Smiley face
Smiley face
Smiley face

لە هەرێمی کوردستان ئەگەری وشکەساڵیی هەیە

2017-12-31 09:15:00



ڕۆژنیوز ـ هاوڕێ و بۆتان

 

دواکەوتنی باران بارین، ئەگەری وشکەساڵیی لە هەرێمی کوردستان دروست دەکات و جوتیارانیش نیگەرانیی سەوزنەبوونی تۆوی دانەوێڵەکانیانن.

 

لە کۆتایی مانگی ١٢-داین و تا ئێستا لە هەرێمی کوردستان تەنیا سێ جار باران باریوە، لەو سێ جارەش یەکجاریان بڕ و ماوەی بارینەکە زۆربووە.

 

لە ناوەندی ناوچەی گەرمیان و گوندەکانی نزیک لەو ناوەندە، تەنیا ١٨ ملیم باران باریوە، بەڵام لە گوندەکانی شاقردەێی تیلەکۆ، کە هەر لە ناوچەی گەرمیانە، بڕی بارانەکە زیاتربووە و ٨٠ ملیم باران باریوە.

 

لە ساڵانی ڕابردوو لەم کاتەدا گەنم گوڵی کردبوو، بەڵام ئەمساڵ کاتێک بۆ ئامادەکردنی ڕاپۆرتێک سەردانی گوندی سەیدخەلیل-ی سەر بە شارۆچکەی کەلار-مان کرد، جگە لە خاکێکی بەرین، هیچ سەوزاییەکمان نەبینیی.

 

 

حەسەن بارام، جوتیارێکى دانیشتووى گوندەکەیە و هۆکاری سەوزنەبوونی تۆوەکانی بۆ نەبارینی باران گەڕاندەوە و وتی: پەڵەى نەداوە و زەوی تێر ئاو نەبووە، ئەمەش بووەتە هۆی ئەوەى هیچ گەشەکردنێک نەبیندرێت.

 

 

دەغڵودانى گەرمیان بەشێکى لەبەر بێ بارانىی لە ژێرەوە تووشی نەخۆشیی (فتریات) بووە، جوتیارانیش ترسێکیی زۆریان لە وشکەساڵیی و خراپبوونی بەرهەمەکانیان هەیە.

 

ئەحمەد ئیبراهیم، جوتیارێکى دیکەی سنوورەکەیە و چووبووە سەر کێڵگەکەی و بە نائومێدییەوە لێیدەڕوانیی دەکرد، کە هەتا چاوبڕبکات خاکە و زۆر بە کەمیی سەوزایی دەبیندرێت.

 

 

ئەحمەد، ئاماژەی بۆ ئەوە کرد، کە زەوییەکەی باشە و وشکە وەردە، ئەگەر بێبارانیی نەبوایە، چاوەرێی بەرهەمیی زۆر باش دەبوو.

 

 

ئەو جوتیارە، وتیشی: ٥٠٠ هەزار دینارم داوە بە تۆو، ٤٠٠ هەزار دینارشم داوە بە کیمیاویی، کەچی تا ئێستا سەوزنەبووە.

 

بەهۆی ئەوەی لەکاتی خۆیدا باران نەباریوە، بە وتەی جوتیاران ئەگەر باران-یش ببارێت وەک ساڵانی ڕابردوو سودی بۆ دەغڵودان نابێت و بەرهەمی ئەمساڵ باش نابێت.

 

هەروەها، سیروان حەمەساڵح، جوگرافیاناسسەبارەت بە ئەگەری دورستبوونی وشکەساڵیی وتی:ئەگەر تا سەری ساڵ باران نەبارێت ئەوا، لەگەرمیان وشکە ساڵیی دەبێت، بەڵام بەپێی پێشبینیەکانى کەشوهەوا لە سەرەتاى ساڵدا نزیکەی ١٠ملم باران لە گەرمیان دەبارێت، بەمەش کەمێک مەترسیی وشکە ساڵیی دەڕەوێتەوە.

 

سیروان حەمەساڵح، وتیشی: هێشتا کاتى وەرزی باران بارین ماوە، تا مانگى چواریش باران ببارێت ئاساییە، ئەگەر بەدرێژاىی ئەم چوار مانگە هەر مانگێک سێ جار باران ببارێت ئەوە دەغڵودانى جوتیاران باش دەبێت، بەڵام ئەگەر پێچەوانە بێت باش نابێت.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin