Smiley face
Smiley face
Smiley face

سزای قورس بۆ ئەو کەسانە دانراوە کە شوێنەوارەکان لەناودەبەن

2018-03-22 11:03:52



ڕۆژنیوز – عەلی قادر 


ناوچە شوێنەوارەکانی ڕاپەڕین مەترسی لەناوچونیان لەسەرە و بەرپرسی ڕێکخراوێکیش نیگەرانە لە خەمساردی حکومەت لە پاراستنی ئەو شوێنەوارانە، پارێزەرێکیش دەڵێت: سزای زیندانی و غەرامە و لە سێدارەدان بۆ ئەو کەسانەیە کە شوێنەوارەکان تێکدەشکێنن.


شوێنەوارەکان دەرخەری مێژوو و کەلەپوری نەتەوەین و سەلمێنەری هەبوونی گەلێکە، بەڵام لە ئێستادا ناوچە شوێنەواریەکانی ئیدارەی ڕاپەڕین لەژێر هەڕەشەی لەناوچووندان.


عەلی قادر، ناسراو بە (عەلی دینکە) بەرپرسی ڕێکخراوی دینکە بۆ پاراستنی ناوچە شوێنەوارییەکانی پشدەر، کە ڕێکخراوێکی ناحکومییە و ماوەی زیاتر لە ساڵێکە دامەزراوە،  بە ڕۆژنیوزی وت:"بەهۆی قوڵبوونەوەی قەیرانی دارایی و بێمووچەیی و بێکاریی، هاوڵاتیان پەنادەبەنە بەر هەڵکۆڵین و دەرهێنانی کەلوپەلی ناوچە شوێنەوارییەکان و بازرگانی پێوەکردنیان، ئەوەی جێگای داخە خەمساردی حکومەتی هەرێمە لە پاراستنی ناوچە شوێنەواریەکانە".

 


هەروەها لەشکر محەمەد، پارێزەر لە دادگای بەرایی قەڵادزێ دەربارەی سزادانی ئەو کەسانەی هێرش دەکەنە سەر ناوچە شوێنەوارییەکان بە ڕۆژنیوزی وت: "یاسایەکی تایبەت بەو کەسانە هەیە کە هێرشدەکەنە سەر ناوچە شوێنەواریەکان، بە پێی یاسای شوێنەوار و کەلەپور ماددەی ٤٣ و ٤٤ هەرکەسێک هێرشبکاتە سەر ئەو ناوچانە یان بازرگانیان پێوە بکات، ئەوا سزاکەیان بە زیندانیکردن دەبێت کە لە ١٠ ساڵ زیاتر نەبێت، ئەگەر زیانی بە کەلوپەل یاخود ناوچەکە گەیاند یان بازرگانی پێوە کردبوو، ئەوا بە قەبارەی دوو ئەوەندەی زیانەکە غەرامە دەکرێت".

 


لەشکر وتیشی:"ئەگەر کەسێک هەوڵبدات کەلوپەلێکی شوێنەواری بباتە دەرەوەی سنوورەکانی عێراق ئەوا سزاکەی دەگاتە ئاستی لەسێدارەدان".

 


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin