Smiley face
Smiley face
Smiley face

نامەکانی ڤیان جاف بۆ گەلی کورد لە باکور و باشور

2018-02-01 11:06:05



ڕۆژنیوز- ناوەندی هەواڵەکان

 

ڤیان جاف، پێش ئەنجامدانی چالاکییەکەی، نامەیەکی چوار بەشیی نووسی، کە دوای شەهیدبوونی دەنگدانەوەیەکی زۆری لەناو خەڵکدا دروستکرد، لە نامەیەکیدا بۆ گەلی کورد و باشوور بە تایبەت نووسیویەتی"دڵنیام لەوەی كە لەدەمێكی نزیكیدا رۆژی ئازادی كوردان لەدایك دەبێت".

 

لەیلا والی حسێن، ناسراو بە (ڤیان جاف)و(ڤیان کارۆخ) و (ڤیان سۆران) لەساڵی ١٩٨١ لە شاری سلێمانی لە دایکبووە و لە بەهاری ساڵی ١٩٩٧ بەشداری ڕیزەکانی گەریلا بووە، لە شەوی ١/٢ی مانگی شوباتی ٢٠٠٦ لە ناوچەی حەفتانین بە دروشمی"سەر لە نوێ واتادان بە گوتەکانمان" چالاکییەکی گیانبازیی ئەنجام دا.

 

ئەمەی خوارەوە دەقی بەشی دووەمی نامەکەی شەهید ڤیان-ە.

 

بۆ هەموو گەلی كوردی نیشتمان پەروەر و بەرخۆدانڤان:-

 

مێژوو ئەوەی سەلماندووە كە گەلی كورد گەلێكی قارەمان و خۆبەختە، سەرەڕای سیاسەتی نكوڵی، قڕكردن، بەعەرەب كردن، تورك كردن و فارس كردن، بەهەموو كەموكورتییەكانی خۆیەوە هەبوونی خۆی پاراستووە و لەمێژوودا نەسڕاوەتەوە، بەردەوام دەوڵەتە داگیركەرەكان وتوویانە تۆ مەگەر تورك بیت یان عەرەب و فارس بیت مافی مرۆڤ ئاسا ژیان و مافی هاووڵاتیبوونت هەیە.

 

دەوڵەتانی زلهێزی جیهانیش بە بێ‌ ڕاوەستان دەفكرن كەچۆن و كەی و لەكوێ‌ لەپێناو بەرژەوەندی سیاسی خۆیاندا كوردان وەك پیۆنێك بەكار بهێنن و یارییەكەیان قازانج بكەن، توێژی سەردەستی كوردان، واتە بەكرێگیراوەكانی كوردانیش لەپێناو بەرژەوەندی تەسكی حزبایەتی و بنەماڵەیی و تاكەكەسی خۆیاندا بەردەوام لەهەوڵی هەڕاج كردن و بازرگانی كردنی گەلی ڕەنجدەری كوردن.

 

گەلی كورد لەڕەوشێكدا كەنموونەی لەهیچ لایەكی جیهاندا و لەمێژوودا نەبینراوە، گەلێكی گۆشەگیركراو و تەنیایەو وەك كۆمێكی تاوانبار و تێكدەر دەبینرێت‌، ئەم ڕەوشەش بەدرێژایی ٥ هەزار ساڵە هەیە و لەدژی ئەمە كوردان ئەوەندەی توانیویانە بەهەزار شەڕ و شۆڕ و كوشت و بڕین و كۆچبەركردن بەئێشێكی مەزنەوە تەنیا خۆیان پاراستووە و هاتوون هەتا سەدەی بیست و یەكەم.

 

سەرۆك ئاپۆ و تەڤگەری رزگاری نەتەوەیی كوردستان بەدرێژایی زیاتر لە سی ساڵا موداخەلەی ئەم ڕەوشەی كردووە، ئەمڕۆش گەلی كوردی هێناوەتە ئاستی تێكۆشانی وەها ئیدی تەنیا خۆپاراستن و كوشت و بڕین وەك قەدەرێك پەسند ناكات، پڕ بەدنیا هاوار دەكات و هەوڵی دوایی هێنان بە تراژیدیاكانی دەدات و دەیەوێت دەستی چارەسەری دیموكراسی و ئاشتییانەی بۆ درێژ بكرێت، كەچی نە دەوڵەتانی بەناو پارێزەری مافی مرۆڤی جیهان و نەدەوڵەتانی داگیركەری سەر كوردستانیش نەك تەنیا وەڵامی دەستی ئاشتی نادەنەوە، بەڵكو هەتا دوایی بە وەحشیەتێكی مەزن بە شەڕ و فشار وەڵامی دەدرێتەوەو تەسلیمیەت و نۆكەرێتی بەسەردا دەسەپێنرێت.

 

ئەمەش گرێداراو بەكۆمپلۆی نێودەوڵەتی لەچوارچێوەی كۆنسێپتێكی نوێدا بەڕێوەدەچێ‌. ناوی ئەم كۆنسێپتەش بێڕوومەتكردن و شكاندنی ئیرادەی كوردی سەربەخۆیە، واتە كورد ئینكار ناكات، بەڵام چارەسەرییەكی بێ‌ سەرۆك، بێ‌ پەکەکە بەبنەما دەگرێت‌، بۆیە شتێكی رێكەوت نییە كە لەلایەك هێرش دەكاتە سەر گەریلا و گەلی چالاكڤان و سەرۆك و لەلایەكی دیكەشەوە كوردە گوێڕایەڵەكانی خۆیان خستۆتە ناوەندی پرۆژەی رۆژهەڵاتی ناوینی مەزنەوەو بەڵێنی ئاواكردنی دەوڵەت و ستاتۆیەكی گرێدراوی خۆیانیان پێدەدەن.

 

وادیارە ساڵی ٢٠٠٦ زۆر بەگەرمی تێپەڕ دەبێت، دوژمن شەڕی هەمەلایەنە (تۆپ یەكون)ی ڕاگەیاندووە و پەیتا پەیتا پێكی دەهێنێت‌، لەسەر ئەم بنەمایەش پێویستە ئێمەش وەكو گەلی كورد لەهەرلایەك تێكۆشانێكی هەمەلایەنەی بەهێز پەیڕەو بكەین و ساڵی 2006 تەنیا وەكو ساڵی خۆپاراستن نابێت، بەڵكو بیكەینە ساڵی دیاریكردنی چارەنووسی كوردان و چارەسەری بكەینە ئامانج، لەم لایەنەوە گەرەنتی سەركەوتن لەدەستی ئێمەدایە بەمەرجێ‌ هەركەس بەكاری خۆی هەستێت و لەشەڕی پاراستنی ڕوومەت و ئیرادەی خۆی و گەلەكەیدا جێ بگرێت.

 

هەر تاكێكی كورد، هەر دەزگا و رێكخراو و پارتییەك، هەر گوند و شار و شارۆچكە و شارەوانییەك هەر چین و توێژێك كە خۆی بەمرۆڤ و بەكورد دەزانێت‌ دەبێت لەم ساڵەدا خاوەن نەخشەیەكی چالاكی بێت، ئامانجی ئەم نەخشەیەش تەنیا و تەنیا ئازادی و سەركەوتن بەبنەما بگرێت، ئیدی بێ‌ باوەڕی و بنكەوتن نا، بەڵكو لەسەدەی بیست و یەكەمدا بە تێكۆشینی جەوهەری خۆمان چارەنووسی خۆمان دیاری بكەین.

 

لەدەمی نزیك و دووردا دەبێت سێ‌ شت بكەینە ستوونی سەرەكی نەخشەی چالاكییەكانمانەوەو هەموو هێزو توانا و بەهرەمەندییەكانمان لەو پێناوەدا بخەینە گەڕ، یەكەمیان وەكو گەلی كورد و ژنانی كورد دەبێت لە پێناو ئازادی سەرۆك ئاپۆ بەردەوام هەنگاوی "بێ‌ سەرۆك ئاپۆ ژیان نابێ‌" هەڵبهێنین و ئەم راستییە لەچوارچێوەی دروشمێك دەربخەین.

 

بۆ ئەمەش دەبێت هەر رۆژێكمان وەك ١٥ی شوباتی ١٩٩٩ بەرۆح و بەگەرمی دەربازبكەین، بەڵام بەشێوەیەكی زانستیتر و بە ڕێكخستن بێت، چونكە ١٥ی شوباتی ١٩٩٩ بەڕاستی شاهانە بوو، بەتەواوی مرۆڤی كورد سەلماندیان كەسەرۆك ئاپۆ بۆ ئەوان راستییەكی دەست لێبەرنەدراو و ڕاستییەکی سەرەكی شەڕ و ئاشتییە، لەو بڕوایەدام جارێكی دیکە ڕەفلێكسی كوردان لەدژی كۆمپلۆ جارێكیدی بگەڕێتەوە بۆ دەمی ١٥ی شوبات.

 

مسۆگەر گۆڕانكارییەكی جددی لە ڕەوشی سەرۆكدا دروست دەكات و لەدەمێكی كورتدا زەمینەی ئازادی و سەربەستبوونیشی گەرەنتی دەكەین، چونكە رۆحی بەرخۆدانی و بوێری گەلی كورد لە ١٥ی شوباتی ١٩٩٩دا رۆحێك بوو دنیا لەبەرامبەریدا دەلەرزی، بەم بۆنەیەوە بانگ لەتەواوی گەلی كورد و لەهەرچوار لای جیهان دەكەم كە ١٥ی شوباتی ئەم ساڵیش بكەینە سەرەتایەكی نوێ‌ لەتێكۆشانی ئازادیماندا.

 

دووەمیان لە سەر هێڵی پاراستنی ڕەوا بێ‌ ئەوەی خوێن ڕشتنی مرۆڤ بكەینە ئامانج و زەرەر بەیەكێتی نێوان گەلان بدەین دەبێت‌ شانبەشانی چالاكی بەرخۆدانی دیموكراتی تەواوی گەنجان و ژنان هەریەك وەك گەریلایەك ڕووی خۆیان بكەنە چیاكان و هاوكاری لەشارەكانیشدا بەبەكارهێنانی مافی مسیللەمە(بەرپەرچدانەوە) تەنیا لە HPG چاوەڕوان نەكەن، سەرچاوەی ماددی و مەعنەوی هێزە شەڕخوازەكان و ئەو دام ودەزگایانەی دەوڵەت بكەنە ئامانج كە ڕۆڵیان هەیە لەقووڵكردنەوەی بێ‌ چارەیی و قڕكردنی كورداندا.

 

گەنجان و ژنانی كورد وەك دوێنێ‌ كردوویانە، ئەمڕۆش دەتوانن چوارچێوەی چالاكی پاسیڤ تێپەڕێنن و هەریەك وەك گەریلایەكی شار چالاكی مەزن بكەنە ئامانج، چونكە ئەمڕۆ رۆژی هەوڵ و هیممەتە و دانیشتن و لاوازی چالاكییەكانمان بەدەلی گەورە و ئەنجامێك كە حەقمان نەكردووە، لەگەڵ خۆیدا دێنێت‌، بۆ ئەمەش دەرفەت هەیەو دەوڵەت لەنێو لەزرینێكدایە و هێندە بەهێز نییە.

 

بۆیە چالاكی لەچوارچێوەی پاراستنی جەوهەریدا ئەنجام بدەین، ناچار دەبێت كەئیمرالی بكاتە ئەدرێسی موخاتەبی خۆی و دەستی ئاشتی بۆ كوردان درێژ بكات، كاتێک وابوو ئەوا ژن و گەنجی كورد هیوا و داخوازی ئاشتیمان بە واتا دەبێت‌، چونكە ئاشتی ڕەنجی دەوێت و بەدەلی گەورەی دەوێت‌.

 

لە نەخشەی چالاكییەكانی گەلدا ستوونی سێهەم پێشخستن و رێكخستنی سیستمی كۆنفیدڕاڵیزمی دیموكراتی كوردستانە، لەو لایەنەوە بەردەوام رەخنەی سەرۆك هەیە و ئاماژە بەگران حەرەكەت كردنی دامودەزگا و ڕێكخراوە بەرپرسیارەكان دەكات، پێوانێكی سەرەكی بۆ وەڵامدانەوەی شەهیدان و خاوەن دەركەوتن لە ڕەنج و تێكۆشانی بەساڵانەی گەلەكەمان هاوكات گرێدانمان بەسەرۆكەوە ئاواكردنی سیستمی كۆنفیدڕاڵیزمە.

 

كۆنفیدڕاڵیزمی دیموكراتیك هێڵی چارەسەری دیموكراتی سیستمی بەڕێوەبەرایەتی جەوهەری گەلی كوردە، ئەگەر بێت و ئەم سیستمە باش تێبگەین و هەموو بوارەكانی لەژێرەوە بەرەو ژوور ڕێک بخەین، ئەوا بەهیچ شێوەیەك موحتاجی دەوڵەت نابین و بەدەستهێنانی مافی زمان و كولتوور و ناسنامەكەمان لەدەوڵەت نا، بەڵكو لەخۆمان چاوەڕوان دەكەین، لەم چوارچێوەیەدا بەشداربوونێكی هەمەلایەنە واتە سیاسی و عەسكەری و رێكخستنی و.... هتد ئەنجام بدەین.

 

دڵنیام لەوەی كە لەدەمێكی نزیكیدا رۆژی ئازادی كوردان لەدایك دەبێت و هەروەكو چۆن قۆناخی شۆڕشی ژیانەوەی نەتەوەییمان بەسەركەوتوویی پێشخست، ئەوا ئەمڕۆش بەڕەنج و ئیرادەی خۆمان قۆناخی چارەسەری دیموكراتیش بەسەر دەخەین و دوایی بەتراژیدیای نەتەوەیی دێنین.

 

منیش وەك رۆڵەیەكی ئێوە بۆ بەشداربوونی چالاكییەكانتان و دانەوەی قەرزەكانم بە ئێوەی هێژا و ماندوونەناس لە یەكێک لە لوتكە چیا پیرۆزكانی كوردستاندا سەختی و سنووری دروستكراوی دوژمن لەنێوان گەریلا و گەلدا و سەرما و سۆڵەی زستان دەبەزێنم و بەچالاكییەكی ئاگرین دەمەوێت‌ گرێدان و راستگۆیی گەریلاتان پێ‌ ڕابگەیەنم و مژدە و پەیامی ئەوە بدەم كە سەرباری هەموو كەموكورتییەكانمان هەتا زەڕەیەك فكر و رۆحی كوردایەتی و PKKمان تێدا بێت، سەما ئاسا و سەردار ئاری ئاسا بەئیرادە و بڕیار ئامادەین بۆ خۆفیداكردن و دەڵێم سەركەوتن و ژیانكردن لە ژیانێكی پڕ لەئاشتی و ئازادیدا زۆر دوور نییە، ئەگەر دووریش بێت، هەرگیز زەمان ناتوانێت باوەڕی و ئیرادەی تێكۆشانمان ببەزێنێت لەدواییدا دەڵێم چ شادم كە منداڵی گەلێكی وەك ئێوەم.

 

بۆ گەلی كورد لەباكووری كوردستان:-

 

زۆر بەحەسرەتەوە بووم كە ڕۆژێك لە چیاكانی باكووری كوردستانەوە دابەزم و بەرەو گەرمایی سەرهەڵدانەكانی ئێوەوە بەڕێ بكەوم، هەموو هیواو ئاواتم ئەوەیە كە بەئازادی و لەنێو كەشێكی ئاشتیانەدا بەزمان و كولتوور و ناسنامەی نەتەوەیی خۆتان بژین و ئیدی مرۆڤ ئاسا بژیانایە، لەوانەیە من وەكو شەخس نەیبینم، بەڵام لە ئێستاوە ئەم ڕاستییە هەست دەكەم و پێی باوەڕم، زاتەن بینینی ئێمە زۆر گرنگ نییە بەس بە شەرتێک‌ ئەو منداڵانە بیبینن كە بەدەستە خنجیلانەكەیان بەرد دەهاوێژنە ئەو كابووسانەی كە خەو و خەیاڵە رەنگاوڕەنگەكانیان دەشێوێنن و دواڕۆژیان رەش دەكەن،

 

سەرۆك ئاپۆ نزیكی ئێوەیە زۆر بەشانسن، بەڵام باریشتان زۆر گرانە دەزانم، چونكە ئەو تەنیا سەرۆكی گەلێك نییە، بەڵكو ئەمانەتی مرۆڤایەتی و مێژووە، بۆیە ئازادكردنی و پاراستنی زۆر زەحمەتە، ماندوونەناسی و تێكۆشانی ئێوەش بێ‌ ڕاوەستان لێرەوە سەرچاوە دەگرێت، بۆیە پیرۆزە و منیش لەگەڵ ڕەخنەدایینی خۆمدا لەبەرامبەر ئێوەدا پیرۆزباییتان لێ دەكەم، هیوادارم لێرە بە دواوە بەهەڵمەتی كۆكردنەوەی ئیمزا بۆ ڕیفراندۆمی دیموكراتی گەلی كورد و هەموو چالاكییە دیموكراتییەكانی دیكە قۆناخی چارەسەری دیموكراتی قازانج بكەین.

 

لەدواییدا بانگ لەتەواوی گەلی خۆشەویستم دەكەم كە لەدەوروبەری سەرۆك ئاپۆ و دامودەزگا و رێكخراوەكانیدا كۆ ببینەوە و هیچ كەس و گرووپ و دەستە و تاقمێكی بێ‌ هیوا و لاواز نەكەینە ئاستەنگ، تەنیا و تەنیا، چا‌ومان لەسەركەوتن بێت.

 

لەگەڵ سڵاو و رێزمدا.

 

بۆ گەلی كورد لەباشووری كوردستان:-

 

سەرەتا لەناو جەرگەی چیا سەركەشەكانی كوردستانەوە وەك كچە گەریلایەك سڵاو و رێز و دڵسۆزی خۆمتان پێشكەش دەكەم، هاوكات خۆشحاڵم و لەدڵەوە پیرۆزبایی ئەو سەركەوتن و دەسكەوتە مێژووییانەی ئەمڕۆی باشووری كوردستانتان لێدەكەم كەبەرهەمی خوێنی بە هەزاران شەهید و ڕەنجی تێكۆشانی سەدان ساڵەی گەلەكەمانە، ئەو پێشكەوتنانەی ئەمڕۆ لەكوردستاندا هەیە، ئێوەی نیشتمانپەروەری دڵخۆشكردووە بەگەلێك بەدەل و قوربانیدانی مەزن و پیرۆزی وەك هەڵەبجە و ئەنفال و دەربەدەری و كوشتن و بڕین بەدەستهاتووە.

 

پاراستن و بەرگریكردن لەبەئیرادەبوونی گەلی كورد لەپرۆسەی دیموكراتیزەكردنی ئێراق و ئاواكردنی سیستەمی نوێی دەوڵەتدا ئەركی هەر كوردێكی بە شەرەف و نامووسە و دژایەتی كردنیشی واتای نیازخراپییە، لێرەدا خاڵی هەرە گرنگ ئەوەیە كە گەلەكەمان بەوپەڕی هەستیاری و هۆشیارییەوە ئەم دەسكەوتانەی خۆی بپارێزێت و هەوڵی پێشخستنی بدات، چونكە دەبێت باش بزانین كەهێشتا لەكوردستان و هەرێمەكەدا بەگشتی هەڕەشەو زەنگی مەترسی شەڕ و شۆڕ و پیلانە گڵاوەكانی دوژمنان لەسەر گەلی كورد بەلاوە نەنراوە و پێویستی بەهەڵوەستەكردنێكی گشتگیرانە هەیە.

 

دەوڵەتانی ڕۆژئاوا بەگشتی و ئەمریكییەكانیش بەتایبەتی سەرباری ئەوەی كەخۆیان سەبەبی دروستبوونی كێشەی كوردستانن لەمێژوودا، ئەمڕۆ بێ شەرمانە پیاوەتی بەسەر ڕەنجی گەل و خوێنی شەهیدانمانەوە دەكەن، خۆیان بەخاوەن و ئافرێنەری دەسكەوتە مێژووییەكانی ئەمڕۆی كوردستان دەزانن و دەیانەوێت باشووری كوردستان بكەنە قەڵایەك بۆ پاراستنی بەرژەوەندییە سیاسییەكانی خۆیان لەرۆژهەڵاتی ناویندا، هەتا ئێستاش لەلایەك بە دوای ئەو فڕوفێڵانەوەن كە چۆن و كەی و لەكوێ‌ كوردی باشوور لە دژی دەوڵەتانی وەك توركیا و سوریا و ئێران بەكاربێنن.

 

لەلایەكی تریشەوە بۆ ئەوەی كوردان سنووری ئەو تێنەپەڕێنن و لەژێر كۆنترۆڵی خۆیدا بێت، هەوڵی ئەوەش دەدات كەباشووری كوردستان بكاتە داوێك بۆ كوردی پارچەكانی دیكەی كوردستان و بەمەش كوردان لەدژی یەكتر بەكاربهێنێت،  كاتێ‌ لە لایەك پەکەکە دەخەنە لیستی تیرۆرەوەو سەرۆك ئاپۆ دەخەنە زیندان و لەلایەكی تریش بۆ سەرۆكی پارتییەكانی باشوور ‌و فیدراسیۆنی كوردانیش دەڵێن "قبوڵە"، شتێكی رێكەوت نییە و دەبێت باش ببینرێت‌ و وەكو گەلی باشوور پەسندی نەكەین.

 

دەوڵەتانی توركیا و سوریا و ئێرانیش بەردەوام لەهەوڵی لە باربردنی ئەزموونی باشووری كوردستانن و لەسیاسەتی دژایەتی كردن و دوژمنایەتی پاشگەز نابنەوە، هەرچی هێزی دەسەڵاتداری كوردانیشە بە تایبەتی توێژی سەردەست و بەرژەوەند پەرست و حزب و بنەماڵەكانیشە، کە لەژێر ناوی سیاسەت و كوردایەتیدا دەمامكیان لە ڕوی خۆیان داوە و بازرگانی بەخوێنی گەلەوە دەكەن، لەقۆناخێكی وەها چارەنووسساز و گرنگدا كە لەهەر چوارپارچەی كوردستان و لەباكووری كوردستاندا بەتایبەتی گفتوگۆ لەسەر ئەوە دەكرێت دیالۆگی چارەسەری سیاسیانەی كێشەی كورد بكرێت‌.

 

وتنی بەڕێز "مام جەلال" كە بە توركیا و ئەمریكا دەڵێت " با ئاپۆ بێ‌ دەنگ بكەن" عەیبێكی زۆر گەورەیە و پێویستە پەسند نەكرێت، ئیدی شەرمە بۆ كوردان كە لەدژی یەكتری پیلان و تەڵە دابنێن، چونكە لاوازی كوردی هەر پارچەیەك دەبێتە لاوازی تەواوی كوردستان و چارەنووسی هەر چوارپارچەی كوردستان وەكو گۆشت و نینۆك پێكەوە گرێدراون، بەتایبەتی هەتا كێشەی كورد لە پارچەی مەزنی كوردستان واتە باكووردا چارەسەر نەكرێت‌ مەحاڵە كوردی پارچەكانی دیكە بەشەرەف و بەئازادی بژین، لەسەر ئەم بنەمایە بانگ لە تەواوی گەلی كوردی باشووری كوردستان دەكەم كە بێ‌ دەنگی و بێ‌ بەرپرسیارێتی لەبەرامبەر شۆڕشی باكووری كوردستان پەسند نەكەن، چونكە بێ‌ دەنگی دەبێتە هۆی مردن و بە مردوویی لەدایكبوونی ئیرادەو دەسكەوتی نوێی كورد لەباشووردا و زۆر درێژە ناكێشێت.

 

باهەموو ژن و منداڵ و گەنج و پیر و رۆشنبیر دەنگی خۆیان بۆ ریفراندۆمی دیموكراتی و پاراستنی سەرۆك ئاپۆ و پەسندكردنی وەك ئیرادەی سیاسی كورد بدەن، بەهەموو هێز و تواناكانیانەوە پشتگیری خۆیان لەگەڵا چالاكییەكانی گەل لەهەموو پارچەكانی دیكەی كوردستاندا بكەن، لەم لایەنەوە بیروباوەڕی من بە ڕۆحی بەرخۆدانی گەلەكەم هەیە، چونكە گەلی باشوور گەلی خۆبەختكردن و گەلی هەڵەبجە و سەرهەڵدانی ئازادییە.

 

منیش وەك كچێكی ئێوە نزیكی ١٠ ساڵە بە كولتووری بەرخۆدانی كە لەئێوەوە وەرمگرتووە و ئەو زانابوون و ئیرادەیەی كە لەسەرۆك ئاپۆ و پەکەکە و تەڤگەری ئازادی ژنی كوردەوە وەرمگرتووە، لەچیاكانی كوردستاندا لەهەوڵ و تێكۆشاندام بۆ ئازادی گەلی كورد و ژنی كورد و هەموو هەوڵا و هیوا و ئاواتێكم ئازادی گەلی كوردی هەر چوارپارچەیەو دیموكراتیزەبوون و ئازادی زیهنییەتە لەباشووری كوردستاندا و دوای هێنان بە ئینتیحار و بێچارەیی و كۆیلایەتی ژن و ڕاكردنی گەنجان لەوڵاتی خۆیان و هەموو كێشە كۆمەڵایەتییەكانی دیكە.

 

لەسەر ئەم بنەمایەش ئەمڕۆ بەچالاكییەكی گیانبازی دەمەوێت‌ هەڵوێستی خۆم بۆ گرێدان بەم ئامانجەوە نیشان بدەم و پەیامێك بەئێوەی هێژاش بگەیەنم ئەم چالاكییەی من وەك ئینتیحاری ئەو ژنانە نییە كە لەبێزاری و بێچارەییەوە سەرچاوەی گرتبێت‌، بەڵكو چالاكییە لەپێناو ئەشقی ژیان و پێشخستنی زیهنییەتی چالاكی ئازادیدایە و درێژەپێدەری نەریتی بەرخۆدانی ژنانی وەك "لەیلا قاسم و زیلان و سەما یوجە"كانە، چەند شاد دەبم بەوەی كە ئەم پەیامانەم و چالاكییە بگاتە گوێی تەواوی گەلەكەم و تەواوی گەلی كورد و كەمێكیش بێت وزەیەك بدەمە تێكۆشین و جموجوڵێكی نوێ‌ لەنێو گەلی باشووری كوردستاندا.

 

لەدواییدا وەك كادیرێكی ژنی باشووری كوردستان ڕەخنەی خۆم دەدەم بەوەی كە وەک پێویست پێشەنگایەتییەكی بەهێزم ئەنجام نەدا و سەرۆك ئاپۆ و ئایدیۆلۆژیای ڕزگاری ژن كە ئایدیۆلۆژیای شۆڕشی كۆمەڵایەتی باشوورە بەباشی پێم نەناساندن.

 

لەگەڵ رێز و سڵاومدا

١ی شوباتی ٢٠٠٦ 

 

ــ بژی رێبەر ئاپۆ

ــ بژی پەکەکە و پەکەکە

ــ بژی کەژەبە  و کەکەکە

ــ بژی هەپەگە و یەژاستار

ــ بژی هەموو شەهیدانی رێگای ئازادی

ــ بمرێت خیانەت و كۆمپلۆی نێودەوڵەتی

ــ بمرێ‌ هەموو جۆرە پاشڤەڕۆیەتی و دەسەڵاتدارێتی

 

د.خ

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin