Smiley face
Smiley face
Smiley face

پەکەکە پەیامێکی سەرەخۆشیی بڵاوکردەوە

2018-03-23 19:43:03



ڕۆژنیوز – ناوەندی هەواڵەکان

 

كۆمیته‌ی به‌ڕێوه‌به‌ریی پارتی كرێكارانی كوردستان-په‌كه‌كه،‌ په‌یامێكی سه‌ره‌خۆشی بەبۆنەی شەهیدبوونی ژنە شەڕڤانی ئەنتەرناسیۆنالیست ئالینا سانچەز، ناسراو بە لێگەڕین چیا بڵاوكرده‌وه‌ و ڕایگەیاند: تێکۆشان و شەهیدبوونی لێگەرینه‌كان، ده‌بێته‌ هێڵی شۆڕشگێڕان و دیموكراتیی ڕۆژئاوا و مسۆگه‌ركردنی.

 

ئێوارەی ئەمڕۆ، كۆمیته‌ی به‌ڕێوه‌به‌ریی پارتی كرێكارانی كوردستان-په‌كه‌كه،‌ په‌یامێكی سه‌ره‌خۆشی بەبۆنەی شەهیدبوونی ژنە شەڕڤانی ئەنتەرناسیۆنالیست ئالینا سانچەز، ناسراو بە لێگەڕین چیا بڵاوكرده‌وه‌.

 

لە پەیامەکەدا، هاتووە: ئێمە بە بیستنی هەواڵی شەهیدبوونی هاوڕێی ئینته‌رناسیۆنالیست ئالینا سانچه‌ز، کە ناسراوبوو بە لێگەرین چیا، خه‌مگین بووین، پرسە و سەره‌خۆشی لە هەموو مرۆڤایەتیی دیموکراتی و بنەماڵەکەیان دەکەین، بەتایبەتی به‌ هاوڕێکانی دەڵێین: لەبەرئەوەی ئێوە هاوڕێیەکی وه‌هاتان هەبوو، مایەی شانازییە بۆ هەموو سۆسیالیستەکانی جیهان و ئێمەش خۆمان لەو شانازییەدا ده‌بینینه‌وه‌.

 

هەروەها، هاتووە: هێڵی دیموکراتی و ئازادیخوازیی ژن کە لە لایەن ڕێبەر ئاپۆوە پێشخراوە، ئالین سانچه‌زی لە وه‌ڵاتی "چێ گیڤارا" واتا ئه‌رجه‌نتینه‌وه‌ هێنایە چیا ئازادەکانی کوردستان، ساڵی ٢٠١١ هاتە هەرێمەکانی پاراستنی مه‌دیا و خۆی گەیاندە هاوڕێ سۆسیالیستەکانی، کە بە تاسەوە بیری ئازادی و دیموکراتی دەکەن و هەموو کاتێک بیری لەوان دەکردەوە، ئەو گەیشتنی خۆی بە چیا ئازادەکان، وەکو دوویەمین لەدایکبوونی خۆی پێناسە دەکرد.

 

هەر لە پەیامەکەدا، پەکەکە باسی لەوەشکردووە: هاوڕێ لێگەڕین لە دژی هێرشە سەختەکانی ئێران و دەوڵەتی تورک چەندین مانگ لە قەندیل، خنێرە و گارە مایەوە، لە نزیکەوە شاهیدی بۆ هێڵی شەڕ و تێکۆشانی ئازادی و دیموکراتی کوردستان کرد، کاتێک لە ژێر هێرش و بۆردوماندا بوو، هەر لە یەکەمین مانگدا کەمێکی مابوو شەهید ببێت، سه‌ختی شۆرشی کوردستان و بەسەرهاتەکانی وایکرد، کە زیاتر په‌یوه‌ست بێت به‌ پەکەکە و بزووتنه‌وه‌ی ئازادی.

 

ئاماژە بەوەشکراوە: هاوڕێمان لێگەرین چیا لە كوبا وانەی پزیشکی خوێندبوو، لەبەرئەوەی ساڵێکی خوێندنەکەی مابوو، بزووتنه‌وه‌ی ئازادی جارێکی دیکە ناردیەوە بۆ کوبا و ئەرکی بڵاوکردنەوەی ڕامانی ڕێبەر ئاپۆ و ناساندنی پەکەکە لە باشووری ئەمه‌ریکای پێسپارد، هاوڕێ لێگەرین بەو بەرپرسیاره‌تییه‌وه‌ گەڕایەوە بۆ کوبا و خوێندنی پزیشکی تەواوکرد و لەگەڵ هاوڕێ و دۆستانی دیکە خەباتی ناساندن و ڕێكخستنی بەمەبەستی ناساندنی پەکەکە و پاژک لە باشوری ئەمریکا ئەنجامدا.

 

لە بەشێکی دیکەی پەیامەکەی پەکەکەدا، هاتووە: لە دوای پەرەسەندنی بەرخۆدانی کۆبانێ و لە دوای بونیادنانی کۆمەڵگه‌یەکی ڕێكخراو لەسەر بنه‌مای کۆنفیدرالیزمی دیموکراتی لە ڕۆژئاوای کوردستان و باکوری سوریا، جارێکی دیکە گەڕایەوە بۆ کوردستان بۆ دامەزراندنی سیستمی کۆنفدرالیزمی دیموکراتی به‌ ئازادیخوازیی، هەموو کاتێک ویست و داخوازی ئەوە بوو، ڕۆڵی خۆی لە بونیادنانی کۆمەڵگه‌ی دیموکراتیدا پێکبێنێت، بە هەستی شۆرشگێری گەورە "چێ گیڤارا" ڕووی لە ڕۆژئاوا کرد، لە ڕێكخستنی سیستمی تەندروستیی ڕۆژئاوا و پەرەدان بە شۆرش ڕۆڵی گێرا، بە تاسەی ئازادی و جۆشی گەلانی باشووری ئەمریکا و شۆڕشگێرەکانی، بەشداری کاروخەبات بوو و بوو بە هاوڕێیەکی هێژای شۆرشی ڕۆژئاوا.

 

پەکەکە، جەختیش دەکاتەوە: شۆرشگێرانی ڕۆژئاوا و گەلەکەمان هیچ کاتێک ئەو لە بیرناکەن، تێکۆشان و شەهیدبوونی لێگەرینه‌كان، ده‌بێته‌ هێڵی شۆڕشگێڕان و دیموكراتیی ڕۆژئاوا و مسۆگه‌ركردنی.

 

لەکۆتایی پەیامەکەدا، کۆمیتەی بەڕێوەبەریی پارتی کرێکارانی کورستان-پەکەکە-دا هاتووە: ئێمە بە ڕێز و منه‌ته‌وه‌ یادی هاوڕێمان لێگەرین چیا دەکەینەوە و بەڵین دەدەین، كه‌ ئاڵای تێکۆشانی ئەو له‌ به‌رزیدا بهێڵینه‌وه‌، ئێمە ده‌ڵێین كه‌ ڕۆحی ئینته‌رناسیۆنال و هێڵی سۆسیالیستی به‌ تێکۆشان لە هێڵی پەکەکەدا ده‌ژیه‌نین.

 

جێگای ئاماژەپێکردنە، دوێنی فه‌رماندەیی گشتیی یه‌كینه‌كانی پاراستنی ژن-یه‌په‌ژه، شەهیدبوونی شەڕڤانێکی ئەرجەنتینی بەناوی‌ ئالینا سانچه‌ز، ناسراو بە لێگه‌ڕین چیا ڕاگەیاند، کە له‌ ئه‌نجامی ڕووداوێكی هاتووچۆ له‌ كانتۆنی حه‌سه‌كه‌ی ڕۆژئاوا شه‌هیدبووه‌.

 

شەهید ئالینا سانچه‌ز، ناسراو بە لێگه‌ڕین چیا

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin