Smiley face
Smiley face
Smiley face

ڕۆڵی ژن لە سۆشیال میدیا و مامەڵەی میدیا لەگەڵ ژن گفتوگۆ دەکرێت

2017-12-14 16:05:55



ڕۆژنیوز ـ سەمیرا شەهابی

 

لە دیبەیتێکدا لە شاری سلێمانی، ڕۆڵی ژن لە سۆشیاڵ میدیا و مامەڵەی میدیا لەگەڵ کەیسەکانی ژنان گفتوگۆکرا.

 

ئەمڕۆ، ستافی گۆڤاری ژن مەگەزن، لە بارەگای گۆڤارەکە لە شاری سلێمانی دیبەیتێکیان بە ناونیشانی (ژن وسۆشیال میدیا و مامەڵەی میدیا لەگەڵ دۆسیەکانی ژنان) بۆ هەریەک لە ئاشتی ئەحمەد، مامۆستای بەشی ڕاگەیاندن لە زانکۆی سلێمانی و شنا فەیەق، سەرنووسەری ئاژانسی ڕۆژنیوز، شیرین تاهیر، نووسەر و  ڕۆژنامەنووس و وەلید عومەر، نووسەر و ڕۆژنامەنووس ڕیکخست.

 

دیبەیتەکە لەلایەن، ئەڤین ئەحمەد، ڕۆژنامەنووس لە گۆڤاری ژن مەگەزین-ەوە بەڕێوەبرا و تیایدا بەشداربووان سەرنجی خۆیان لەسەر بابەتە خستەڕوو.

 

ئاشتی حەمەساڵەح، ئاماژەی بەوەکرد، کە هەرچەندە سۆشیال میدیا هۆکارێکە بۆ فراوانکردنی پەیوەندییەکانی ژنان و شکاندنی ئەو سنوورەی، کە خێزانەکەی بۆی داناوە، بەڵام ئەو ئازادییە ناهاتووەتە ناو واقیعی ژیانی ژنان و تەنیا لەچوارچێوەی تۆڕە کۆمەڵایەتییەکاندایە.

 

 

وتیشی:"بەکارهێنانی ناتەندروستی تۆڕە کۆمەڵایەتییەکان، بەهۆی ناڕۆشنبیریی کۆمەڵگا-ەوە، زیاتر ژنی کردووەتە قوربانیی".

 

پاشان، شنا فایەق، سەرنووسەری ڕۆژنیوز ئاماژەی بە لایەنێکی نەرێنی دیکەی تۆڕە کۆمەڵایەتییەکان کرد و وتی:"لە باشوری کوردستان تۆڕە کۆمەڵایەتییەکان ژنی لە پراکتیک دوورخستووەتەوە، لە بەرامبەر ئەو هەموو توندوتیژییەی بەرامبەر بە ژنان دەکرێت، پێیان وایە تەنیا بە پۆستکردنێک لە تۆڕە کۆمەڵایەتییەکان ئەرکی خۆیان پێکهێناوە و ئیدی لە چالاکیی پراکتیکیی دوورکەوتوونەتەوە".

 

 

شنا فایەق، ڕەخنەی لە میدیاکانیش گرت و وتی:"بەداوادچوونی جدیی بۆ کەیسەکانی ژنان ناکەن، تەنیا جەستەی ژن دەبینن و وێنەکانیان بۆ ڕیکلام و سەرنج ڕاکێشانی خوێنەر و بینەرەکانیان بەکاردێنن، لەبواری سیاسیی و فکریەوە بەتەواویی ژنان-یان فەرامۆشکردووە".

 

ناوبراو، بە پێویستیشیزانی، ژنانی ڕاگەیاندنکار پلانێکی هاوبەش دابنێن، کە چۆن کار لەسەر کەیسەکانی ژنان بکەن، هەروەها فشار لەسەر ڕاگەیاندنەکان دروست بکەن و ڕێگا نەدەن ژن وەک کاڵا نیشان بدرێت، بەڵکو ڕاستەقینەی ژن وەک خۆی وێنا بکرێت.

 

هەروەها، شیرین تاهیر، ڕۆژنامەنووس و نووسەر لایەنە ئەرێنییەکانی سۆشیال میدیای خستەڕوو و وتی: ژنان لەڕێگای سۆشیال میدیاوە دەتوانن تواناکانی خۆیان نیشان بدەن، هەروەها ئەگەر ژنان جاران دەرفەتی ئەوەیان بۆ نەڕەخسابێت، نووسینەکانیان بڵاو بکەنەوە و میدیا شوێنی بەوان نەدابێت، ئێستا بە ئاسانیی لە تۆڕی کۆمەڵایەتییەوە بێ ئەوەی ڕێگریی لێبکرێت، دەتوانێت بڵاویبکاتەوە.

 

 

پاشان، وەلید عومەر، تیشکی خستە سەر کاریگەریی سیستمی سەرمایەداریی لە بەڕێلابردنی میدیا-دا و وتی: ئەم سەردەمەی ئێمەی تێداین بووە بە سەردەمی سەرمایەداریی، کە ڕۆڵێکی تەواوخراپی لەسەر هەموان و تایبەت لەسەر ژنان هەیە، سەرمایەدار بۆ دەستکەوتی مادیی خۆی ژن بۆ ڕیکلام بەکار دەهێنێت.

 

 

وەلید عومە، وتیشی: بۆ دەربازکردنی میدیا و گۆڕینی ئاڕاستەی کارکردنیان لەسەر ژنان، دەبێت بە هەموومان بەرنگاری ئەو سیستمە سەرمایەدارییە ببینەوە.

 

 

ش.ف

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin