Smiley face
Smiley face
Smiley face

هیچ پارەیەک بۆ قەرەبووکردنەوەی زیانلێکەوتوانی دەربەندیخان خەرج نەکراوە

2017-12-07 13:33:36



ڕۆژنیوز - هاوکار مستەفا

 

دوابەدوای دەربڕینی ناڕەزایەتی لەلایەن ژمارەیەک لە هاوڵاتیانی شارۆچکەی دەربەندیخانەوە بەرامبەر قەرەبوو نەکردنەوەیان کە بەهۆی بومەلەرزەکەوە زیانیان بەرکەوتووە، سەرۆکی ئەنجومەنی پارێزگای سلێمانی و نوێنەری چین و توێژە جیاوازەکانی شارۆچکەی دەربەندیخان کۆبوونەوە.

 

دوانوەڕۆی ئەمڕۆ لە بینای سەنتەری گەنجانی دەربەندیخان، ژمارەیەک لە چین و توێژە جیاوازەکانی دەربەندیخان و سەرۆک و ژمارەیەک لە ئەندامانی ئەنجومەنی پارێزگای سلێمانی کۆبوونەوە.

 

دوابەدوای کۆبونەوەکە، لەکۆنگرەیەکی ڕۆژنامەنووسیدا ئازاد محەمەد، سەرۆکی ئەنجومەنی پارێزگای سلێمانی وتی: لە کۆبوونەوەکەدا ڕێککەوتین لەسەر ئەوەی کە بە هەردوولامان کاری جدی بکەین بۆ بەدواداچوونی ئەو بەڵێنانەی کە بە هاوڵاتیانی سنوورەکە دراون، چونکە تا ئێستا هیچ بڕە پارەیەک بۆ قەرەبووی هاوڵاتیان خەرج نەکراوە.

 

 

وتیشی: پشتگیری تەواو لەو ئەنجومەن و بۆردانە دەکەین کە لەلایەن دڵسۆزانی ئەم شارۆچکەیەوە پێکهێنراون بۆ فشارخستنە سەر حکومەت بۆ ئاوڕدانەوە لە هاوڵاتییان، هەروەها کاری جدیش دەکەین بۆ پێدانی تایبەتمەندی بەم شارۆچکەیە لەڕووی ئەو هاوکاریانەی کە حکومەت و ڕێکخراوەکان بۆ زیانلێکەوتووانی دابینی دەکەن.

 

لە کۆتایی کۆنگرە ڕۆژنامەنوسییەکەیدا، سەرۆکی ئەنجومەنی پارێزگای سلێمانی ئەوەشی وت،  ئێمەش وەک هاوڵاتیانی ئەم شارۆچکەیە نیگەرانیین بە جێبەجێنەکردنی بەڵێنەکان و ئاوڕنەدانەوە لە هاوڵاتییان، چونکە دەبوو هەرزوو خەمی ئەم شارۆچکەیە بخورایە، بەڵام بەداخەوە تا ئێستاش داروو پەردووی خانووە ڕوخاوەکان لانەبراون لەسەر شەقامە گشتییەکان.

 

ئەمە لە کاتێکدایە، بەهۆی بومەلەرزە بەهێزەکەی ١٢ی مانگی ڕابردووەوە، شارۆچکەی دەربەندیخان-ی سەربە پارێزگای سلێمانی، جگە لە زیانە گیانییەکان، زیانێکی زۆری ماددی پێگەیشت، دوای چەند ڕۆژێکیش نێچیرڤان بارزانی سەرۆکی حکومەت و قوباد تاڵەبانی جێگری، سەردانی زیانبەرکەوتونییان کردو بەڵێنی قەرەبووکردنەوەیان دا، بەڵام تا ئێستا هیچ قەرەبوویەک نەکراونەتەوە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin