Smiley face
Smiley face
Smiley face

کاسبکارێک: بازاڕی هەولێر لە ساڵانی نەوەدەکان خراپترە.. بەڤیدیۆ

2017-12-11 10:19:48



ڕۆژنیوز – قەرەچوغ ئەنوەر

 

کاسبکارانی شاری هەولێر، ڕایدەگەیەنن، کە بەهۆی قەیرانی داراییەوە کڕیاریان نەماوە و بازاڕ لە ساڵانی نەوەدەکان خراپتربووە، ژمارەیەک گەنجیش دەڵێن: بێکارین هیچ کارێک نییە بیکەین.

 

بۆ تۆمارکردنی ڕاپۆرتێکی مەیدانیی، ڕۆژنیوز گوزەرێکی کرد بە ناو بازاڕی شاری هەولێر و بەشێک لە هاوڵاتیانی ئەو شارەی دواند.

 

کاسبکاران، بە نیگەرانییەوە باسیان لە ڕەوشی بازاڕ کرد و دەیانوت، کە "خەڵک پارەی پێنییە تا شت لە ئێمە بکڕێت".

 

گەنجێکی دوکاندار، کە خۆی ساڵانی سەرەتانی نەوەدەکانی وەبیر نەدەهات و بۆیان گێڕاوەتە، کە هەرێمی کوردستان لەو ساڵانەدا ئابڵوقەی ئابووریی لەسەربووە، ئەو گەنجە پێیوایە، کە ئەوەی ئێستا هەیە هاوشێوەی ساڵانی نەوەدەکانە و وتی:"بازاڕ زۆر لە ساڵانی ٩٢ و ٩٣ و ٩٤خراپترە".

 

گەنجێکی دیکە، بەم شێوەیە ناڕەزایی هێنایە زمان و وتی:"نەوت نییە کارەبا نییە، قەیرانە، یەخەی کێ بگرین؟، کەس وەڵممان ناداتەوە".

 

کاسبکاران دەڵێن، کە هەر ڕۆژێک مووچە دابەش بکرێت، هاوڵاتیان ڕوو لە بازاڕ دەکەن بۆ کڕینی پێداویستییەکانیان، بەڵام زیاتر ڕوو  لە کڕینی کەلوپەلی کۆنە و هەرزان دەکەن و ناچنە ئەو شوێنانەی، کە بەهای کەلوپەلەکانیان بەرزە.

 

جیاواز لەو کەسانەی، کە کاریان هەیە و بازاڕیان نییە، بەشێکی زۆری گەنجان بێ کارن و هیچ کارێکیان دەست ناکەوێت، یەکێک لەو گەنجانەش ڕایگەیاند، کە ماوەی ساڵێکە بێکارە، بەو هۆیەشەوە بێزارییەکی زۆر ڕووی تێکردووە.

 

جێگای ئاماژەیە، لە ساڵی ٢٠١٤ وە بەهۆی پابەندنەبوونی حکومەتی هەرێمی کوردستان بەو ڕێککەوتنە نەوتییەی لەگەڵ بەغدا هەیبوو، بەغدا هیچ بڕە بودجەیەکەی بۆ هەرێمی کوردستان ڕەوانە نەکردووە و هەرێم-یش نەوتەکەی خۆی سەربەخۆ دەفرۆشت، هەتا ١٦ی ئۆکتۆبەری ئەمساڵ، کە بەغدا بە زەبری هێز بیرە نەوتەکانی ناوچە دابڕێندراوەکانی هەرێمی کوردستانی خستەوە ژێر کۆنترۆڵی خۆی.

 

لە ساڵی ٢٠١٤ ەوە هاوڵاتیانی هەرێم ڕووبەڕووی قەیرانی داراریی بوونەتەوە و لە ساڵی ٢٠١٦-شەوە حکومەت مووچەی فەرمانبەران-ی لەژێر ناوی سیستمی پاشەکەوتی مووچەدا کەمکردووەتەوە و چارەکێکی مووچە فەرمییەکی خۆیان-یان پێدەدات.

 

 

ش.ف  



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin