Smiley face
Smiley face
Smiley face

داوای دەست لەکارکێشانەوەی باپیر کامەلا لە ئەندامێتی پەرلەمان قبوڵ نەکرا

2017-12-17 18:02:52



ڕۆژنیوز - قەرەچوغ ئەنوەر

 

داوای دەست لەکارکێشانەوەی باپیر کامەلا، ئەندامی پەرلەمانی هەرێمی کوردستان، لە دانیشتنی ئەمڕۆی پەرلەمان-دا قبوڵ نەکرا، پەرلەمانتارێکیش دەڵێت:"ناکرێت کاتێک تەمەنی ئەم خولەی پەرلەمان چەند مانگێک ماوە، پەرلەمانتار دەست لەکاربکێشتێتەوە و کەسێکی دیکە بێتە شوێنەکەی".

 

لە دانیشتنی ئەمڕۆ، پەرلەمانی هەرێمی کوردستان-دا، داوای دەست لەکارکێشانەوەی باپیر کامەلا، سکرتێری حزبی کرێکاران و ڕەنجدەرانی کوردستان و ئەندامی پەرلەمانی هەرێمی کوردستان، بە زۆرینەی دەنگی ئەندامانی پەرلەمان قبوڵ نەکرا.

 

عەلی حمە ساڵح، ئەندامی پەرلەمانی هەرێمی کوردستان، لە فراکسیۆنی گۆڕان، بە ڕۆژنیوزی ڕاگەیاند:"لە بەرنامەی کاری دانیشتنی ئەمڕۆی پەرلەماندا، یەکێک لە خاڵەکانی کارنامەکە دەست لەکارکێشانەوەی پەرلەمانتار باپیر کامەلا بوو لە ئەندامێتی پەرلەمان، بەڵام بەزۆرینەی دەنگی ئەندامانی پەرلەمان، دەست لەکارکێشانەوەکەی ئەو پەرلەمانتارە قبوڵ نەکرا".

 

ئەوەشی خستەڕوو:"ھۆکاری قبوڵ نەکردنەکە ئەوەبوو، زۆرینەی ئەندامانی پەرلەمان پێیانوابوو کە تەمەنی ئەم خولەی پەرلەمان چەند مانگێکی ماوە، ناکرێت ئەندامان دەست لەکاربکێشنەوە و یەکێکی تر بێتە شوێنی، چونکە ئەمە جگە لە دامەزراندن و خانەنشینبوونی کەسێکی تر بە مووچەی پەرلەمانتار، ھیچی تر نییە".

 

بەگوێرەی زانیارییەکانی ڕۆژنیوز، داوای دەست لەکارکێشانەوەی پەرلەمانتار باپیر کامەلا لە ئەندامێتی پەرلەمانی هەرێمی کوردستان لەکاتێکدایە، کە پارتی کرێکاران و ڕەنجدەرانی کوردستان کە ئەو سکرتێرییەتی، ڕێککەوتنێکی سیاسی ھەیە لەگەڵ حزبی زەحمەتکێشانی کوردستان، کە لەکاتی ھەڵبژاردنەکانی ئەم خولەی پەرلەمانی ھەرێمی کوردستان بە لیستی ھاوبەش بەشدارییان کردووە و دەبێ لەماوەی ئەو چوار ساڵەدا هەر دوو ساڵ جارێک بۆ ئەندامێتی پەرلەمان بۆ یەکێکیان بێت.

 

جێی ئاماژەپێکردنە، تاوەکو ئامادەکردنی ئەم هەواڵە، دانیشتنی پەرلەمانی هەرێمی کوردستان بەردەوامە، ئیستا گفتوگۆ دەکرێت لەسەر پرۆژە یاسای لێبوردنی گشتیی.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin