Smiley face
Smiley face
Smiley face

قائیمقامی خورماتوو: بڕیاری لابردنم سیاسییە و دڵنیاتان دەکەمەوە دەگەڕێمەوە

2018-01-14 14:07:54



ڕۆژنیوز ـ هاوڕێ کرێکار

 

قائیمقامی لەسەر کارلابراوی خورماتوو، ڕایدەگەیەنێت، لابردنم بڕیارێکی سیاسییە، پۆستی قائیمقام و چەند فەرمانگەیەکی تر پۆستی کوردە و دەبێت بۆ کورد بێت، لە داهاتویەکی نزیکیشدا  ئەو بڕیارە هەڵدەوەشێنینەوە.

 

١٠ی ئەم مانگە و بەبێ ئامادەبوونی کورد، لە کۆبونەوەیەکی ئەنجومەنی شارۆچکەی خورماتوو-ی سەربە پاریزگای سەڵاحەدین، شەلال عەبدول قائیمقامی شارۆچکەکە لە کارەکەی دوورخرایەوە، لەبارەی ئەو بڕیارەوە ناوبراو بۆ ڕۆژنیوز دەدوێت و باس لەدۆخی ئێستای خورماتوو-ش  دەکات.

 

 
شەلال عەبدول، وتی: دۆخی ئێستا خورماتوو، ئێمە وەک کورد لەوێنین ناتوانین بڵێن باشە یا خراپ، ئەوەی هەیە هێزێک هاتووە بەناوی بەرپەرچدانەوەی خێرا، لایەنە باشەکەی ئەوەیە دەستی کردووە بە پشکنین وڕاماڵینی چەک و تەقەمەنی و ڕاودونانی ئەو کەسانەی لە دەرەوەی یاسان، دیوە خراپەکەشی ئەوەیە، چونەتە گەڕەکە کوردییەکان ماڵی خەڵکیان کردووەتە بارەگا و پێشێلکارییان کردووە.

 

 
وتیشی: لابردنی من و ژمارەیەک بەڕێوەبەری تری کورد لە پۆستەکان، بڕیارێکی سیاسییە و بەدەرە لە یاساکان و ئیداریش نییە، ئەم هەوڵانەی ئەوان دەیدەن هەوڵێکی باش نییە و خزمەت بە شارۆچکەکە ناکات، چونکە ئێمە وەک کورد پۆستی قائیمقام و چەند فەرمانگەیەکی دیکەمان وەرگرتووە، بەپێی بوونی کورد  لە خورماتوو وەرمانگرتووە، ئەگەر منیش نەبم دەبێ کوردێکی تر بێت، ڕێکەوتوون و سازان کراوە، دڵنیاتان دەکەمەوە ئەو بڕیارە هەڵدەوەشێنینەوە.

 

 
ئاماژەی بەوەشدا: پێشێلکاری زۆر بەرامبەر بە خەڵکی خورماتوو کراوە و  بەسەدان خانوو تەقێنراونەتەوە و سوتان و تاڵانکراون و سوکایەتی بە ئاڵای کوردستان و شەهیدان و خەڵک کراوە، خەڵک ناتوانێت بە ئازادی بگەڕێتەوە تا ئێستا،  ئێمە وەک کورد پێمان باشە هەر هێزێک دێتە خورماتوو جێگیر دەبێت، پێویستە کوردی تێدابێت، یان  پۆلیسی ئەو شارە ڕێکبخرێتەوەو هەموو پێکهاتەکان تێدا بەشداربن.
 

قائیمقامی لەسەر کارلابراوی خورماتوو، ئەوەشی خستەڕوو،  لایەنی تورکمان  خۆیان کاندیدیان هەیە بۆ پۆستی قائیمقام، بەڵام ناکۆکن  لە سەری، لەو بڕوایەنیم بە ئاسانی بتوانن بسازێن و دایبنێن،  ئەوان پێیان وایە دەبێت قائیمقامەکە تورکمان بێت،  ئەو کارەش ئەوان دەیکەن سیاسییە.

 

 
دەربارەی گەڕانەوەی ئاوارەکانی خورماتوو، شەلال عەبدول وتی: دوای سەردانی شاندی کوردی و کۆبونەوەیان لەگەڵ قائیمقام بە وەکالەت، خۆمان  بە خەڵک دەڵێن بڕۆنەوە یا بمێننەوە.
 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin