Smiley face
Smiley face
Smiley face

لە ئەڵمانیا و فەرەنسا و بەریتانیا بە خۆپیشاندان پشتگیریی خۆپیشاندەرانی ئێران کرا

2018-01-07 09:27:12



ڕۆژنیوز - ناوەندی هەواڵەکان

 

ژمارەیەک لە هاوڵاتیانی کورد و ئێرانیی دانیشتووی ئەڵمانیا و فەرەنسا وبەریتانیا، دوو خۆپیشاندانیان ئەنجامدا، لە خۆپیشاندانەکاندا کردەوەکانی حکومەتی ئێران دژ بە هاوڵاتیان شەرمەزارکرا و پشتگیریی خۆپیشاندانەکانی گەلانی ئێران کرا.

 

شەوی ڕابردوو لە پاریسی پایتەختی فەرەنسا و شاری هانۆڤەری ئەڵمانیا و لەندەنی پایتەختی بەریتانیا، دژ بە تاوان و پێشێلکارییەکانی حکومەتی ئێران بەرامبەر خۆپیشاندەران، خۆپیشاندان ئەنجامدرا.

 

مەحمود هاشمیی شاهرودی، سەرۆکی ئەنجومەنی تەشخیسی مەسلەحەتی کۆماری ئیسلامیی ئێران، بۆ چارەسەریی پزیشکی نێردراوە بۆ نەخۆشخانەی شاری هانۆڤەر، هاوڵاتیانی ئێرانی لە بەردەم ئەو نەخۆشخانەیە گردبوونەوەو بە ئەنجامدانی خۆپیشاندانێک داوایان لە حکومەتی ئەڵمانیا کرد، هاشمی شاهروودی دەستگیر بکات و ڕێگری لێ بکات لە گەڕانەوەی بۆ ئێران و دادگایی بکات بەهۆی تاوانەکانی حکومەتی ئێران.

 

ناردنی هاشمی شاهرودی بۆ هانۆڤەر بە مەبەستی چارسەریی پزیشکی، نارەزایی زۆری ؛ێکەوتووەتە لە ناو چینی هەژار و کرێکاری ئێرانیدا، ئەو هاوڵاتیانە دەڵێن، خەڵکی ئێران برسییانە و داماون بۆ بچوکترین چارەسەرییە پزیشکییەکان لە ناوخۆی ئێران و ناچاردەبن گورچیلەکانیان بفرۆشن، بەڵام بەرپرسانی حکومی بۆ بچوکترین کێشە تەندروستییەکانیان ڕەوانەی گرانترین نەخۆشخانەکانی ئەوروپا دەکرێن.

 

هەروەها لە پاریسی پایتەختی فەرەنسا، لە سەر بانگەوازیی هاوبەشی هێزەکانی ئۆپۆزسیۆنی ئێرانی گردبوونەوەیەک ئەنجامدرا، تێیدا پشتگیریی سەرهەڵدانی گەلانی ئێران کرا دژ بە دەسەڵاتداریی سیاسی و ئابوری و سەربازیی حکومەتی ئێران، هەروەها فراوانخوازییەکانی ئێران بە مەبەستی داگیرکاریی خاکی وڵاتانی دراوسێ شەرمەزارکرا.

 

خۆپیشاندەران لە پاریس پانکاردی "نە شێخ نە شا نە ترامپ نە پوتین"یان بە دەستەوە گرت و دروشمی مەرگ بۆ کۆماری ئیسلامی و مەرگ بۆ خامنەییان وتەوە.

 

لە لەندەنی پایتەختی بەریتانیاش هاوڵاتیانی ڕۆژهەڵاتی کوردستان و ئێران بەهاوبەشیی و لەسەر بانگەوازیی پارتی ژیانی ئازادی کوردستان (پژاک) گردبوونەوەیەکیان بۆ هەمان مەبەست ئەنجامدا.

 

 

س.ح

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin