Smiley face
Smiley face
Smiley face

پاک: ئامادەین هێز بۆ بەرگریکردن لە عەفرین ڕەوانە بکەین

2018-01-20 20:51:25



ڕۆژنیوز – ناوەندی هەواڵەکان

 

پارتی ئازادیی کوردستان ڕایدەگەیەنێت، کە ئامادەن هیز بۆ بەرگریکردن لە کانتۆنی عەفرین ڕەوانەی ڕۆژئاوای کوردستان بکەن، دەشڵێت:"ئەرکی نەتەوەیی و نیشتمانی هەر تاک و گرووپێکی پارچەکانی دیکەی کوردستانە، کە پاڵپشتیی لە عەفرین بکەن".

 

ئێوارەی ئەمڕۆ، کۆمیەتی ناوەندیی پارتی ئازادیی کوردستان-پاک، لەسەر هێرشەکانی دەوڵەتی تورک بۆ سەر کانتۆنی عەفرینی ڕۆژئاوای کوردستان، بەیاننامەیەکی بڵاوکردەوە.

 

لە سەرەتای بەیاننامەکەدا، هاتووە:"پاش ئەوەی لە ١٦ی ئۆکتۆبەری ٢٠١٧دا بەشێکی زۆر لە خاک و خەڵکی باشوری کوردستان لە گەلەکۆمەیەکی نێودەوڵەتییدا کەوتنە بەر هێرشی سوپاکانی ئێران و عێراق و داگیرکرانەوە، ئێستا دەوڵەتی تورکیا کە یەکێکە لە لایەنەکانی پیلانگێڕیی ١٦ی ئۆکتۆبەر بوو، لە هەوڵدایە بەشی خۆی لەو گەلەکۆمەکییە دژی کورد، لە ڕۆژئاوای کوردستان وەربگرێت، هەر بۆیە عەفرینی داوەتە بەر هێرشی ئاسمانی و هەڕەشەی هێرش و داگیرکاریی".

 

ئەوەش هاتووە:"لەم هەلومەرجەدا، ئەوەی دەتوانێ نەتەوەکەمان و دەسکەوتەکانی لە ڕۆژئاوای نیشتمان بپارێزێ، بەرەنگاریی لێبڕاوانە و یەکڕیزانەی ڕۆڵەکانی نەتەوەکەمانە، ڕووداوەکانی پاش ١٦ی ئۆکتۆبەر سەلماندیان پاراستنی خاک و خەڵک و دەسکەوتەکانی خەباتمان لە گرەوی بەرەنگاریی و شکاندنی هێرشی دوژمنانە لە  گۆڕەپان و بەرەکانی جەنگ".

 

پارتی ئازادیی کوردستان جەختیشی کردووەتەوە:"ئەرکی نەتەوەیی و نیشتمانی هەر تاک و گرووپێکی پارچەکانی دیکەی کوردستانە، کە  بەهەر شێوە و ڕێگایەکی گونجاو پاڵپشتیی لە عەفرین بکەن، تا هەموو ڕۆڵەکانی کورد پێکەوە شکست بەنیازی هێرش و داگیرکاریی تورکیا دژی عەفرین بێنن".

 

لە کۆتایی بەیاننامەکەی پارتی ئازدیی کوردستان-پاک دا هاتووە:"پارتی ئازادیی کوردستان، هێرشی دەوڵەتی تورکیا مەحکوم دەکات و پشتیوانیی خۆی لە بەرگری و بەرەنگاریی شەڕڤانانی رۆژئاوای کوردستان ڕادەگەێنێت، ئامادەین  بە ڕێککەوتن لەگەڵ YPG، هەرچی زووتر یەکەیەک لە هێزەکانی پێشمەرگەمان بۆ بەشداریی لەو بەرەنگارییە ڕەوایە ڕەوانەی رۆژئاوای کوردستان بکەین".

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin