Smiley face
Smiley face
Smiley face

هەڵەبجە، سیستمی ترافیک لە جیاتی چارەسەریی کێشەی دروستکردووە

2018-01-13 13:43:01



ڕۆژنیوز – جیهاد هەورامی

 

پاش تێپەڕبوونی ماوەیەك بەسەر دانانی سیستمی ترافیك لایت لەهەڵەبجە، تائێستا چەندین كەموكورتی تێدایەو چارەسەر نەكراوە، پۆلیسی هاتووچۆش دەڵێت، کە لە هەوڵی چارەسەرکردنی کێشەکاندان.

 

پاش ئەوەی لە بەروای ٤-١٢-٢٠١٧دا، بۆ یەكەمجار سیستمی ترافیك لایت بەڕووی شۆفێران و هاوڵاتیانی شاری هەڵەبجەدا کرایەوە، دوای تێپەڕبونی زیاتر لە مانگێك، چەنین كەموكورتی لەو ترافیك لایتانە هەیە، لەو بارەیەوە شۆفێران بۆ ڕۆژنیوز باس لە کەموکورتییەکان دەکەن و هاتووچۆش باس لە هەولەکانیان بۆ چارەسەەریی.

 

شۆفێرێك بەناوی هوشیار زەڵمی، بۆ ڕۆژنیوز وتی:"دانانی سیستمی ترافیك لایت سیمایەكی تایبەتی بەخشیوەتە شارەكەو دەبێت شۆفێران و هاوڵاتیانیش پابەندبن بەتەواوی ڕێنماییەكانی، بەڵام بەداخەوە هەندێ‌ لەشۆفێران بەتەواوی پابەندنابن و سەرپێچی دەكەن بەتایبەت شۆفێری  ماتۆرسكیلەكان كە زۆربەیان بێ‌ گوێدانە هێمای ڕاوەستان دەڕۆن، هاوڵاتیانیش بەهەمان شێوە لەكاتی دیاری كراوی پەڕینەوەی هاوڵاتی لەسەرشەقامەكان ناپەڕنەوە، بەپێچەوانەوە لەكاتی هێمای قەدەغەی پەڕینەوەدا تێدەپەڕن و ئەمەش هەندێ‌ جار گرفت دروست دەكات بۆ شۆفێران".

 

 

هوشیار، وتیشی:"چەندین كەموكورتی لەسیستمەكە دەبینرێت كە پێویستی بەچارەسەریی هەنوكەیی هەیە، بەتایبەت نەبونی هێڵی جیاكەرەوەی سایدەكان بۆ شۆفێران بۆ ئەوەی بەئاسانی بتوانن لەهێڵی دیاری كراوی خۆیان تێپەڕن و دیاری نەكردنی هێڵی پەڕینەوە بۆ هاوڵاتیان لەترافیك لایتەكان، كە وای كردووە هاوڵاتیان بەویستی خۆیان لەهەموو شوێنەكان بپەڕنەوە و گرفت بۆ شۆفێران دروست دەبێت".

 

شۆفێرێكی تریش بەناوی هیوا سەعدی، بە ڕۆژنیوزی وت:"سەرەڕای خۆشحاڵیمان لەدانانی سیستمی ترافیك لایت بۆ شارەكەمان، بەڵام كۆمەڵێك گرفتی تێدایە وەكو كارنەكردنی هەندێ‌ لەو ترافیك لایتانە بەهۆی دابین نەكردنی كارەبای بەردەوام و دانەنانی كارمەندی هاتوچۆ لە ترافیك لایتەكان بۆ پێدانی ڕێنمایی زیاتر بەشۆفێران و هاوڵاتیان، بەوەی كە سیستمەكە بۆ یەكەمجارە لەشارەكە بنیات نراوەو دەبێت هۆشیاریان پێ‌ بدرێت".

 

 

سەبارەت بەبونی كەموكورتییەكان و چارەسەركردنیان، سەلاح عەلی، تەبێژی بەڕێوەبەرایەتی هاتوچۆی هەڵەبجە بە ڕۆژنیوزی وتی، ڕاستە ئەو کێشانە هەن و بەردەوام دەبین لە هەوڵدان بۆ چارەسەرکردنیان و دەربارەی نەبوونی کارمەندیش وتی:"لەسەرەتای كارپێكردنی ترافیك لایتەكان بۆ ماوەی چەند ڕۆژێك كارمەندمان داناوە، بەڵام بەهۆی كەمی كارمەند و میلاكات ناتوانین بەبەردەوامی لەو شوێنانە كارمەند دابنێین.

 

 

وتەبێژی بەڕێوەبەرایەتی هاتوچۆی هەڵەبجە، وتیشی:"هەرچەندە كامێرای چاودێریمان لەسەر ترافیك لایتەكان داناوە، بەڵام بەهۆی ئەوەی كەپێشتر لەهەڵەبجە سیستمی ترافیك لایت نەبوەو شۆفێران لەسەر بنەمای زووتر گەیشتن بەچوارڕێیانەكان و پێشڕەوی هەوڵی تێپەڕبونیان داوەو ئێستاش ئەو ترافیك لایتانە دانراون دەبێت بەپێی ڕێنماییەكان بوەستن، بۆیە تا جێگیربوون وچارەسەری تەواوی كەموكورتیەكان سزای سەرپێچی كاران ناكەین".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin