Smiley face
Smiley face
Smiley face

کۆدەنگیی لەنێوان پەرلەمانتارە ژنەکانی هەرێمدا نییە

2018-02-17 14:20:00



ڕۆژنیوز- قەرەچوغ ئەنوەر

 

ژنانی چالاکوان ڕەخنە لە پەرلەمانتارە ژنەکانی هەرێم دەگرن، کە نەیانتوانی ڕیگربن لە تێپەڕینی بڕیارێبڕیاری هەڵوەشانەوەی لیژنەی ژنان، پەرلەمانتارێک-یش دەڵێت:"نەماتوانیی فشار دروستبکەین، چونکە کۆدەنگیی لەنێوان ژنانی پەرلەماندا نییە".

 

 لە چەند ڕۆژی ڕابردوودا پەرلەمانی ھەرێمی کوردستان لە کاتی گفتوگۆکردن لەسەر ھەمواری پەیڕەوی ناوەخۆی لە یەکێک لە بڕگەکان کە تایبەت بوو بەڕێکخستنەوەی لیژنە ھەمیشەییەکان بەکۆی دەنگی زۆرینەی ئەندامان، لیژنەکانی (داکۆکییکردن لەمافی ئافرەتان، کاروباری کۆمەڵایەتی و خێزان، مافی مرۆڤ) کران بە یەک لیژنە، ئەمەش ناڕەزایی ژنانی بەدوای خۆیدا هێنا.

 

سۆز بەشیر،ئەندامی ڕێکخراوی دابین بۆ گەشەپێدانی دیموکراسیی و مافی مرۆڤ بە ڕۆژنیوزی ڕاگەیاند:"بچوککردنەوەی لیژنەی ژنان نیگەرانی زۆری لە لا دروست کردووین، چونکە ژنان پێگەیەکی گرنگیان ھەیە لەکۆمەڵگادا".

 

 

هەروەها، دانێر قەرەداغی، چالاکوانی بواری داکۆکیکردن لە مافی ژنان، ڕەخەی لە پەرلەمانتاران گرت و  بە ڕۆژنیوز وت:"پەرلەمانتارەکانی ئێستا بانگەشەی ئەوەیان دەکرد، کە کار بۆ ژنان دەکەن، کەچی پێچەوانە دەرچوو، بەشێک لە ژنانی پەرلەمانتار دەنگیان بە بچوککردنەوەی لیژنەی ژنان داوە".

 

 

دانێر، وتیشی:"بەداخەوە حزبەکان پەرلەمانتارانیان ئاراستە ناکەن بۆ مافی ژنان تێبکۆشن، چونکە بڕوایان بە مافی ژن نییە".

 

نیگار عومەر، لە ڕێکخراوی کۆژین بۆ گەشەپێدان کە لەسنوری گەرمیان کاردەکات بە ڕۆژنیوزی ڕاگەیاند:"ئەوەی لەپەرلەمان کرا پێشێلکردنی مافی ژنانە و بەم کارەشیان ناتواندرێت مافی ژنان دەستەبەربکرێت و گرنگی بە ژن بدرێت".

 

 

لەبەرامبەردا، حەیات مەجید، ئەندامی لیژنەی داکۆکییکردن لە مافی ژنان بە ڕۆژنیوزی ڕاگەیاند:"ڕێکخراوەکان هەر قسەیەکیشیان بێت لە سەر پەرلەمانتارانی ژن، ئەوا هەڵە تێگەیشتنێک هەیە، چونکە ئەوەندەی لیژنەی ژنان کاری کردووە بۆ ژنان لە ناو پەرلەماندا هیچ لیژنەیەکی دیکە کاری نەکردووە".

 

حەیات، وتیشی:"لیژنەکانی پەرلەمان هەمووی گۆڕانکارییان تێدا دەکرێت و لە ٢٢ لیژنەوە دەبێت بکرێنە ١٦ لیژنە، واتە لیژنەکان هەندێکیان دوو دوو و هەندێکیان سێ سێ تێکەڵ دەکرێن، بە تایبەت ئەوانەی نزیکن لە یەکترەوە".

 

 

ئەو پەرلەمانتارە نەیشاردەوە، کە سەربەخۆنەبوونی لیژنەی ژنان کاریگەری خراپی دەبێت و وتی:"دڵنیاشتان دەکەمەوە کێشەی ژنان ئەوەندە زۆرن، کە تا پەنجا ساڵی تریش دەتوانین کاری لە سەر بکەین".

 

لەبارەی هۆکاری ڕێگرییکردن لە بڕیارەکەش، حەیات مەجید، وتی:"ئێمە دەتوانین بە پێشکەشکردنی هەموارێک ڕەتیبکەینەوە، بەڵام جێبەجێکردنی بڕیارەکە بۆ خولی داهاتوویە و ئێمە لەم خولەدا کاری خۆمان هەر بەردەوام دەکەین".

 

هەرچەندە بڕیارەکە لەم خولەی پەرلەماندا دراوە، بەڵام ئەو پەرلەمانتارە بەرپرسیارێتییەکەی لە ئەستۆی خۆان لابرد و وتی:"ئەگەر ئێمەش لە خولی داهاتو نەبین، ئەوا لەلایەن ژنانی دڵسۆزەوە دەتواندرێت هەڵبوەشێنرێتەوە و کاری باشیش بکرێت".

 

لە وەڵامی ئەو پرسیارەی، کە بۆچی لەم خولەدا بڕیارەکە هەڵنەوەشێندرایەوە؟، حەیات مەجید، وتی:"نەماتوانی کاری جدیی بکەین بۆ هەڵوەشاندنەوە و فشار خستە سەر پەرلەمان، چونکە کۆدەنگی نییە لە نێوان ژنانی پەرلەماندا".

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin