڵاتیەی تر كە فڕێندراون، دوو جوتیارن هەتاوەكو ئێستا هیچ زنیارییەكمان لەبارەیەوە نییە، بەڵام ئەم ڕووداوانە هەمووی زەنگی مەترسیدارن پێویستە زوو بەخۆمان بكەوین، هەموو ئەركەكە پەیوەندی بە حكومەتی ناوەندییەوە نییە، هێزەكانی پێشمەرگەش دەبێت خۆی ڕێكبخاتەوە بتوانێت لیژنە پەیوەندیەكانی لەگەڵ هێزی عێراق ڕێكبخاتەوە، ئێمە لە ڕابردوودا لەم ناوچانە كاری هاوبەش و ئۆپراسیۆنی هاوبەشمان پێكەوە هەبووە.

 

ناوچەكە ئەوەندە فراوانە كە گروپە تیرۆریستییەكان بتوانن جموجۆڵی تێدا بكەن؟

 

"پێویستمان بە هێزە"

 

شێركۆ میروەیس: بەڵێ‌ سنورەكە فراوانە، لە سەردەمی بەعسدا ئەم سنوری بە سێ‌ فرقەی سەربازی بەڕێوە دەبرا، كە دەكاتە هەشت تا نۆ لیوا، بەڵام لەدوای ساڵی ٢٠٠٣وە بۆشاییەكی ئەمنی دروست بووە لە ناوچەكەدا، بەو هێزانەی كە هەیە كۆنتڕۆڵ ناكرێت پێوستمان بە هێزی زیاترە.

 

بۆ لە ٢٠٠٣وە پڕنەكراوەتەوە؟

 

شێركۆ میروەیس: عێراق لە ساڵی ٢٠٠٣وە بەگشتی لەدۆخێكی ئەمنی خراپدایە، هەموو گروپە تیرۆرستییە یەك لەدوای یەكەكان ئەو هەلەیان قۆستووەتەوە، عێراق پێویستی بەكات بوو هەتا دامەزراوەكانی بكەونەوە سەرپێی خۆیان.

 

ئێوە دەتوانن دڵنیایی بدەن بە دانیشتوانی خانەقین كە مەترسی گروپە تیرۆرستییەكان و شەڕی نێوان پێكهاتەكان لە خانەقین ڕوونادات، وەك ئەوەی لە خورماتوو و هەندێك ناوچەی تر ڕوویدا؟

 

"ئەوەی لەسەر خورماتوو هەبوو لەسەر خانەقینیش هەبوو"

 

شێركۆ میروەیس: ئەو مەترسییەی لەسەر خورماتوو هەبوو لەسەر خانەقینیش هەبوو، ئێمە لە سنورەكە هەم وەك كەسە ئیدارییەكان و وەك كەسە سیاسییەكانیش پەیوەندیەكی زۆر باشمان لەگەڵ ئیدارەی دیالە و لایەنە سیاسیەكانی دیالە هەیە، سیاسەتێكی نەرممان لە ڕابردوودا پەیڕەو كردووە، ئەمە بووە هۆی ئەوەی كە لە دوای ئەو دۆخەی ڕوویدا ئەوپەیوەندیە باشە بەكار بهێنینەوە، ئەوە بوەهۆی ئەوەی كە لێكتێگەیشتن لە نێوانماندا هەبێت، بێجگە لەوە ئێمە لەكاتی ڕووداوەكاندا بڕیارماندا كە خانەقین چۆڵ نەكەین، ئەوە بەری بە هەڕەشەی هەندێك خەڵكی گێرەشێوێن گرت، خۆشبەختانە هەموومان توانیمان ئەو دۆخە تێپەڕێنین، سوپاس بۆ خوا ئێستا دۆخی خانەقین ئارامە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin