Smiley face
Smiley face
Smiley face

ئاڵۆزییەکانی چەمچەماڵ چین و توێژەکانی کۆکردەوە

2017-12-23 18:39:42



ڕۆژنیوز – ئاشتی ئەحمەد

 

بەشێک لە كەسایەتی و پیاوماقوڵان و ڕۆشنبیر و مامۆستایانی ئاینی، لە شارۆچكەی چەمچەماڵ، بۆ چارەسەركردنی دۆخی ئەمنی شارۆچکەکە و گرژی و ئاڵۆزییەکانی چەند ڕۆژی ڕابردووی خۆپیشاندانی هاوڵاتیان كۆبوونەوە.

 

ئێوارەی ئەمڕۆ، لە ماڵی مەریوانی كەریم ئاغا، كەسیایەتی شارۆچكەی چەمچەماڵ، ژمارەیەكی زۆر لە پیاوماقوڵان و ڕۆشنبیر و مامۆستایانی ئاینی، بەئامادەبوونی قائیمقامی شارۆچكەی چەمچەماڵ-ی سەر بە شاری سلێمانی و بەرپرسانی ئەمنی سنوورەكە كۆبوونەوە.

 

لە كۆبوونەوەكەدا، وەستا ڕەسوڵ، ئەندامی سەركردایەتی یەكێتی ئاماژەی بەوەكرد، کە هاتنی هێزی پێشمەرگە بۆ سنووری شارۆچکەی چەمچەماڵ، بەمەبەستی پاراستنی دامودەزگاكانە، وتیشی:"ئەوە خەڵكی چەمچەماڵ نییە كێشە دروست دەكات، بەڵكو دەستێكە لە سنوورەكە دەیەوێت كێشە دروست بكات.

 

وەستا ڕەسوڵ

 

ڕەمەك ڕەمەزان، قائیمقامی شارۆچکەی چەمچەماڵ، لە كۆنگرەیەكی ڕۆژنامەنووسیدا وتی:"ئامانجمان لەم كۆبوونەوە لەگەڵ كەسیایەتی و پیاوماقوڵان و ڕۆشنبیران و مامۆستایانی ئاینی، بۆ چارەسەركردنی گرفتەكان و دانانی ڕیوشوێنی گونجاوە بۆیان، بۆ پێشگرتن لەو ئاگرەی بەرۆكی هەرێمی كوردستانی گرتووەتەوە، داواكاری خۆپیشاندەرانیش ڕەوایە، خۆشبەختانەش بە دەستخستنە ناو دەستی یەكتری هەموو لایەك نەمان هێشتووە هیچ گرژییەك ڕووبدات".

 

ڕەمەك ڕەمەزان

 

قائیمقامی شارۆچکەی چەمچەماڵ، ئەوەشی خستەڕوو:"داواكارییەكانی خەڵكی وەك كارەبا و ئاو و نەوت هەوڵی چارەسەركردنی دراوە، خۆشبەختانەش لە سنووری شارەدێكانی قادركەرم و تەكیەی جەباری و چەمچەماڵ، بڕی پێنج ملیۆن دۆلار پرۆژە بۆ ئەو سنوورانە لە جێبەجێكردندایە، بەبڕی ملیارێك دینار پرۆژەكان لە چەمچەماڵ بەگەڕ كەوتوونەتەوە، داوا لە كەسوكاری شەهیدان و ئەنفالكراوان دەكەین، ئەگەر خۆپیشاندان دەكەن بەشێوەی هێمنانە ئەوا لەخزمەتیاندان".

 

هەرسەبارەت بەكۆبوونەوەكە، مەریوان كەریم ئاغای هەمەوەند، کەسایەتی شارۆچکەی چەمچەماڵ، لە كۆنگرەیەكی ڕۆژنامەنووسیدا وتی:"داواكاری خۆپیشاندەران ڕەوایە، بەڵام داواكارین بەشێوازێكی هێمنانەو دوور لە توندوتیژی ئەنجام بدرێت".

 

مەریوان كەریم ئاغای هەمەوەند

 

ئەوەشی خستەڕوو:"لە كۆبوونەوەكەی ئەمرۆِدا كاردەكرێت ژمارەیەك خاڵ و پێشنیار بخرێتەڕوو، بۆ چارەسەركردنی گرفتەكان".

 

دوای كۆبوونەوەكەیش، بەشداربووانی کۆبوونەوەکە داوایان کرد، کە داواكارییەكان بەشێوەی مەدەنی بخرێنەڕوو، دوور لە توندوتیژی، ئاماژەیان بەوەشکردووە"بەڵێنی یەكڕیزی و ئاشتەوایی خەڵكی چەمچەماڵ ئامانجی كۆبوونەوەكەیە، هەروەها هێزە سەربازییەكانی ناو چەمچەماڵ هەموویان خەڵكی سنوورەكەن و مەبەستیان پاراستنی خەڵكییە، نەك ئازاردانیان، لەچەمچەماڵەوە پەیامی ئاشتی و چارەسەركردنی قەیرانەكان بۆ حكومەتی هەرێم ئاراستە دەكرێت".

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin