Smiley face
Smiley face
Smiley face

ژنانی ڕێکخراوەکان بۆ پشتگیریی عەفرین کۆبوونەوە

2018-02-18 16:25:17



ڕۆژنیوز - سەمیرا شەهابی

 

بەشێک لە ژنانی چالاکوان و ژنانی ڕێکخراوەکانی، بەئامانجی بەهێزکردنی پشتیوانییەکانی بۆ بەرخۆدانی عەفرین، کۆبوونەوەیەکیان لە شاری سلێمانی ئەنجامدا.

 

ئەمڕۆ کاتژمێر۲:۳۰ خولەک، لە هۆڵی ئەمنەسوورەکە لە شاری سلێمانی، بە مەبەستی دروستکردنی کۆدەنگی گشتیی و هاوکات دۆزینەوەی میکانیزم بۆ بەهێزکردنی پشتیوانییەکانی عەفرین، ئەنیستیتیوی وۆرک بۆ گەشەپێدانی دیموکراسیی wid و ژنانی ڕۆژئاوا کۆبوونەوەیەکیان ڕێکخست.

 

سەرەتای کۆبوونەوەکە بە خولەکێک وەستان بۆ ڕێزگرتن لە خوێنی شەهیدان دەستیپێکرد، هەروەها دۆکۆمێنتارییەکیش لەسەر بەرخۆدانی ڕۆژئاوا پێشکەشکرا.

 

 

لە کۆبوونەوەکەدا، ئاشتی عەبدوڵا، سەرۆکی ڕێکخراوی ئەنیستیتیوی وۆرک بۆ گەشەپێدانی دیموکراسیی، وتارێکی پێشکەشکرد و وتی: ئامانجی سەرەکیمان لەم کۆبوونەوە پشتیوانیکردنی ژنانە لە عەفرین و کارکردنی ئێمە لێرەوە بۆ پشتیوانیی ژنانی ڕۆژئاوا و بەرخۆدانیان بەرز دەنرخێنین.

 

 

لە ڕێگای پەیوەندیی تەلەفۆنیشەوە، ئاسیا عەبدوڵا، هاوسەرۆکی دەستەی بەڕێوەبەریی تەڤگەری کۆمەڵگای دیموکرات-تەڤدەم، وتارێکی پێشکەشی کۆبوونەوەکە کرد و سڵاوی نارد بۆ ئامادەبووان و وتی: عەفرین مانگێ بەرخۆدانی مێژوویی تێپەڕاند و هێرشی تورکیش بەردەوامە لە هێرشەکان و گەلیش بە بەرخۆدانەوە لە بەرامبەریان ڕاوەستاوە، ئەم بەرخۆدانە بۆ تەواوی کوردستان هێزێکی مەزن و گرنگە، بەتایبەت بۆ ژنان.

 

ئاسیا عەبدوڵا، ڕاشیگەیاند: سەرکەوتنێکی مەزنە و ئەم ماوە زۆرەی بەرخۆدانی عەفرین دەگەڕێتەوە بۆ هێزەکانی ڕۆژئاوا کە شۆڕشی بێوێنە بەڕێوە دەبەن و شەڕیان کردووە و گیانی خۆیان خستووەتە سەر دەست لەپێناو خاک و گەلدا، ئەم شۆڕشە نەک تەنیا لە بەرامبەر داعش یان دەوڵەتی ناتۆ، بەڵکو وەڵامێکی بەهێزە بۆ دوژمنان کە بە ڕۆحی ئاڤیستا خابور ناهێڵین هیچ داگیرکەرێک پێ بخاتە سەر خاکمانەوە.

 

لەبەشێکی دیکەی قسەکانیدا، ئاسیا عەبدوڵا وتیشی: ژنانی باشوریش دەتوانن پشتیوانی لە بەرخۆدان عەفرین بکەن و دەخوازین کە شاندێک لە باشورەوە سەردانی عەفرین بکەن بۆ خاوەنداریەتیکردن لە شۆڕشی ڕۆژئاوا.

 

هەر لە کۆبوونەوەکەدا، هێڤا عەرەبۆ، هاوسەرۆکی هەرێمی جزیرە-ی ڕۆژئاوای کوردستان وتی: پرسی عەفرین بووەتە ڕۆژەڤی هەموو دنیا، کە بەرخۆدانێکی مەزنیان دەستپێکردووە و تا ئێستاش بەردەوامە، بە تایبەت لە ڕووی سیاسیی و سەربازییەوە، بە بەشداری ژنان و خۆڕاگریی ژنانی کورد و ئازایەتییان بۆ دونیا ئاشکرابووە و خەباتێکی نەتەوەییە بۆ بەدەستهێنانەوەی مافە ڕەواکانی گەل تایبەت ژنان.

 

 

لە میانەی کۆبوونەوەکەدا، ڕاو و سەرنجی ئامادەبووان وەرگیرا و ئەنجامی کۆبوونەوەکەش بە چەند بڕیارێک لە داهاتووی نزیکدا ڕادەگەیەنرێت.

 

ب.ل

ئەوەی زیاتر خوێندراوە


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin