Smiley face
Smiley face
Smiley face

بەرپرسانی باڵای دوو کۆریاکە کۆبوونەوە

2018-01-09 09:54:01



ڕۆژنیوز - ناوەندی هەواڵەکان

 

دوای دووساڵ، بەرپرسانی باڵای کوریای باکور و باشور کۆبوونەوەو خولێکی نوێی دانوستانیان دەستپێکرد.

 

بەرپرسانی باڵای دوو کوریاکە سەرلەبەیانیی ئەمڕۆ سێشەممە بە کاتی کوریای باشور، پاش دوو ساڵ بۆ یەکەمین جار کۆبوونەوە.

 

ئەو کۆبوونەوەیە بە مەبەستی دانوستان لە بارەی بەشداریی تیمێکی کوریای باکور لە ئۆلمپیادی زستانەی کوریای باشوردا پێکهات و لە ئەنجامدا بەرپرسانی دوو وڵات گەیشتنە ئەو ئەنجامە کە تیمی کوریای باکور بەشداری ئۆڵمپیادی زستانە بێت.

 

سەرۆکی شاندی کوریای باشور بە ئاژانسی هەواڵی فەرمیی کوریای باشوری ڕاگەیاندووە، کە بەو هیوایەی کە هەڵوێستێکی جدی و ڕاستگۆیانە لە کوریای باکور ببینن بەشداری ئەم کۆبوونەوەیە بووین، هیوادارین کە کۆبوونەوەکە بۆ خەڵکانی دوو کوریاکە ئەنجامی بەدواوەبێت.

 

هاوکات کوریای باشور داوای لە ئەمریکا کردووە، کە بۆ ئەوەی کێشەی نەخوازراو لە میانەی دانوستانەکانی نێوان دوو کوریاکەدا ڕوونەدا، مانۆرە سەربازییەکەی لە کوریای باشور ڕابگرێت تا کاتی کۆتاییهاتنی ئۆڵمپیادی زستانە.

 

ئەو لە کاتێکدایە، کە کیم جونگ ئون، ڕێبەری کوریای باکور لە وتاری سەری ساڵیدا باسی لە دانوستانی نێوان دوو کوریاکە کردبوو بەمەبەستی کەم کردنەوەی ناکۆکییەکان.

 

جێگای ئاماژەیە، کە ئۆڵمپیادی زستانەی کوریای باشور وابڕیارە لە نۆ بۆ ٢٥ی مانگی داهاتوودا بەڕێوەبچێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin