Smiley face
Smiley face
Smiley face

کەجەدە: پێویستە نەتەوە یەکگرتووەکان لەسەر هێرشەکەی مەخمور هەڵوێستی هەبێت

2017-12-07 14:42:07



ڕۆژنیوز - ناوەندی هەواڵەکان

 

کەجەدە سەبارەت بە هێرشی سەر کامپی پەنابەرانی شەهید ڕوستەم جودی لە مەخمور ڕاگەیەندراوێکی بڵاوکردەوەو ڕایگەیاند، کە پێویستە بە زووترین کات نەتەوە یەکگرتووەکان ڕاگەیەندراوێک لە بارەی هێرشەکەی سەر مەخمور بڵاوبکاتەوە.

 

پاش هێرشە ئاسمانییەکەی شەوی ڕابردووی سەر کامپی مەخمور، ئەمڕۆ کۆنگرەی جڤاکی دیموکرات- کەجەدە، ڕاگەیەندراوێکی بڵاوکردەوە داوای هەڵوێستی لە نەتەوە یەکگرتووەکان و حکومەتی عێراق کرد.

 

کەجەدە ڕایگەیاند: پێویستە حکومەتی عێراق لە بارەی ئەو هێرشەوە ڕاگەیەندراو بڵاوبکاتەوە، چونکە هێرشەکە کە لە ئاسمانی ژێر کۆنتڕۆڵی حکومەتی ناوەندیی عێراقەوە ڕوویداوە، لەلایەکی دیکەوە چونکە هاوڵاتیانی مەدەنی کامپی مەخمور لە ژێر بەرپرسیارێتی نەتەوە یەکگرتووەکاندان، پێویستە نەتەوە یەکگرتووەکان بە زووترین کات ڕاگەیەندراوێک لە بارەی هێرشەکەوە بدات.

 

لە بەشێکی دیکەی ڕاگەیەندراوەکەی کەجەدەدا هاتووە: لە دۆخی ئێستای ڕۆژهەڵاتی ناوەڕاستدا کورد بوونەتە قووربانیی فاشیزم و کۆمەڵکوژی، حکومەتی تورک بە درێژەی سەدەی ڕابردوو سیاسەتی کۆمەڵکوژی و قڕکردن و فاشیزمی دژی گەلی کورد بەرێوەبردووە، بەهۆی ئەو سیاسەتانەوە ملیۆنەها کورد ئاوارەبوون، هەزاران لەو کوردانە لە باشوری کوردستان دەژین و بوونەتە پەنابەری نەتەوە یەکگرتووەکان لە باشوری کوردستان، نزیکەی ١٥ هەزار هاوڵاتیی خەڵکی باکوری کوردستان لە ژێر بەرپرسیارێتیی نەتەوە یەکگرتووەکان لە کامپی شەهید ڕوستەم جودی لە مەخمور دەژین، نەتەوە یەکگرتووەکان بەرپرسیارە لە ئاست ئەو هێرشەی کە شەوی ڕابردوو کرایە سەر هاوڵاتییانی کامپەکە.

 

لە کۆتایی ڕاگەیەندراوەکەی کەجەدە دا هاتووە: بانگەوازیی هەموو گەلی کورد، چەپەکان و دیموکراسیخوازەکان دەکەین، کە لە بەرامبەر ئەو هێرشەدا یەکبگرن و وەڵامی هێرشکەران بدەنەوە، ئێمە وەک کۆنگرەی جڤاکی دیموکرات ئەو هێرشە بە توندی شەرمەزاردەکەین، هەروەها ئەو ئاستەنگاییانە لە بەردەم چارەسەریی پزیشکی بریندارانی ئەو هێرشە لە هەولێر دروستکراوە شەرمەزار دەکەین.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin