Smiley face
Smiley face
Smiley face

سبەینێ لە سلێمانی و هەڵەبجە و گەرمیان خۆپیشاندان بەڕێوەدەچێت

2018-03-19 21:10:27



ڕۆژنیوز - هاوكار مستەفا

 

لەدژی دابەشکردنی مووچەکانیان بە پاشەکەوتەوە، بڕیارە سبەینێ لە شارەکانی سلێمانی و هەڵەبجە و شارۆچکەی کەلار، خۆپیشاندانی مامۆستایان و کارمەندانی تەندروستیی بەڕێوەبچێت.

 

كاتژمێر ٠٨:٠٠ی ئەمشەو، لە باخی گشتیی هەڵەبجە، بەشێك لە كارمەندانی تەندروستیی و مامۆستایانی هەڵەبجە، لە كۆنگرەیەكی ڕۆژنامەنووسیدا، هەڵوێستی خۆیان لەبارەی دابەشنەكردنی مووچەی بێپاشەكەوت ڕاگەیاند.

 

لە كۆنگرە ڕۆژنامەنوسییەكەدا، فەرهاد قادر، مامۆستا، بەناوی مامۆستایانی سنوری پارێزگای هەڵەبجە، قسەیکرد و وتی: بەهۆی ئەو سوكایەتییەی كە بە مامۆستایان و كارمەندانی پزیشكیی كرا و ئەو بەڵێنانەی كە پێان درابوو بە خەرجكردنی مووچەی پاشەكەوت، وەك مامۆستایانی سنوری پارێزگای هەڵەبجە بڕیارماندا كە بەردەوام بین لە بایكۆت و بۆ ئەو مەبەستەش سبەینێ‌ خۆپیشاندانێكی بەرفراوان ئەنجام دەدەین.

 

فەرهاد قادر

 

هەر لەو كۆنگرە ڕۆژنامەنووسییەکەدا، گۆران سەعدی، كارمەندی تەندروستیی، بەناوی كارمەندانی تەندروستی هەڵەبجەوە قسەیکرد و وتی: ئێمەش لای خۆمانەوە پشتیوانی لە داواكارییەكانی مامۆستایان دەكەین و ئێمەش بڕیارمانداوە كە سبەینێ‌ بەشداریی خۆپیشاندان بكەین و بایكۆتی دەوام ڕادەگەیەنین.

 

گۆران سەعدی

 

لەلایەکی دیکەشەوە، ئێوارەی ئەمڕۆ، دەستەی مامۆستیایانی ناڕازیی، لە بەردەم پەروەردەی ڕۆژئاوا لە شاری سلێمانی، کۆنگرەیەکی ڕۆژنامەنووسییان ئەنجامدا، ڕایانگەیاند، کە سبەینێ کاتژمێر ١٠:٠٠ی پێشنیوەڕۆ خۆپیشاندانێک لەبەردەم پەروەردەی ڕۆژئاوا ئەنجامدەدەن، دژی دابەشنەکردنی مووچەکانیان بەبێ پاشەکەوت.

 

هەروەها، بڕیارە هەر سبەینێ پێشنیوەڕۆ، لە شارۆچکەی کەلاری ناوەندی ئیدارەی گەرمیانیش، خۆپیشاندانی مامۆستایانی ناڕازیی و کارمەندانی تەندروستیی بۆ هەمان مەبەست بەڕێوەبچێت.

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin