Smiley face
Smiley face
Smiley face

هاوسەرۆکی پەیەدە: حکومەتی هەرێم لە ئاست عەفرین بێدەنگە

2018-03-14 13:13:12



ڕۆژنیوز - بڕیار محەمەد

 

هاوسەرۆکی پەیەدە ڕایدەگەیەنێت، بەرگریکردنی عەفرین بەرگریکردنە لە تەواوی گەلی کورد و مانەوەی کورد، ڕەخنەش لە حکومەتی هەرێمی کوردستان دەگرێت، کە بێدەنگن و هەڵوێستی ڕونیان نییە.

 

ئەمڕۆ، شاهۆز حەسەن، هاوسەرۆکی پەیەدە لە بارەگای زەحمەتکێشان لە شاری هەولێر، کۆنگرەیەکی ڕۆژنامەنووسی ئەنجامدا.

 

شاهۆز حەسەن، لە کۆنگرەکەدا وتی: ئێستا کانتۆنی عەفرین کە ماوەی 54 ڕۆژە لەلایەن دەوڵەتی تورکیاوە هێرشی دەکرێتە سەر، بەرخوانی شەرڤانانی بەردەوامیی هەیە و بەردەوامیش دەبێت تاکو سەردەکەون .

 

وتیشی: بەمەستی وەرگرتنی پشتیوانی، کۆبوونەوە لەگەڵ لایەنە ساسییەکان بەردەوامە، چونکە ڕەوشی ئێستای عەفرین  زۆر گرنگە بۆ هەموو کوردستان، ئەو بەرگرییەی کە لە عەفرین دەکرێت لەسەر بنەمای ئازادی دەکرێت و هەر هێرشێک دەکرێت بە بێدەنگی نامێنێت، ئەو بەرخودانەی لەوێ هەیە بریتییە لە بەرگریکردن لە تەواوی مرۆڤی ئازاد، ئێستا لە عەفرین بریندار و شەهید و وێرانکاری هەیە، چونکە ئەو هێرشەی دەوڵەتی تورکیا بەمەبەستی داگیرکردنە، کە هەمان بیرۆکەی قاعیدە و داعشی هەیە بۆ ئەوەی عەفرین داگیربکات و ئەو تیرۆرستانەی داعش و قاعیدە لەوێ نیشتەجێ بکات.

 

ئاماژەی بەوەشدا: تورکیا دەیەوێت کورد قڕبکات و دەیەوێت هەموو کوردستان لە عەفرینەوە تا کەرکوک داگیربکات، بۆیە ئەو بەرگرییە بەرگریکردنە لە تەواوی کورد و مانەوەی دۆزی کورد، بۆ ئەو مەبەستەش دەتوانێت دوای ئەو بەرگرییە هەموو کێشەکان چارەسەر بکات.

 

هاوسەرۆکی پەیەدە، زیاتر دواو وتی: دەوڵەتی تورکیا هەر لە خۆیەوە هێرش ناکات، بەڵکو دوای ئەوەیە کە روسیا ڕێگەی داوە کە پێشێلکاری مافی مرۆڤ بکات، هەروەها خەڵکی سڤیل دەکاتە ئامانج کە هەم شەهید و هەم بریندار دەبن، هەروەها ئۆتۆمبێلەکانی فریاگوزاری تەندروستی دەکاتە ئامانج، وە شوێنەوارە مێژوییەکانی کورد لە عەفرین دەکاتە ئامانج، لەلایەکی دیکەوە تورکیا چەکی قەدەغەکراوە بەکاردەهێنێت و سەلمێنراوە، کەواتە ئەو هێرشە سەرلەبەری پێشێلکارییە بەرامبەر مافی مرۆڤ.

 

لەبارەی پشتیوانییەکان بۆ عەفرین هاوسەرۆکی پەیەدە دەڵێت: ئەو پشتیوانییە گرنگی  بۆ عەفرین هەیە و دەیان شاندی کوردی و بیانی سەردانی عەفرینیان کردووە، هەروەها لە ئەوروپا و باشووری کوردستان و ڕۆژهەڵاتی کوردستان دەیان خۆپیشاندان و ڕێپێوان و دەرکردنی بەیاننامە بۆ پشتیوانی عەفرین هەبووە، ئەوەش وا دەکات کە ئەوبڕیارەی شەرڤانان داویانە لەبارەی بەرگریکردن تا سەرکەوتن گرنگی زیاتری هەبێت.

 

هاوسەرۆکی پەیەدە ڕەخنەی لە حکومەتی کوردستان کرد کە وەک پێویست هەڵوێستی لەبارەی عەفرین دەرنەبڕیوە و بە روون و ئاشکرایی ڕایناگەیەنێت، کە چۆن دژی هێرشەکانی تورکیایە بۆ سەر عەفرین.

 

لەبارەی دۆخی سوریاش هاوسەرۆکی پەیەدە وتی: ئێمە دەبینین کە سەرباری ئەوەی دۆخی سوریا تەواو پەشێوە، بەڵام وڵاتانی جیهانی و نەتەوەیەکگرتووەکان بێدەنگن لە ئاست ئەو پێشێلکارییانەی بەرامبەر سوریا دەکرێت، بۆنموونە ئەوەتا عەفرین کە هەرێمێکی ئارام بوو، ٤٠٠ هەزار ئاوارەی تێدابوو، کەچی دوای ئەوەی ئاوارەکان لە ترسی فڕۆکەی سوریا هەڵهاتبوون ئێستا لەژێر فرۆکەی تورکیا جارێکی دیکە ڕادەکەن و جارێکی دیکە ئاوارە دەبنەوە، بۆیە دەبێت نەتەوەیەکگرتووەکان لەچوار چێوەی یاسای نێودەوڵەتی و مافی مرۆڤ و مافی ژیان، بڕیارێکی یەکلاکەرەوە بدات  و دەبێت هێرشەکانی سوپای تورکیا ڕابگیرێت و سوپای تورکیا لە خاکی سوریا بکرێتە دەرەوە، ئێمەش بەردەوام دەبین، چونکە بڕیاری بەرگریردن باشترین بڕیارە لە کاتی ئێستادا.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin