Smiley face
Smiley face
Smiley face

​تۆڕی ڕێكخراوەكانی هەڵەبجە شەشەمین كۆنفرانسی خۆی بەست

2018-01-22 18:41:22



ڕۆژنیوز – جیهاد هەورامی

 

تۆڕی ڕێكخراوەكانی هەڵەبجە شەشەمین كۆنفڕانسی خۆی لەژێر دروشمی "بەرەو كۆمەڵگایەكی شارستانی، نوێ‌ بوونەوە و بەردەوام بوون" ساز كرد.

 

دوانیوەڕۆی ئەمڕۆ، لەهۆڵی مۆنۆمێنتی یادگاری هەڵەبجە، تۆڕی ڕێكخراوەكانی هەڵەبجە شەشەمین كۆنفڕانسی خۆی ئەنجامدا.

 

 

لەسەرەتای كۆنفڕانسەكەش فەرهاد قادر، سەرۆكی تۆڕی ڕێكخراوەكانی هەڵەبجە وتارێكی پێشكەشكرد و وتی:"هەوڵی زۆرمان داوە بۆ هێنانەدی ئامانجەكانمان لەڕێگەی خەباتی مەدەنییەوە، لەساودانی هەڵمەتی داكۆكیكردن، چاودێریكردنی ڕەوشی مافی مرۆڤ و ئاستی خزمەتگوزارییەكان، گەیاندنی داخوازیەكانی خەڵك و بەدواداچوون و گواستنەوەی زانیاری و داتا و ڕاستییەكان بۆ خەڵک".

 

 

وتیشی: پاش سێ‌ ساڵ زیاتر لە بەپارێزگابوونی هەڵەبجە، تا ئێستا بەكردەیی نەبووەتە پارێزگا و جێكەوتێكی ئیجابی ئەوتۆ بۆ ئەم شارە و هاوڵاتیانی نەبووە، لەبەر ئەوە داوادەكەین لەسەرجەم لایەنە سیاسی  ڕێكخراوەكان و دامەزراوەكانی كۆمەڵگای مەدەنی نوێنەرانی كورد لەئەنجومەنی نوێنەرانی عێراق و ئەندامانی پەرلەمانی هەرێم، پێكەوە تواناكانمان یەك بخەین پێش لە یادی شانزەی سێی ئەمساڵ لەم ڕەوشە ئیداریە ناجێگیرە دەرباز بكەین.

 

عەلی عوسمان، پارێزگاری هەڵەبجە بەوەكالەت لە وتارێکدا وتی:"باشوری كوردستان بەبارودۆخێكی تایبەت و لەڕەوشی دژواردا تێدەپەڕێتن، بەڵام تۆڕی ڕێكخراوەكانی هەڵەبجە توانیویەتی هەموو ئەمانە وەلاوە بنێت و دوانەكەوێت لەو پرۆسە دیموكراسییەی كە ساڵانە ئەنجامی دەدات و بۆ ئەمساڵیش لەكاتی خۆیدا كۆنفرانسەكەی ئەنجامدا".

 

 

پارێزگاری هەڵەبجە داواشی لەتۆڕی ڕێكخراوەكانی هەڵەبجە كرد، كە یەكێك لە ڕاسپاردەكانیان بریتیبێت لە ئیدانەکردنی هێرشەکانی دەوڵەتی تورك بۆ سەر عەفرین لەژێر ناوی "عەفرین بانەبێتە دەستە خوشكی هەڵەبجە بەجینۆساید-دا" و ڕایشیگەیاند: ئەوەی ئێستا لە عەفرین ڕوودەدات، سیمبولی ئیرادەی گەلانە، ئیرادەی مرۆڤی باڵایە بۆ هەر تاكێك لە هەر چوار پارچەی كوردستان، بۆیە هاوسۆزی و هاوخەمی خۆم دەردەبڕم لەئاست قوربانیان.

 

تۆڕی ڕێكخراوەكانی هەڵەبجە، تۆڕێكی سەربەخۆی خۆبەخشە و لە بەرواری ١٠-٠٦-٢٠٠٦ دامەزراوە و زۆرترین ڕێكخراوەكانی كۆمەڵگای مەدەنی لە هەڵەبجە لەخۆدەگرێت، كە ژمارەیان ٢٥ ڕێكخراوە و بەدروشمەكانی "خەڵكسازی، قەبوڵكردنی جیاوازی،  دادوەریی كۆمەڵایەتی" كار دەكات.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin