Smiley face
Smiley face
Smiley face

ئاماری جیابوونەوەی خێزانەکان لە ‌هەڵکشاندایە

2018-03-02 09:36:41



ڕۆژنیوز- سەمیرا شەهابی

 

ئاماری جیابوونەوەی خێزانەکان لە سنوری پارێزگای سلێمانی ڕووی لە هەڵکشان کردووە، پارێزەرێک ڕایدەگەیەنێت، کە هاوسەرگیری پێشوەختە و بەکارهێنانی ناتەندروستی تۆڕە کۆمەڵایەتییەکان، بووەتە بەشێک لە هۆکارەکانی هەڵوەشاندنەوەی خێزانەکان، کۆمەڵناسێکیش بەگرنگی دەزانێت، کە تاکەکان لە تەمەنی گونجاودا هاوسەرگیریی بکەن.

 

بەپێی ئاماری بەڕێوەبەرایەتی ڕەگەزنامە و باری شارستانیی سلێمانی، لە ساڵی ٢٠١٧دا لە سنووری پارێزگای سلێمانی، هەزار و ٤٩١ حاڵەتی جیابوونەوەی هاوسەرەکان تۆمارکراوە، هەر بەپێی هەمان ئامار، له‌ سەرەتای ساڵی ٢٠١٨وە، ٩٥ حاڵەتی جیابوونەوە لە سلێمانی تۆمار کراوە.

 

لەبارەی هۆکارەکانی هەڵکشانی ڕێژەی جیابوونەوەی هاوسەرانەوە، پارێزەرێک و کۆمەڵناسێک بۆ ڕۆژنیوز دەدوێن.

 

نیگار عومەر، پارێزەر، دەڵێت: هۆکارەکانی جیابوونەوە زۆرن و بەپێی تەمەنەکانیش جیاوازە، ئەوەی کە ئێمە لە دادگا و ڕێکخراوەکاندا ڕووبەڕووی دەبینەوە، زۆرترین جیابوونەوەکان لە تەمەنێکی کەمدایە، چونکە لە تەمەنێکی سەرەتاییدا بڕیاری هاوسەرگیری و چوونە ژێرباری ژیانێک دەدەن، کە تەنیا خۆشەویستی بە کۆڵەکەی ئەو ژیانە دەبینن، لە کاتێکدا کۆمەڵێک بەرپرسیارییەتی گەورە لەخۆ دەگرێت.

 

 

نیگار ئەوەشی وت: زۆرینەی جیابوونەوەکان دەگەڕێتەوە بۆ سەرپێی بڕیاردان و ئاستی پەروەردەیی، کە وەک پێویست نییە، شیکردنەوەی سیستمی ژیان بۆ تاکەکان، بۆیە بابەتی هاوسەرگیری بابەتێکی هەستیارە و کەمتەرخەمی لە هەمووماندا هەیە لە ئاستی هۆشیارکردنەوەی تاکەکاندا.

 

ئەو پارێزەرە، ئەوەش دەخاتەڕوو: لەم دواییانەدا بەکارهێنانی تۆڕە کۆمەڵایەتییەکان بە شێوەیەکی نادروست بووەتە مژارێکی دیکە بۆ هەڵوەشاندنەوەی خێزانەکان لە یەکتری و کەمتەرخەمبوونیان بەرامبەر یەکتر و لە هەردوو ڕەگەزدا.

 

هەروەها سەرکەوت عەبدولقادر، کۆمەڵناس، ئاماژە بەوەدەکات: ململانێ ئابوورییەکان و گیروگرفتە کۆمەڵایەتییەکان بەرۆکی تاکەکانی ناو کۆمەڵگای گرتووە، وای لەو تاکانە کردووە کە پەنا بۆ هەڵوەشاندنەوەی خێزانەکانیان ببەن، بەتایبەت ئەوانەی کە ماوەیەکی کەم ژیانی هاوسەری پێکدێنن.

 

 

ئەو کۆمەڵناسە، بۆ کەمکردنەوەی ڕێژەی جیابوونەوەی خێزانەکان، هاوسەرگیریکردن لە تەمەنی گونجاودا بە گرنگ دەزانێت و دەڵێت: لەبەر ئەوەی لەڕووی عەقڵ و تەمەنەوە پێگەیشتوو دەبن ئەوکاتە، تەمەن واتە عاتفی بوون زاڵە بەسەریاندا، وەک لە ژیرییەتییان، هەروەها هاوسەرگیری زۆرەملێ نەبێت و بە بڕیارێکی تەندروست تاکەکان بچنە ناو پڕۆسەی هاوسەرگیرییەوە.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin