Smiley face
Smiley face
Smiley face

قەندیل کۆچی گەنجانی پێچەوانە کردەوە

2017-12-10 09:41:23



ڕۆژنیوز – سۆران حسێن

 

ئەگەر جاران گەنجان بە لێشاو کۆچیان بۆ ئەوروپا کردبێت، دەتوانرێت بوترێت، لە ئێستادا کۆچەکە پێچەوانە بووەتەوە بۆ قەندیل، ئەمەش بەپێی ئامارێکی تایبەتی ڕۆژنیوز.

 

لە دوای ٢٥ی ئەیلولەوە کە تێیدا ڕیفراندۆم لە باشوری کوردستان کراو گۆڕانکارییەکی زۆر بەسەر خاک و دەسەڵاتی باشوری کوردستاندا هات، ژمارەیەکی زۆر لە گەنجان بە هەردوو ڕەگەزەوە ڕوویان لە قەندیل کردووەو بوونەتە گەریلا.

 

لە دوای ڕاپەڕینەوە لە باشوری کوردستان، بەهۆی شەڕی ناوخۆ و هێنانی سوپای بەعس و دەیان هۆکاریتر، بە هەزاران کەس کوردستانیان بۆ ئەوروپا جێهێشتووە، بەڵام لە سێ مانگی ڕابردووداو بەتایبەتتر دوای ڕووداوەکانی ١٦ ئۆکتۆبەر، کۆچی گەنجانی پێچەوانە کردەوە، بەوپێیەی لە کەمتر لە سێ مانگدا، نزیکەی ٥٠ گەنج ڕوویان لە قەندیل کردووەو بوونەتە گەریلا.

 

(گروپێک لەو گەنجانەی لەو ماوەیەدا بوون بە گەریلا)

بەپێی ئامارێک کە دەست ڕۆژنیوز کەوتووە، لە دوای ڕیفراندنۆمەوە ٤٩ گەنج چەکی گەریلاییان لەشانکردووەو روویان لە قەندیل کردووە.

 

چاودێران ئەم بەشدارییەی گەنجان لە باشوری کوردستان بۆ بێهیوایی گەنجان دەگەڕێننەوە لە دەسەڵاتی سیاسیی و سەربازی و ئابوری، هەرێمی کوردستان، ئەمەش دوای ڕووداوەکانی ١٦ ئۆکتۆبەر ڕوویان لە زیادبوون کردووە.

 

گەنجێک لە کۆتاییەکانی مانگی ڕابردوودا لە پەڕەی تایبەتی خۆی لە فەیسبووک نووسیویەتی:"سۆزی بەشداربوون بۆ ناو ڕیزەکانی گەریلا دەدەم و دەبمە گەریلا، داوام لە ئێوەشە هەمان ڕێباز بگرنە بەر".

 

 

هەرێم ئەبوبەکر پێنجوێنی، ئەو گەنجەیەو ئەوەشی نووسیوە:"من دەڕۆم، چون هەست دەکەم ئەرکێکی ئەخلاقی و ویژدانیم لەسەرشانە، بەرامبەر بە گەلەکەم و خاک ونیشتیمان و ڕێبەر ئاپۆ".

 

کشانەوەی کورد لە ناوچە دابڕاوەکانی باشوری کوردستان و پەیوەندی هاوبەشی هەرێمی کوردستان و تورکیا و نەبوونی هیچ دەرفەتێک بۆ گەنجان و گوشارخستەنەسەر چالاکوانان، هەروەها تیرۆرکردن و دەستگیرکردنی چالاکوانان و ڕۆژنامەنووسان، چەند هۆکارێک بووە بۆ بەشداربوونی ئەو گەنجانە.

 

بەڵام وەک گەنجانی بەشداربوو لە گەریلادا باسیان لێوەکردووە، تەنها قەیران و شکستەکان و نەبوونی ئازادی ڕادەربڕین هۆکاری بەشداربوونیان بۆ ڕیزەکانی گەریلا نەبووە، بەڵکو دەڵێن کە هەست دەکەن دەتوانن لەڕێگەی گەریلاییەوە بگەنە ئازادی و خزمەتی گەلەکەیان و مرۆڤایەتی بکەن.

 

(گروپێکی دیکە لەو گەنجانەی لەو ماوەیەدا بوون بە گەریلا)

جێگای ئاماژەیە، لە ئێستادا جیاواز لە چوارپارچەری کوردستان، لە چەندین وڵاتی جیهانەوە گەنجان بەشداریی ڕیزەکانی گەریلایی دەکەن و هەموو دەنگ و ڕەنگ و زمانە جیاوازەکانیان لە سەنگەرێکدا تێکەڵ بە تێکۆشان کردووە.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin