Smiley face
Smiley face
Smiley face

ڕژاک کار بۆ بنیاتنانی سیستمی خۆبەڕێوبەریی دیموکراتیی دەکات

2018-01-06 11:34:43



ڕۆژنیوز – سەمیرا شەهابی

 

ڕژاک، بڕیارەکانی کۆنگرەکەی ئاشکراکرد و یەکێک لەو بڕیارانەش کارکردنە بۆ بونیاتنانی سیستمی خۆبەرێوەبردنی دیموکراتیی وەک مۆدێلێکی نوێ بەپێشەنگایەتی ژنان لە سەر بنەمای جیهان بینی(دیموکراسی و ژینگەپارێزو ئازادیی ژن).

 

ئەمڕۆ کاتژمێر ١١:٠٠ لە پارکی ئازادیی شاری سلێمانی ئەنجام و بڕیارنامەی کۆتایی کۆنگرەی چوارەمی ڕێکخراوی ژنانی ئازادی کوردستان (ڕژاک)، کە دوێنێ بەسترا، لە کۆنگرەیەکی ڕۆژنامەنووسیدا ئاشکراکرا و لەلایەن بەیان عەلی، ئەندامی ئەنجومەنی بەڕێوبەریی ڕژاک-ەوە خوێندرایەوە.

 

دەقی بڕیارەکان:

 

1-کردنه‌وه‌ی خولی په‌ره‌وه‌رده‌ و کردنه‌وه‌ی ئاکادیمیای فکر و به‌تایبه‌تی ئاکادیمیای ژنۆلۆژی له‌پێناو بونیاتنانی تاکێکی هۆشیار و سه‌رکه‌وتوو لەهەموو هەرێمەکاندا.

 

2- ئێمە تێکۆشان لەدژی پیلانگێڕی و خەباتکردن لەپێناوی ئازادی رێبەر ئاپۆ وەک ئەرکی سەرەکی خۆمان و تەواوی ژنان دەبینین و لەو پێناوەشدا بێ وچان تێدەکۆشین و چالاکی هەمەڕەنگ پێش دەخەین بەتایبەتی پێشخستنی کۆنفرانس و کۆڕ و سیمینار بەمەبەستی گەیاندنی فەلسەفەی ئازادی ژنان بەهەموو ژنان و گەیشتنە حەقیقەتی چارەسەری.

 

3-هۆشیارکردنەوەی ژنان بەگشتی و ژنانی گەنج بەتایبەتی بەرامبەر بە سیاسەتی کۆمەڵکوژیی کەلتوری و تواندنەوەیان بە رێگای دراما بیانیەکان بەتایبەتی دراما تورکیەکان، بەڕێوەبردنی تێکۆشان و سازدانی کەمپینێک لە سەر ئەم بنەمایە.

 

4-بەڕێوەبردنی تێکۆشانێکی هەمەلایەنە له‌ پێناو گۆڕینی ئه‌قڵیه‌تی ده‌سه‌ڵاتدار له‌سه‌ر بنه‌مای جیهان بینی ئازادیخوازی و تێکۆشان بەرامبەر هەموو توندوتیژیەکانی سەر ژنان، بەتایبەتی بڵندبوونی رێژەی کوشتن و سوتاندنی ژنان، کە بە کۆمەڵکوژی ژنان بەناودەکرێت، لەم چوارچێوەدا کەمپینێک بۆ ماوەی یەک ساڵ رادەگەیەنین.

 

5-پێشخستنی کۆنفرانسی ژنۆلۆژی بە دەستپێشخەریی ڕژاک و ژنانی گەنج.

 

6-بەرامبەر بە هەڵوێستی ئەو  ژنانەی کە لە سیاسەتدا زۆر هەل پەرست و روکەشین و لەناو کێبەرکێیەکی دەسەڵاتدان و لەراستی و ئێش و ئازارەکانی کۆمەڵگه‌ دابراون تێکۆشانی بەهێز لەسەربنەمای هێڵی ئازادی ژن بەرێوە دەبەین و مۆدێلی نوی پێشەنگی ژن لە سیاسەتدا پێش دەخەین کە نمونەی ژنێکی خۆبەش و فیداکار و خاکی بێت.

 

7-تێکۆشانێکی ڕادیکاڵ و ئایدیۆلۆژی، سیاسی بۆ ئازادی ئەو ژنانە کە ڕووبەڕووی هێرشی داعش هاتوون و ئەوانەی کە دیلی دەستی داعشن، بەڕێکخستن کردنی کەمپەینێک بە دروشمی: "نا بۆ کۆمەڵکوژی ژن" وه‌ "ئازادی ژنانی شەنگال، ئازادی مرۆڤایەتییە"، ئەم کەمپینە هەتا ئازادکردنی تەواوی ژنانی شەنگال لەدەستی داعش بەردەوام دەبێت.

 

8-لێکۆڵینەوە و بەدواداچون بۆ ئەو ژنانە دەکەین کە لە دوزخورماتوو داقووق ڕووبەڕووی دەستدرێژی و کوشتن بونەتەوە. ئێمە هەموو جۆرە چالاکیەک ئەنجام دەدەین لەپێناوی ئەوەی تاوانباران بەسزای خۆیان بگەن و قەرەبووی مەعنەوی و مادی ئەو کەسانە بکرێتەوە کە قوربانین.

هاوکات کاردەکەین بۆ گەڕانەوەی هەموو ئاوارەکانی موسڵ و کەرکوک و دوزخورماتوو داقوق بۆسەر زێدی خۆیان بەمەرجێک گەرەنتی پاراستنی  ژیانیان بکرێت.

 

9- کارده‌که‌ین بۆ بونیاتنانی سیستەمی خۆبەرێوەبردنی دیموکراتیک وەک مۆدێلێکی نوێ بەپێشەنگایەتی ژنان لە سەر بنەمای جیهان بینی(دیموکراسی و ژینگەپارێزو ئازادیی ژن)، هه‌روه‌ها بەهەند وەرگرتنی تەواوی نەتەوە و ئاین و ئاینزا جیاوازەکان لە ئێراق و باشوری کوردستاندا بەدروشمی یەک ژنیش پێویستە بێ رێکخستن نەمێنێت پەرە بەرێکخستنکردن دەدەین.

 

10-  لە چوارچێوەی سەرلەنوێ بونیاتنانەوەی کۆمەڵگه‌، پرۆژەی گەڕانەوە بۆ گوندەکان بە پێشەنگایەتی ژنان پێشدەخەین.

 

11-  کاردەکەین بۆ قەدەغەکردنی یاسای فرەژنی و هه‌موار کردنی یاسای باری کەسێتی بەئاراستەیەکی دیموکراتیانەدا.

 

12-  کاردەکەین بۆ پاراستنی مافی منداڵان  بەتایبەتی ئەو منداڵانەی کە بێ کەسن یان بەشێوەیەکی نائاسایی لەدایک بوون و مافەکانیان بەیاسا گەرەنتی دەکەین.

 

13- کاردەکەین بۆ کردنەوەی جێگەیەک بۆ پاراستنی ژنان.

 

14- بەڕێوەبردنی تێکۆشانێکی هەمەلایەنە بەرامبەر بەهەموو توندوتیژیەکانی سەر ژنان بەتایبەتی بڵندبوونی رێژەی  کوشتن و سوتاندنی ژنان کە بە کۆمەڵکوژی ژنان بەناودەکرێت، لەم چوارچێوەدا کەمپینێک بۆ ماوەی یەک ساڵ رادەگەیەنین.

 

15- کارده‌که‌ین بۆ به‌ڕێوه‌بردنی شۆڕشێکی که‌لتوری لەرێگەی کاری پەروەردەیی و رۆشنبیری و هونەریەوە لەبەرامبەر توانەوەی کەلتوری رەسەنی کۆمەڵگه‌ به‌پێشه‌نگایه‌تی ژنان و گه‌نجان. گرنگی بەخەباتی هونەری دەدەین و کەسایەتی ژنی هونەرمەند پێش دەخەین بۆئەوەی ژن بەناسنامەی خۆی بتوانێت هونەر پێش بخات.

 

16- کار دەکەین بۆ پێشخستنی پرۆژەی ئابوری هەرەوەزی بۆ ژنان و بۆ سەرخستنی ئەم پرۆژانە سەرەتا لە گوندەکانەوە دەست پێدەکەین.

 

چوارەمین کۆنگرەی رێکخراوەکەمان پێشکەشی گیانی پاکی شەهیدی قارەمان و سەرکردەو فەرمانداری شەری ئازادکردنی کوبانی هەڤاڵ دەستینا دەکەین، لە کەسایەتی هەڤاڵ دەستینادا پێشکەشی هەموو شەهیدانی شۆرشی ژن وکوردستان و رۆژهەڵاتی ناوەراست دەکەین.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin