Smiley face
Smiley face
Smiley face

کەنەکە ئەنجامنامەی کۆبوونەوەی کۆمیتەی دیبلۆماسی هاوبەشی بڵاو کردەوە

2017-12-15 10:57:34



ڕۆژنیوز - ناوەندی هەواڵەکان

 

کۆنگرەی نەتەوەیی کوردستان- کەنەکە، ئەنجامنامەی کۆبوونەوەی کۆمیتەی دیپلۆماسی هاوبەشی بڵاوکردەوە و تێیدا ئاماژە درا لە کۆبوونەوەکەدا سەرەڕای گفتوگۆ لەسەر کار و خەباتەکانی ڕابردوو، پلانسازی و بەرنامەکانی داهاتووی کەنەکەش خراونەتە بەر باس.

 

لە ئەنجامناکەدا باس لە دۆخی سیاسی و ئابوریی قەیراناوی لە باشوری کوردستان و ناوچە جێناکۆکەکان کراوە، هەروەها هەبوونی هێزەکانی سوپای تورک لە خاکی باشوری کوردستان وەک هەڕەشەیەک بۆ داگیرکاری کوردستان ڕەچاوکراوە، لەلایەکی دیکەوە گۆشەگیرکردنی عەبدوڵا ئۆجالان، رێبەری پەکەکە نرخێندراوە و بانگەوازیی گەلی کورد کراوە پشتگیریی دەستکەوتەکانی شۆڕشی ڕۆژئاوا و باکوری سوریا بکرێت، لەلایەکی دیکەوە، بانگەوازیی حزبەکانی ڕۆژهەڵاتی کوردستانیش کراوە زیاتر لێک نزیک ببنەوە، هەروەها لە کۆتاییدا جەخت کراوەتە سەر پشتگیریکردن لە مافی ژنان و کەمە نەتەوەکان و ئێزدییەکان.

 

دەقی ئەنجامنامەکە، کە وێنەیەکی بۆ ڕۆژ نێردراوە بەم شێوەیە:

 

بە ئامادەبوونی نوێنەرانی پارت و رێکخراوە کوردستانیەکان، کۆمیتەی دیپلۆماسیی هاوبەش لە رۆژی 10.12.2017 لە ناوەندی کۆنگرەی نەتەوەیی کوردستان لە برۆکسل کۆبۆوە. بەپێی رۆژەڤ سەرەتا دۆخی کوردستان و دوایین گۆڕانکاریی و رووداوەکان لە کوردستان و رۆژهەڵاتی ناوەڕاست، هەڵوێست و کاریگەریی هێزە جیهانییەکان لە ناوچەکە بە فراوانی وتووێژیان لەسەر کرا. لەسەر بارودۆخی باشووری کوردستان، بەتایبەتی  ئەو کارەساتەی لە کەرکوک و ناوچە دابڕاوەکان رووی دا، هەروەها لەسەر بەرگرییکردن لە خەڵک و دەستکەوتەکانی گەلەکەمان، هەڵوەستەی جدیی کرا. لەسەر رەوشی باکورو رۆژاوای کوردستان و هێرشەکانی دەولەتی تورکیا، هەڕەشەکانی سەر عەفرین، سیاسەتی گۆشەگیرکردنی بەرێز عەبدوڵلا ئۆجەلان بەتایبەتی باس و گفتوگۆیان لەبارەوە کرا. لەسەر رۆژهەڵاتی کوردستان، بەتایبەتیش دوای کارەساتی بومەلەرزەکەی ئەم دواییە و هەڵوێست و بە هاناوەچوونی خەڵک و هەمانکات فەرامۆشکردنی لە لایەن دەوڵەتەوە وتووێژ کرا. هەروەها باس لە قەیران و ئاڵۆزیەکانی ئێران لە ناوخۆ و ناوچەکەو هەڵوێستە جیهانییەکان کرا.

 

لە تەوەرێکی تری کۆبوونەوەکەدا کارو خەباتی رابردوو هەڵسەنگێندران. لە کۆتاییشدا پلان بۆ کارو خەباتی قۆناغی داهاتووی کۆمیتە داڕێژرا.

 

کۆمیتەی دیپلۆماسیی هاوبەش سەرەڕای پلانسازی و کاری رۆژانەی دیپلۆماسیی، هەوڵئەدا خەباتێکی بەهێزتر بۆ لۆبیی و دیپلۆماسییەکی زیاتر بە تایبەتی لە ئەوروپا و ئەمەریکاو سەرانسەری دنیادا گەشەپێبدات.

 

کوردستان و رۆژهەڵاتی ناوین بە دۆخێکی ئاڵۆزدا تێئەپەڕێت. شەڕێکی بەرفراوان لە هەرێمەکەدا هەیە و کوردستانیش لە ناوجەرگەی ئاگری ئەو شەڕەدایە. شەڕ لە کوردستان لە لایەکەوە بە هێرشی داگیرکەران و لە لایەکی ترەوە بە وەکالەت بێ پسانەوە بەردەوامە. تا ئێستا بەشێکی زۆری هێرشەکان لەسەر کوردستان بە وەکالەت ئەکران، بەڵام دوای پڕۆسەی ریفراندۆمی باشوور، نەیارانی گەلی کورد کەوتنە ناو دانوستان و هاوپەیمانێتی خۆیان نوێکردوەو راستەوخۆ دەستیان بە هێرش و پەلاماردان کرد.

 

بە دەستپێشخەریی تورکیا، ئێراق و ئێران و تورکیا رێککەوتن و رۆژی 16.10.2017 دەستیان بە هێرش کرد. مخابن دەسەلاتداریی باشوور خۆی رانەگرت و ناوچەدابڕاوەکانیان بە کەرکویشەوە لەدەست دا. ئەو دەستکەوتانەی بە چەندین ساڵ بەدەست هاتبوون، بە ئاسانی کەوتنە دەست نەیاران. دواجار ئەو روون بووەوە کە ئەوانەی بڕیاری ریفراندۆمیان دا، ئەوانەی کە چەندین ساڵە کوردستان بەڕێوەئەبەن، نە لە بواری دیپلۆماسی نە لە بواری سیاسی و سەربازیدا ئامادەکارییەکی ئەوتۆیان نەکردبوو. ئەو دۆخەش شکستێکی گەورەی لێ کەوتەوەو گەلی کوردستانیشی توشی جۆرێک بێهیوایی کرد، هەمانکات شکۆی گەلی کوردستانیشی لە ناو رای گشتی جیهانیدا کەمکردەوە.

بارودۆخی باشووری کوردستان لە هەموو روویەکەوە خراپە. سەرەڕای ئەو کارەساتەش تا ئێستا جۆرە رێککەوتنێکی ناوخۆیی بەدینەهاتووە و هەتا دێ قەیرانی سیاسیش قووڵتر ئەبێتەوە، لە لایەکی تریشەوە قەیانی ئابووری هەر بەردەوامە.

لەهەمووشی مەترسیدارتر دابەزینی ورەی خەڵکە کە تا رادەیەکی زۆر بێهیوا بووە. هەڕەشەکانی حکومەتی بەغدا بەردەوامن. پێویستە هەموو هێزە کوردستانییەکان لە بەرامبەر ئەم دۆخەدا پشتگیریی گەلی باشوور بکەن و  دەستکەوتەکانی باشوور بپارێزن، لە سەنگەری گەلی باشووردا بن و هیواو ورەیان بڵند بکەنەوە. بێگومان ئەگەر بەیەکەوە هەنگاو بنێین و هێزەکانمان بکەینە یەک و هەماهەنگ بین، ئەو دەرفەت و توانایە هەیە کە دەستکەوتەکان بپارێزین و ناوچە دابڕاوەکانیس رزگار بکەین.

 

لە باکوری کوردستان وا بۆ دوو ساڵ ئەچێت شەڕێکی سەخت دژ بە گەلی ئێمە بەڕێوەئەچێت. دەوڵەتی تورکیا بە هەموو شێوەیەک بە هەموو چەکێکی گران بێسنوور و بێ پسانەوە بەردەوامە لە هێرش. لەو هێرشانەشدا هیچ ماف و دادو یاسایەک ناناسێت. شارو گوند خاپوور ئەکات، ژینگە ئەشێوێنێ، خەڵکی سڤیک ئەگرێ و ئەکوژێت، پەرلەمانتار و سەرۆکشارەوانی و سیاسەتمادار و رۆژنامەوانان زیندانی ئەکات. دەست بەسەر شارەوانیەکاندا ئەگرێت و سەرۆکەنیان دەرئەکات. لە بەرامبەر ئەم هێرشانەشدا، گەلی ئێمە و جەنگاوەرانی ئازادی بەرخۆدانێکی قارەمانانە و بێوێنە ئەکەن و زۆربەی هەرەزۆری هێرشەکان تێکئەشکێنن.

دەوڵەتی تورکیا نەک تەنیا لە باکور، بەڵکو لەسەرانسەری جیهاندا دوژمنایەتی گەلی کوردستان ئەکات. سیاسەتی دیپلۆماسی خۆشی لەسەر بنەمای دژایەتی گەلی کوردستان دائەڕێژێ و بەڕێوەئەبات. ماوەیەکە دەولەتی تورکیا سیاسەتی خۆی بەرامبەر دۆخی سوریا گۆڕیوە و دژی بەرژەوەندییەکانی خەڵکی کورد، لەگەڵ ئێران و ئێراق لە رێکەوتن و هەماهەنگیدایە. ئامانجیشی ئەوەیە بەدەستی ئەوان هەر وەک چۆن لە باشوور هێرشیان کرد، بەو جۆرەش هێرش بکەنە سەر دەسکەوتەکانی رۆژاوای کوردستان.

 

دەیان ساڵە تورکیا هەرێمە جیاوازەکانی باشووری کوردستان بۆمباران ئەکەت. 20 ساڵ زیاترە هەندێک هێزی لە باشوور جێگیر کردووە. ئەو هێزانەشی بە ئامانجی تێکدانی دەستکەوتەکانی گەلی ئێمەو رێگرتن لە بەردەم هێزەکانی ئازادیدا بردۆتە باشوور. تورکیا ماف بە خۆی ئەدات هەڕەشە لە هەندێک هێزی کوردستانی بکات و هەوڵئەدات بە زۆر لە شەنگاڵ و هەندێ ناوچەی تر  سیاسەتی خۆی زاڵ بکات. دوای ئەوەی لەگەڵ ئێراق و ئێران رێککەوت، هێرشی لەسەر باشوور زیاتر کرد. بۆردومانکردنی چیای ئاسۆس و کەمپی رۆستەم جودی لە مەخمور نیشانەیەکی روونن.

 

هەڵویستی تورکیا هەر لەسەرەتای شۆڕشی سوریاوە ئەوەیە کە لە رۆژاوای کوردستان هیچ قەوارەیەک بۆ کوردان دانەمەزرێت. هەتا ئێستاش بەردەوام هاوکار و هاندەری داعش و هەموو هێزی سەلەفییە توندڕەوو هێزە نەژادپەرستەکانە بۆ هێرشکردنە سەر خەڵکی رۆژاوای کوردستان. کاتێک زانی کە بەو هێزانە ناتوانێ رێ لە پێشکەوتنی شۆڕشی رۆژاوا بگرێت، ئینجا راستەوخۆ بە هێزەکانی خۆی دەستی بە داگیرکاریی کرد. زیاتر لە 15 مانگە هەندێک هێزی تورکیا چوونە ناو خاکی رۆژاوای کوردستانەوەو بەردەوام هێرش ئەکەن. ئێستاش عەفرینی کردۆتە ئامانج.

 

سەرەڕای ئەو هەموو هێرشانەش، شۆڕشی رۆژاوا بەسەرکەوتوویی بەردەوامەو رۆژ لەدوای رۆژ بەرەوپێشەوە هەنگاو ئەنێت. شاری رەقی پایتەختی داعش ئازاد کرا. باکور و رۆژهەڵاتی دێرەزور ئازادکران. بەڵام پێویستە ئەو راستییە بزانین کە نەیاری گەلی ئێمە زۆرن و بەردەوام خەریکی پیلانگێڕانن و ئەیانەوێ شۆڕشی رۆژاوا تێکبشکێنن. بێگومان شکستی شۆڕشی رۆژاوا زیانێکی مەزن ئەبێت بۆ گەلی کوردستان. پێویستە شۆڕشی رۆژاوا وەک رۆژەڤێکی سەرەکی بێتە ئەژمارو  لەسەر ئەو بنەمایە کارو خەبار بەردەوام بێت. بەتەیبەتی لە بواری دیپلۆماسیدا پێویستە رۆژاڤا لە پلەی یەکەمی کاردا بێت. خەبات بکرێت بۆئەوەی چەترێکی ناونەتەوەیی بۆ پاراستنی رۆژاوا پێکبهێنرێت.

 

لە رۆژهەڵاتی کوردستان سیاسەتی میلیتاریزەکردنی کوردستان و تواندنەوەی گەلی کورد بەردەوامە. رژێمی ئێران بە هیچ شێوەیەک مافە رەواکانی گەلی کوردستان قبوڵ ناکات. هەرچەندە لەئێستادا شەڕێکی چەکداریی مەزن لە رۆژهەڵاتدا نییە، بەڵام دۆخەکە ئاڵۆزە. ئێران سیاسەتی چاوترساندنی خەڵک بە گرتن لەسێدارەدان درێژە پێئەدات. هەروەها بە شێوەیەکی سیستماتیک سیاسەتی بێکارکردن و بڵاوکردنەوەی مادە هۆشبەرەکان پەیڕوە ئەکات. هاتووچؤی نێوان پارچەکانی کوردستان بەتەوای قەدەغە ئەکات و کۆڵبەرن کە بۆ بژێوی رۆژانەیەن ئەو کارە سەختە ئەکەن، ئەگرێت و ئەکوژێت. لە کاتی بوومەلەرزەکەی ئەم دواییەدا، رژێم سەرەرای ئەوەی خۆی هیچ هاریکارییەکی خەڵکی لێقەوماوی نەکرد، نەشیئەهێشت هاوکارییەکانی خەڵک و دەرەوەش بگەنە دەستی لێقەوماوان. ئێران نەک هەر تەنیا لە ناوخۆ، بەڵکو لە سەرانسەری ناوچەکەش لە دژی بەرژەوەندییەکانی گەلی کوردستانە. ئێران کاریگەریەکی زۆری لە سەر ئێراق و سوریا هەیەو دژی بەرژەوەندیەکانی خەڵکی کوردستان، هەروەک پێشووتریش لەگەڵ تورکیادا لە رێککەوتندایە. ئێران رۆڵێکی زۆری لە داگیرکردنەوەی کەرکوك و ناوچەدابراوەکاندا هەبوو.

 

هەرچەند هێزە داگیرکەرەکان پێکەوە لەناو رێکەوتنیشدا بن، بەڵام ناکۆکی زۆریان لە نێواندایە. لەگەڵ ئەو هێڕش و ئاڵۆزیانەش، دۆخی ناوچەکەو دۆخی کوردستان گۆڕانیان بەسەردا هاتووە. چاوی هێزە سەرەکییەکانی جیهان لەسەر هەرێمەکەی ئێمەیە. ئیدی کورد لەو هەرێمەدا بوون بە ئەکتۆرێکی گەورە. ئێستا هێزە جیهانیەکان حساب بۆ کوردان ئەکەن و لەگەڵ هاوپەیمانی ئەبەستن. دەرفەتی سەرکەوتن لەهەر کاتێک زیاتر بووە.

 

لە کۆتاییدا کۆبوونەوەی کۆمیتە ئەم خالانەی خوارەوەی پەسەند کرد:

 

1. باشووری کوردستان لە رەوشێکی هەستیار و ئاڵۆزدایە. پێویستە باکورو رۆژهەڵات و رۆژاوا و هەموو هێزە کوردستانیەکان ئەو رەوشە لەبەرچاو بگرن و هاریکاری باشوور بن. باشووری کوردستان پێویستی بە ئەڵتەرناتیڤێکی دیموکراتیک هەیە. پێویستە حکومەتێکی ئازاو پەرلەمانێکی بە ئیرادە دەستبەکاربێت و بەشێوەیەکی سیستماتیک دیموکراسی فەراهەم بکرێت.

 

2. پێویستە حکومەتی هەرێمی کوردستان دەست بە چاکسازیی بکات و بە جدیی رووبەڕووی گەندەڵی ببێتەوە. ئەو کەسانەی لە گەندەڵییەوە گلان و دووربخرێنەوە و سزا بدرێن.

 

3. پێویستە حکومەتی باشووری کوردستان لە زووترین کاتدا دەست بە پەیڕوەکردنی سیاسەتێکی شەفافی ئابووری بکات. موچەی کارمەندان دابین بکات و گوزەرانی خەڵک باشتر بکات. لە کەسانی بێ دەرامەت و زیان لێکەوتوو خاوەن دەرکەوێت.

 

4. هۆشداری ئەدەینە حکومەتی بەغدا کە دەست لە سەرلەنوێ تاوانی بە عەرەبکردن و گۆڕینی دیمۆگرافیای کەرکوك و ناوچەکانی مادەی 140 هەڵگرێت. چونکە گومان لەوەدا نییە هەر ئێستاوە ئەو کارانە پەیڕەو ئەکرێت.

 

5. ئێمە هێرش کردنە سەر خەڵک، ئاوارەکردن و داگیرکرنی موڵک و ماڵی خەڵک لە توزخورماتو دەوروبەری بە توندی شەرمەزار ئەکەین. پێویستە ئاوارەکان بگەڕێنرێنەوە شوێنی خۆیان و قەرەبووی زیانلێکەوتووان بکەرێتەوەو ژیانیان مسۆگەر بکرێت.

 

6. بۆردومانکردنی کەمپی مەخمورو شەهیدبوون و بریندارببوونی دوانیشتوانەکەی کە لەژێر چاودێریی نەتەوەیەکگرتووەکاندان، بە تاوانێکی مەزن ئەزانین. بەرپرسیارێتی پاراستنی ژیانی خەڵکەکەی ئەکەوێتە ئەستۆی حکومەتی بەغداو رێکخراوی نەتەوەیەکگرتووەکان.

 

7. هەبوونی هێزەکانی دەوڵەتی تورکیا لە باشووری کوردستان هەڕەشەیەکی گەورەیە بۆسەر دەستکەوتەکانی گەلی کوردستان. پێویستە ئەو هیزانە بە زووترین کات لەوێ دەربکرێن.

 

8. داوا لە هەموو گەلی کوردستان ئەکەین پشتیوان و هاوسەنگەری گەلی باکوری کوردستان بن. ئەمڕۆ گەلی باکور لە هەر رۆژ زیاتر پێویستی بە پشتگیرییە. پێویستە لە بواری دیپلۆماسیدا بە هەموو شێوەیەک دەوڵەتی تورکیا لەقاو بدرێت. ئەمڕۆ ئەو دەرفەتە هەیە. سەرکەوتنی باکوری کوردستان سەرکەوتنی هەموو کوردستانیانە.

 

9. نزیکەی 3 ساڵە رێگا لە چاوپێکەوتن لەگەڵ بەڕێز ئۆجەلان گیراوە، وا بۆ 15 مانگیش ئەچێت هیچ هەواڵێکی لێ نابیسترێت و بە تەواوی گۆشەگیر کراوە. ئێمە پشتگیریی کەمپینی ئازادکردنی ئۆجەلان ئەکەین و سڵاو لە چالاکوانانی دژی ئەو گۆشەگیرکردنە ئەکەین.

 

10. پێویستە رۆژاواو هەموو هەرێمی باکوری سوریا بپارێزرێن. بۆ ڕێگرتن لە هێرشەکانی تورکیاو لە بەرامبەر هێرش و دەستێوەردانی نەیاران، پێویستە چەترێکی پاراستنی نێونەتەوەیی بۆ رۆژاوا دەستەبەر بکرێت. رۆژاوا ببێتە هەرێمێکی ئارام و پارێزراو. بۆ ئەو مەبەستە پێویست بە خەباتێکی دیپلۆماسیی تایبەت هەیە.

 

11.  هێرشی داگیرکاریی تورکیا لەسەر رۆژاوای کوردستان، هەڕەشە لەسەر عەفرین بە توندی ریسواو شەرمەزار ئەکەین. بە هەموو شێوەیەک لە سەنگەری بەڕێوەبەراێەتی رۆژاوای کوردستاندا ئەبین. هێرشی دەوڵەتی تورکیا بۆ سەر رۆژاوا رۆژەڤی سەرەکی کاری دیپلۆماسیمانە. بۆ پووچەڵکردنەوەی ئەو هێرشانەش کاری پێویست ئەکرێن. هەمانکات بۆئەوەی بە هەموو شێوەیەک پشتیوانیی بۆ فیدرالیی باکوری سوریا پەیدا بکرێت، خەباتێکی بەردەوام بەڕێوەئەچێت. تێکۆشانیش بۆ بەفەرمی ناسینی فیدرالیی باکوری سوریا، بەهێزتر ئەکرێت.

 

12. سەبارەت بە کۆبوونەوەکان لەسەر پرسی سوریا لە جنێڤ و ئاستانە لە نێوان رژێمی سوریاو ئۆپۆزیسیۆندا، ئەگەر بەڕێوەبەرێتی باکوری سوریاو نوێنەرایەتی کوردی تێدا نەبێت، ئەوا سەرناکەون و کورد و پێکهاتەکانی باکوری سوریا دان بە ئەنجامەکانیدا نانێن.

 

13. کۆماری ئیسلامی ئێران لەسەر میلیتاریزەکردنی رۆژهەڵاتی کوردستان، سیاسەتی تۆقاندنی خەڵک، کوشتنی کۆڵبەران و ئەشکەنجەو لەسێدارەدانی زیندانیانی سیاسی هەر بەردەوامە. هەروەها هەمان سیاسەتی بێکارکردن و بڵاوکردنەوەی مادە هۆشبەرەکان درێژە پێئەدات. ئێمە بە توندی ئەو سیاسەتەی رژێمی ئێران شەرمەزار ئەکەین.

14. ئێمە بە هەموو شێوازێک هاوکاری گەلی رۆژهەڵاتی کوردستان ئەکەین. هیواخوازین هەموو گەلی کورد، بەتایبەتی کوردانی دیاسپۆرا بە هەموو توانایەکەوە هاوکاری زیانپێگەیشتوانی بوومەلەرزەکەی کرماشان و دەوروبەری بن. هەمانکات ئێمە پشتگوێخستن و خەمساردی دەوڵەتی ئێران بەرامبەر قوربانیان و زیانلێکەوتوانی ئەو کارەساتە شەرمازار ئەکەین.

 

15. داوا لە هەموو پارت و رێکخرواوەکانی رۆژهەڵاتی کوردستان ئەکەین کە زیاتر لە یەکتر نزیکببنەوە، هەمانهەنگ و هاوکاربن، تاکو دەنگی رەوای گەلی رۆژهەڵات باشتر بگەیەننە رای گشتی جیهان.

 

16. بۆ ئەوەی تاوانەکانی داعش بەرامبەر خەڵکی ئێزدی لە ئاستی نێودەولەتیدا وەک جینۆساید بناسرێن، پشتگیریی کەیسی ئێزدیەکان ئەکەین. هەروەها پێویستە هەموو هێزە کوردستانیەکان دژی داگیکردنی شەنگاڵ و دەوروبەری راوەستن و شەنگاڵ بپارێزرێت. هەوڵبدرێت ئیتر دەست بە ئاوەدانکردنەوەی شەنگاڵ بکرێت، ئاوارەکان بگەڕێنەوە سەر ماڵ و موڵکی خۆیان. پێویستە ناسنامەی ئێزدێتی شەنگاڵ بپارێزرێت و گەلی شەنگاڵ خۆی خۆی بەڕێوەببات.

 

17. ئێمە پشتگیریی خۆمان بۆ هەموو مافەکانی گەلی سریانی-ئاسوری-کلدانی دووپات ئەکەینەوە. ئەوان خەڵکی رەسەنی ئەو هەرێمەن، پێویستە هەموو مافە ئیتنیکی و کلتوری  و سیاسی و ئیداری و کۆمەڵایەتیەکانیان بپارێزرێن. ئاوارەکانیان بگەڕێنەوە زێدی خۆیان.

 

18. پشتگیریی خۆمان بۆ خەبات و تێکۆشانی تەواوی ژنانی کوردستان رائەگەینین. بەتایبەتی ئەوانەی لە سەنگەرەکانی بەرگریدان. کۆبوونەوەکە دیسان جەختی لەسەر ئەوە کردوە کە پێویستە لە هەموو روویەکەوە کارو خەبات بۆ ئازادکردنی ژنانی ئێزدی بەردەوام بێت.

 

19. پێویستە هەموو هێزە کوردستانیەکان بە پێی پرەنسیپە دیموکراسییەکان مامەڵە لەگەڵ یەکتر بکەن، رێز لە یەکتر بگرن. هەروەها لە بواری دیپلۆماسیدا سنوورەکانی بەرژەوەندییە باڵاکانی گەلی کوردستان بپارێزن.

 

20. ئێمە وەک کۆمیتە داوا لە هەموو پارت و رێکخراوە کوردستانیەکان ئەکەین کە بێنە ناو کۆمیتەی دیپلۆماسیی هاوبەشی پارت و رێکخراوە کوردستانیەکان و پێکەوە کارو خەباتی دیپلۆماسی بکەین.

 

 

کۆمیتەی دیپلۆماسیی هاوبەشی پارت و رێکخراو سیاسیە کوردستانیەکان

 برۆکسل 15.12.2017

 

 

1. کۆمسیۆنی کارەی دەرەوەی کۆنگرەی نەتەوەیی کوردستان – ك.ن.ك

2. یەکێتی نیشتمانی کوردستان

3. پارتی یەکێتی دیموکرات- پەیەدە

4. بزووتنەوەی گۆڕان

5. یەکگرتووی ئیسلامیی کوردستان

6. کۆنگرەی جڤاکی دیموکراتی کورد- ئەوروپا

7. یەکێتی سریانیەکانی ئەوروپا

8. کۆمەڵە، رێکخراوی کوردستانی حزبی کۆمۆنیستی ئێران

9. حزبی سۆسیالیست دیموکراتی کوردستان

10. تەڤگەری ژنانی کوردستان- ئەروپا

11. کۆمەڵی ئیسلامی کوردستان

12. پارتی یەکێتی سوریا-رۆژاڤا

13. پارتی ژیانی ئازادی کوردستان-پژاک

14نوێنەرایەتی هەدەپە لە ئەوروپا

15. پارتی ئیسلامیی کوردستان- پیک

16. پارتی دیموکراتی کوردی سوریا

17. حزبی زەحمەتکێشانی کوردستان

18. پارتی دیموکراتی کورد- الپارتی، سوریا

19. پارتی سەوزی کوردستان، رێکخراوی سوزی ئەوروپی کوردستانی

20. ئینستیتوتی کورد لە برۆکسل

21. فیدراسیۆنی ئێزدیی کوردستان

22. رێکخراوی دیموکراتی یارسان

23. تەڤگەری نوێکردنەوەی کوردستان-سوریا

24. ئەنجومەنی سەنگاڵ لە دەرەوەی ولات

25. پارتی سەبەخۆیی کوردستان

26. حزبی شیوعی کوردستان

27. پارتی الوحدة-سوریا

28. پارتی رزگاریی کوردستان

29. پارتی چەپی کورد-سوریا

30. پارتی چەپی دیموکراتی کورد-سوریا

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin