Smiley face
Smiley face
Smiley face

جەمیل بایک پیلانەکانی تورکیا لە باشوری کوردستان دەنرخێنێت

2018-03-13 13:25:07



ڕۆژنیوز - ناوەندی هەواڵەکان

 

جەمیل بایک، هاوسەرۆکی کۆنسەی بەڕێوبەری کۆما جڤاکێن کوردستان- کەجەکە، دەڵێت کە تورکیا دەیەوێت پیلانگێڕیی نێودەوڵەتی لە دژی گەلی کورد بژێنێتەوە و هەموو دەستکەوتەکانی گەلی کورد لە ناو ببات.

 

هاوسەرۆکی کۆنسەی بەڕێوبەریی کەجەکە لە چاوپێکەوتنێک دا بۆ تەلەفزیۆنی ئاریەن تیڤی پیلانەکانی حکومەتی تورک و دەزگا هەواڵگرییەکەی لە دژی گەلی کوردی نرخاندووە، کورتراوەیەکی ئەو چاوپێکەوتنە بەم شێوەیەیە:

 

"شەڕی عەفرین شەڕێکە بۆ هەمووی مرۆڤایەتی"

 

شەڕی عەفرین شەڕی هەموو گەلی کورد و هێزە دیموکراسیخوازەکان و هەموو مرۆڤایەتییە، بۆیە ئەوانەی لە شەڕی عەفریندا تێدەکۆشن، ئەرکێکی پیرۆز بەجێ دێنن، سیاسەتی قڕکەری ئەردۆغان نەک تەنیا لە عەفرین، بەڵکو لە هەموو کوردستان پێکدێت، ئەردۆغان دەسەڵاتدارییەکەی لە سەر بنەمای دوژمنایەتیکردنی گەلی کورد بەڕێوەدەبات، بە هەموو هێزەوە هێرشی بۆ سەر عەفرین دەستپێکردووە، بەنیازە عەفرین لە کورد چۆڵبکات و داگیری بکات، کۆمەڵکوژی لە عەفرین پێکهێناوە، ئەوەیە بنەمای دەسەڵاتداریی فاشیستیی ئەردۆغان، کە هونەرمەندان و سیاسەتمەدرانی تورکیش پشتگیریی دەکەن.

 

"ئەوان کورد وەک مرۆڤ و وەک نەتەوەیەک نابینن"

 

نەتەوە یەکگرتووەکان بڕیاری ئاگربەستی بۆ سەرتاسەری سوریا ڕاگەیاندووە، بەڵام تورکیا ئەو بڕیارەی پێشێلکرد و هێرشەکانی چڕترکردەوە، ئەوان کورد وەک مرۆڤ نابینن، ڕۆژانە ئەو هەموو هاوڵاتییە مەدەنییە دەکوژرێن، سروشتی عەفرین لە ناو دەبرێت، بەڵام کەس دەنگی لێوە نایەت، ئەوانە دەیسەلمێنن کە ئەوان کورد وەک نەتەوەیەک نابینن، لە هەر شوێنێکی دیکە کە هاوڵاتی مەدەنی دەکوژرێن دەیکەنە قیامەت، ئەی بۆچی لە بارەی عەفریندا بێدەنگن.

 

"دووڕووییەکی گەورە لە ئارادایە"

 

شەڕڤانانی یەپەگە و یەپەژە باجی قورسیان داوە، گورزی قورسیان لە داعش دا، ئەوەش تورکیای تووڕە کردووە، چونکە پەیوەندییەکانی تورکیا و داعش زۆر بەهێزبوون، لەلایەکەوە دەڵێن یەپەگە و قەسەدە لە دژی داعش بەرگری لە دیموکراسی و مرۆڤایەتی و بایەخە مرۆییەکان دەکات و لەلایەکی دیکەشەوە ڕێگادەدەنە تورکیا هێڕش بکاتە سەر یەپەگە و قەسەدە، دووڕوییەکی گەورە لە ئارادایە.

 

"دەوڵەتەکانی دیکەش بەرپرسیارن"

 

تورکیا چەکەکانی ناتۆ و دەوڵەتانی بەریتانیا و ئەڵمانیا بە کار دێنێت، بۆ ئەوەی ڕایگشتیی جیهانی بخەڵەتێنێت دەڵێت چەکی خۆیەتی، بەگوێرەی یاساکانی ناتۆ تورکیا بۆی نییە ئەو چەکانە لە عەفرین بەکاربێنێت، لە بەرامبەر ئەو پێشێلکارییانەدا هەمووان بێدەنگن، هەموو ئەو دەوڵەتانەی چەک دەدەنە تورکیا و چەکی پێدەفرۆشن و پەیمانی لەگەڵ نوێدەکەنەوە، لە بەرامبەر ئەو تاوانانەی لە عەفریندا ڕوودەدەن بەرپرسیارن.

 

"تەنیا ئیرادە سەرکەوتن بە دوا خۆیەوە دێنێت"

 

خەڵکی عەفرین و شەڕڤانان چەکی ئەوەندە گەورەیان نییە، نە تانک، نە فڕۆکە و نە هەلیکۆپتەر، بە چەکی سووکەوە لە دژی ئەو هەموو چەکە پێشکەوتووە وەستاون، شەڕڤانان قارەمانێتیان پیشانداوە، ئەوەش تەنیا لە ئیرادە و فەلسەفە و هزریانەوە سەرچاوە دەگرێت، گەورەترین هێزی مرۆڤ خۆیەتی، وتنێکی گرنگ هەیە لە بارەی شەڕی ڤێتنامەوە، دەیان وت: ئەمریکا و هاوپەیمانەکانی وەک فیل وان و ئێمەش وەک مێروولە، مێروولەکان ئەو فیلانە تێکدەشکێنن، ئێستا لە عەفرین عەینی شت ڕوودەدات، بەهۆی ئیرادەی خەڵکی عەفرینەوەیە، کە شەڕڤانان بەو هێزەوە شەڕدەکەن، ئەوەی سەرکەوتن بە دوا خۆیەوە دێنێت، تەنیا ئیرادەیە.

 

"خەڵکی باشور بە پشتگیریکردنی عەفرین، پشتگیریی لە داهاتووی خۆیان دەکەن"

 

سڵاو دەنێرم بۆ گەلی کورد لە باشوری کوردستان و دەستخۆشییان لێدەکەم، بەڕاستی بەباشی پشتگیریی عەفرینیان کرد، ئەوان بۆ خۆیان دەڵێن، کە پشتگیریکردنی عەفرین بە واتای پشتگیریکردن لە خۆمانە، چونکە عەفرین نەک تەنیا بۆ خۆی، بەڵکو بۆ مرۆڤایەتی و بۆ دیموکراسی و بۆ هەموو گەلی کورد شەڕ دەکات، خەڵکی باشور زۆر باش لە سیاسەت تێدەگەن، ئەوانە مێژووییەکی دەوڵەمەندیان هەیە، هەم شتی باش و هەم شتی زۆر خراپ لە مێژوویاندا ڕوویداوە، بۆیە باش لەوە تێدەگەن کە چی لە بەرژەوەندیان دایە و چی بە زەرەریانە، هەم لە کاتی سەدام دا و هەم لە کاتی داعش دا تێکۆشانیان کردووە، خەڵکی باشور باش دەزانن کە تورکیا دوژمنی کوردە، لە کەرکوک دوژمنایەتی تورکیایان بە چاوی خۆیان بینی، پێش کەرکوک تورکیا خۆی وەک بێلایەن لە بارەی سیاسەتەکانی باشورەوە پیشاندەدا، بەڵام پاش کەرکوک سەلمێندرا کە حکومەتی تورک دەیەوێت کورد و هەموو دەستکەوتەکانی لە ناو ببات، ئەردۆغان لە بارەی باشورەوە وتبووی "هەڵەمان کرد لە بارەی باشورەوە، بەڵام لە بارەی ڕۆژئاواوە ئەو هەڵەیە دووبارە ناکەینەوە"، تورکیا لە باکورو باشور و ڕۆژئاوای کوردستان دژایەتی گەلی کورد دەکات، دوژمنایەتی بنەمای سیاسەتەکانی تورکیایە.

 

"تورکیا بەشێکی خاکی باشوری داگیرکردووە"

 

تورکیا بەشێکی خاکی باشوری کوردستانی داگیرکردووە، هەم لە ڕووی سیاسی و هەم لە ڕووی سەربازی و ئابوریی و کلتورییەوە سیاسەتی داگیرکاری لە باشوری کوردستان بەرێوەدەبات، باشوری کوردستانی خستووەتە ژێڕ کۆنتڕۆڵی خۆیەوە، پێویستە گەلی کورد لە باشوری کوردستان لەو بارەیەوە لێپرسینەوە لەوانە بکەن کە ڕێگایان داوەتە تورکیا بە ئاسانی ئەو داگیرکارییانە جێبەجێبکات، تورکیا بازاڕی باشوری کوردستانی خستووەتە ژێڕ کۆنتڕۆڵی خۆیەوە، هەموو کاڵا تورکییەکان لە باشور دەفرۆشرێن، ئەو کاڵایانە بۆ هیچ وڵاتێکی دیکە نانێردرێن، هەرچی شتی خراپە دەینێرنە باشوری کوردستان، لەوێ بە ملیۆنان قازانج دەکەن، دەتوانین بڵێین کە ئابوری خۆیان لە سەر باشور بەڕێوەدەبەن، ئەگەر بازاڕی باشور نەبێت ئابوری تورکیا تووشی کێشە دەبێت، بۆ ئەوەش پێویستە گەلەکەمان کاڵای تورکی نەکڕن، بەو پارەیەی لە فرۆشتنی کاڵا دەستی دەخات چەک دەکڕێت و لە دژی گەلەکەمان لە پارچەکانی دیکە بەکاریان دەهێنێت، گەلی کورد نابێت بە کڕینی کاڵای تورکی خزمەتی ئابوری تورکیا بکەن.

 

"سەیری زنجیرەدراما تورکییەکان مەکەن"

 

حکومەتی تورک بەنیازە کلتورێک لە باشوری کورستان بڵاوبکاتەوە، ئەوەش لە ڕێگای زنجیرەدراماکانییەوە ئەنجام دەدات، بەو زنجیرە درامایانە زهنییەتی گەلەکەمان دەگۆڕێت و هێرشێکی کلتوری ڕێکدەخات، دەیەوێت کلتوری گەلی کورد لاوازبکات و کلتوری خۆی لە جیاتی بچەسپێنێت، ئێستا لە زۆربەی تەلەفزیۆنەکانی باشوری کوردستان ئەو زنجیرە درامایانە نمایش دەکرێن، پێویستە ئەو تەلەفزیۆنانە پەخشی ئە فیلمانە ڕابگرن.


"کۆنسولخانەی هەولێر بووە بە ناوەندی میت"

 

کۆنسولخانەی تورکیا لە هەولێر هەر بەناو کۆنسولخانەیە، ناوەندێکی دەزگای هەوڵاگریی میتە، بۆ سەلماندنی ئەوە بەڵگەمان هەیە، دەمەوێت ئەوە بڵێم، کە ئەوێ کۆنسولخانە نییە و کاری دبلۆماسی تێدا ئەنجام نادرێت، بەڵکو سیخوڕی و هەواڵگریی تێدا ئەنجام دەدرێت، پێویستە حکومەتی ناوەدنی عێراق و حکومەتی باشوری کوردستان ئەوە قبوڵ نەکەن، خەڵک دەبێت فشار بخەنە سەر پەرلەمانتاران بۆ ئەوەی ئەو پرسە بخەنە بەر باس، پێشتر نیو ملیۆن واژۆ بۆ هەبوونی هێزی سەربازی تورکیا لە تورکیا کۆکرابووەوە و ڕادەستی پەرلەمان کرابوو، پەرلەمان بڕیاری لە سەردا، بەڵام جێبەجێ نەکرا، بۆیە تەنیا بڕیار بەس نییە، دەبێت لە ڕووی پراتیکیشەوە هەنگاو بنرێت.

 

"سیستمی باشوری کوردستان خزمەتی گەل ناکات"

 

هەڵوێستی حکومەت و حزبەکانی باشوری کوردستان باشنییە، لە باشور سیستمێکی دیموکرات پێش نەکەوتووە، ئەو سیستمە خزمەتی گەلی کورد لە باشوری کوردسان ناکات، بەڵکو لە خزمەتی داگیرکەراندایە، گەلەکەمان لە باشوری کوردستان ڕۆژ لە دوای رۆژ پرسیارەکانی زیاتر دەبێت، هەرچەند ئەو پرسیارانە زیاتربن، ئەگەر و هیوای چارەسەربوونی کێشەکانی زیاتر دەبێت، خەڵکی باشوری ناڕازین لەو سیستمەی ئێستا لە گۆڕێدایە و دژایەتیی دەکەن، خەڵکی باشور بە هەڵسوکەوتییان وا خەریکن یەکێتی نەتەوەیی، ئازادی و یەکسانیی کورد پێش دەخەن، خەڵک بە حکومەت دەڵێن: چۆن ئێمە پێش کەوتووین و خۆمان گۆڕیوە، ئێوەش دەبێت خۆ بگۆڕن".

 

"خەڵکی ڕۆژهەڵات ورە لە عەفرینەوە وەردەگرن"

 

خەڵکی رۆژهەڵاتی کوردستان بە دڵ لەگەڵ عەفرینن، ڕەنگە نەتوانن وەک خەڵکی باشوری کوردستان و ئەوروپا پشتگیرییەکانیان دەرببڕن، بەڵام لە هەر شوێنێک بە دەرفەتی بزانن پشتگیریی دەکەن، بۆ نمونە، ژمارەیەک ڕۆشنبیر و هونەرمەند ڕاگەیەندراویاندا و وتیان، کە لەگەڵ عەفرینین و تورکیا داگیرکەرە، گەلی کورد لە ڕۆژهەڵاتی کوردستان خەڵکێکی قارەمانن، لە کاتی پیلانگێڕیی نێودەوڵەتیدا بە هەموو هێزەوە پشتگیریی رێبەر ئاپۆیان کرد، شەهید و برینداریان دا، لە ئەنجامی سەرهەڵدانی ئەم دواییانەی گەلانی ئێراندا زۆر کەس کوژران و برینداربوون، حکومەتی ئێران دەڵێت ئەو سەرهەڵدانە لە دەرەوە ڕێکخراوە، بەڵام لە بنەماوە بەهۆی کێشە ناوخۆکانی خۆیەوەتی کە سەرهەڵدان روویدا، یەکێک لەو پرسانەش پرسی گەلی کوردە، خەڵکی ڕۆژهەڵاتی کوردستان بۆ بەدیموکراتیبوونی ئێران تێدەکۆشن و هاوکات تێکۆشانی نەتەوەییش بەڕێوەدەبەن، بچوکترین ڕوداوەکانی پارچەکانی کوردستان کاریگەرییان لە سەر یەکدی هەیە.

 

"تورکیا و عێڕاق لە دژی کورد دا لە ڕێککەوتندان"

 

لە ئەنجامی ئەو رێککەوتنانەدا ڕووداوەکانی کەرکوک روویدا، تورکیا بە عێراقی وت، کە دەتوانین پێکەوە لە دژی کورد بوەستین، کورد مەتەرسییە بۆ سەرمان و دەتوانین پێکەوە لە دژی پەکەکە بوەستین، ئەگەر ئەوە قبوڵ بکەن ئێمەش یارمەتیتان دەدەین، کاتێکیش کە عێراق دەستیکرد بە داگیرکردنی خاکی کوردستان، تورکیا بە هەمو هێزەوە پشتگیری دایە حکومەتی ناوەندی.

 

"تورکیا دەیەوێت پیلانگێڕیی نێودەوڵەتی بژێنێتەوە"

 

تورکیا دەیەوێت لە ڕێگای باشورەوە کورد و پەکەکە تێک بشکێنێت، بۆ ئەوەی عێراق ڕەزامەند بکات دەڵێت کە بۆ ئاوەدانکردنەوەی عێراق هاوکاری دەکات، بەمشێوەیە لە سەر کورد بازرگانی دەکەن، ئەو کاتەی ڕێبەر ئاپۆ لە دیمەشق بوو کۆمپلۆیەکی نێودەوڵەتییان ڕێکخست بۆ ئەوەی پەکەکە لاوازبکەن، ئەو کاتە زۆر دەوڵەت بۆ پاراستنی بەرژەوەدنییەکانیان بەشداری کۆمپلۆکە بوون، بەڵام بە پێچەوانەوە حەرەکەتی پەکەکە پاش ئەو کۆمپلۆیە گەورەتر بووەوە، ئەردۆغان دەیوت، لە عەفرینەوە دەستپێدەکەین و لە قەندیل کۆتایی پێدێنین، مەبەستی ئەوە بوو کە کۆتایی بە پەکەکە دێنین و کوردیش لە ناو دەبەین، بۆ ئەوە دەبێت پیلانگێڕییەکی نێودەوڵەتی بژێنێتەوە.

 

"تورکیا لە باشور کەرکوک و لە ڕۆژئاوا عەفرینیان دەوێت"

 

ئەردۆغان دەڵێت، کە پەیمانی لۆزانیان بە زۆر پێ قبوڵ کردین و ئەو خاکانەیان لە چنگ دەرهێناوین، بۆ ئەوەش لە ڕۆژئاوا عەفرین و لە باشور کەرکوکی دەوێت، هێزە سەربازییەکانیان لە باشور هەر بەو مەبەستە جێگرکردووە، حکومەتی عێراق و حکومەتی هەرێمی کوردستان نابێت بکەونە ئەو یارییەوە.

 

"کۆنگرەی نەتەوەیی وەک نان و ئاو پێویستە"

 

کۆنگرەی نەتەوەیی تا ئێستا درنەگ کەوتووە، لە نان و ئاو بۆ هەموو گەلی کورد پێویستترە، نابێت حزبەکان بەپێی بەرژەوەندییەکانیان لەو بارەیەدا بجووڵێنەوە، لە ئێستادا هەمووان دەیانەوێت کۆنگرەی نەتەوەیی ببەسترێت، بۆیە باشترین کاتە بۆ بەستنی ئەو کۆنگرەیە، پرسی کۆنگرەی نەتەوەیی گرێدراوی یەک حزب و دوو حزب نییە و نابێت ببەسترێتەوە بە بەشداریکرن یان نەکردنی حزبێک، با ئەوانیش بەشدار نەبن، بەڵام دیسان کۆنگەرەکە دەبێت بەڕێوەبچێت.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin