Smiley face
Smiley face
Smiley face

پیشەی هەلاجیی بەرەو نەمان دەچێت

2018-01-02 10:55:34



ڕۆژنیوز - جیهاد هەورامی

 

پیشەی هەلاجیی کە بریتییە لە پشکنینەوە و شیکردنەوەی لۆکە و خوری و دروستکردن و تازەکردنەوەی لێفە و دۆشەگ و سەرین، پیشەیەكی كۆنی كوردەوارییە و تا ئێستاش تاک و تەرا ماوە، هەلاجێكیش دەڵێت: ئەو پیشەیە خەریکە بەرەو نەمان دەچێت.

 

دوای پێشکەوتنی تەکنەلۆژیا ئەو ئامێرە کەم بوەتەوە و لەبری ئەوە، ئامێری كارەبایی دروست كراوە كارئاسانیی زۆر دەکات لە شیكردنەوە ە پشکنینەوەی خوری و لۆكە.

 

 

سەنعان دەرەمەڕی، كە تەمەنی 41 ساڵە و دانیشتوی شارەدێی خورماڵی سەر بەپارێزگای هەڵەبجەیە، ماوەی نزیكەی 15 ساڵە كاری هەلاجی دەكات، بەوتەی خۆی ئێستاکە تەنها دوو كەس ماون لە تەواوی ناوچەی هەورامان كە پیشەی هەلاجیی دەكەن.

 

 

لەبارەی پیشەی هەلاجیی و چۆنیەتی كاركردنی سەنعان، بۆ ڕۆژنیوز دواو وتی:"جاران لەهەموو گوند و ناوچەیەك هەلاجێك هەبوو، بەڵام ئێستا بەهۆی پێشكەوتنی تەكنەلۆجیا و هەرزانی نرخی بەتانی و پشتی و دۆشەكی (گبی) ئامادەكراو لەچاو ئەوەی بە خوری و پێستی بزن دروست دەكرێت، پیشەی هەلاجیی بەرەو كەمبوونەوە و لەناوچوون بردووە و وایلێهاتوە لە ناوچەیەكی وەك هەورامان تەنها من و كەسێكی دیكە ئەو کارە دەکەین، ئەویش تەنها بۆ ئەوەی بژێوی ژیانی ئێمەی لەسەرە".

 

 

سەنعان، وتیشی:"لەلایەكی تریشەوە بەهۆی كەمبوونەوەی چاندن و بەرهەمهێنانی لۆكە لە دەشتەكانی شارەزوور و کەمبوونەوەی بەخێوکردنی مەڕوماڵات لە لادێکانی هەرێمی كوردستان، كاریگەری لەسەر پیشەكەی ئێمەش كردوە و ناتوانین دۆشەك و لێفە و پەتوو دروست بكەین، كاری ئێمە ئێستاکە تەنها دووبارە شیكردنەوەیان و ڕێكوپێككردنی دۆشگ و لێفە و سەرینە کۆنەکانە، ماوەی چەند ساڵێكیشە هیچ جۆرە لێفەیەكمان دروست نەكردوە".

 

هەلاج بەو کەسە دەوترێت کە ئەو کارە دەکات، ئەو کەرەستانەی بەردەستی هەلاجی دەكات کە دەبێتە ناواخنی سەرین و لێفە و دۆشەگ، ئەوەش لە ڕێگەی ئامێرێكی دەستیەوە كە لە كۆنەوە پێی وتراوە (جیكەنە)، كە ئەویش لەدارێك و ژێ‌-یەك کە لە سیرمەی پێستە دروستکراوە وەك دەزوویەك باریکە و بە دەسكەوانەیەکەوە بەستراوەتەوە دروستکراوە، ژێ‌یەکە لەناو خوری یان لۆكەكە دەلەرێندرێتەوە و بە دەسکەنەیەیەکی دار لە لۆکە یان خورییەکە دەدرێت و شی دەكاتەوە.

 

هەلاجیکردن لەسەر شێوەی کۆن - ئەرشیف

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin