Smiley face
Smiley face
Smiley face

کەمدەرامەتیی پێشمەرگەیەکی دێرین و خێزانەکەی دەباتە ناو خێمە

2017-12-23 13:34:56



ڕۆژنیوز – جیهاد هه‌ورامى


 
بەهۆی کەمدەرامەتیی و لەتوانادانەبوونی دابینکردنی کرێی خانوو، پێشمەرگەیەکی دێرین لە شارەدێی سیروان ماڵەکەی دەباتە ناو خێمەیەک و بەرپرسانی شارەکە ناچار دەکات بەشێوەیەکی کاتیی خانوویەکی بۆ دابین بکەن.

 

غازى محه‌مه‌د، پێشمەرگەیەکی دێرینی شارەدێی سیروانی سەر بە پارێزگای هەڵەبجەیە و لەگەڵ خێزانەکەی کە پێکهاتوون لە هاوسەرەکەی و شەش منداڵ لەبەر کەم دەرامەتیی و لەتوانادانەبوونی دابینکردنی کرێی خانوو، بە ناچاریی ماڵەکەیان بردە ناو خێمە.

 

 

سەرەتا، غازی و خێزانەکەی چوونەتە ناو یەکێک لە خانووە بەتاڵەکانی پرۆژەی پەنجا خانووی نیشتەجێی سیروان، کە بۆ کەمدەرامەتانی سنوورەکە دروستکراوە و ماوەی چەند ساڵێکە تەواوبووە و تا ئێستا دابەش نەکراوە بەسەریاندا، بەڵام هێزە ئەمنییەکان ڕێگایان پێ نەدا لەو خانووەدا بمێنێننەوە و دەریان کردن.

 

 

لەدوای دەرکردنیان لەو خانووە لەم وەرزی سەرمایەدا، خێزانەکە هیچ ڕێگایەکیان لە بەردەمدا نەما و لەبەردەم خانووەکەدا خێمەیەکیان هەڵدا چوونە ناوی، بەڵام بەرپرسانی شارەکە ژیانی ناو خێمەکەشیان پێ ڕەوانەبینی و داوای لابردنی خێمەکەیان کرد، بۆیە خێزانەکە هانایان بۆ دەزگاکانی ڕاگەیاندن برد.

 

 

لە ئێستادا، بەرپرسانی شارەکە، رێگایان بەو خێزانە داوە، کە بەشێوەیەکی کاتیی بچێتە ناو یەکێک لە خانووەکانی پڕۆژه‌ى په‌نجا خانووى نێشته‌جێ بۆ که‌مده‌رامه‌تانى سیروان، کە خۆشی پێشتر فۆرمی بۆ وەرگرتنی خانووەیەک لەو پەنجا خانووە پڕکردووەتەوە.

 

هەرچەندە، بە زارەکی بەڵێنیان پێدراوە، کە ڕێگایان پێبدرێت لەو خانووەدا بمێننەوە و ڕێکارە یاساییەکانیان بۆ تەواوبکرێت، بەڵام هێشتا ئەو خێزانە لە دوودڵییدا دەژین و ترسی جێبەجێنەکردنی بەڵێنەکەیان هەیە.

 

غازى، لە لێدوانێکیدا بۆ ڕۆژنیوز ڕەخنەی لە بێباکیی حکومەتی هەرێمی کوردستان گرت و وتی: باوکم و سێ برام شەهیدن، هاوسەرەکەشم دوو برای شەهیدە، تائێستا به‌بچوکترین شت سوودمه‌ند نه‌بووین له‌هیچ هاوکاریه‌کى حکومه‌ت.

 

 

پرۆژەی پەنجا خانووی نیشتەجێی سیراوان، پرۆژەیەکی حکومییە و بۆ کەمدەرامەتەکانی سنوورەکە دروستکراوە، کە بڕیارە لەڕێگای پڕکردنەوەی فۆرم و بە تیروپشک بەسەر ٥٠ خێزانی کەم دەرامەتدا دابەش بکرێت، بەڵام ماوەی دوو ساڵە پرۆژەکە تەواو بووە، هەتا ئێستا دەست بە دابەشکردنی خانووەکان نەکراوە.

 


ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin