Smiley face
Smiley face
Smiley face

٨٧ کۆمەڵەی هەرەوەزی ئابوری جزیرە پێش دەخەن

2018-04-02 10:55:58



ڕۆژنیوز - ناوەندی هەواڵەکان

 

٨٧ کۆمەڵە کە بە هەرەوەزی کار دەکەن و زیاتر لە ٣٠ هەزار ئەندامیان هەیە، ئابوری هەرێمی جزیرەی باکوری سوریا پێش دەخەن.

 

کۆمەڵە هەرەوەزییەکانی هەرێمی جزیرە ڕۆڵێکی گرنگییان هەیە لە پێشکەوتنی ئابوریی ئەو هەرێمەدا، لە ڕێگای ئەو کۆمەڵانەوە ژمارەیەکی زۆر دەرفەتی کار بۆ هاوڵاتیان دابینکراوە.

 

ئەو کۆمەڵە هەرەوەزییانە کاروباری کشتوکاڵ، ئاژەڵداری، بازرگانی و سیستمی دابەشکردنی کارەبا و ئاو ئەنجام دەدەن.

 

لە کۆمەڵەی کشتوکاڵ دا ١٠ هەزار و ٥٩٣ کەس بەشداری دەکەن، کە تێیدا گەنم، فاسولیا، سەوزە و باقلە دەچێندرێن.

 

ئەو کۆمەڵە هەرەوەزییانە کاریگەریی زۆریان لە سەر دابەزاندنی بەهای کاڵاکان لە باکوری سوریا هەبووە، بۆ نموونە پێش دەستبەکارکردنی کۆمەڵە هەرەوەزییەکان پەتاتە بە ٢٢٥ لیرەی سوری دەفرۆشرا، بەڵام ئێستا بە ٤٥ لیرە دەفرۆشرێت.

 

هەروەها شەش هەزار و ٧٩٦ کەس لە کۆمەڵەی ئاژەڵداری دا بەشدارن، لەو کۆمەڵانەدا مریشک، مانگا، بەرخ و بەران بەخێودەکرێن، بۆ بەشداریکردن لەو کۆمەڵە هەرەوەزییانەدا ٥٠ هەزار بۆ سەد هەزار لیرەی سوری دیاریکراوە.

 

لە کۆمەڵەی بازرگانی ١١ هەزار و ٥٧٤ کەس بەشداری دەکەن، ئەو کۆمەڵانە کاروباری کڕین و فرۆشتن دەکەن، بۆ بەشداربوون لەو هەرەوەزییەشدا بۆ بەشداربوونی هەر کەسێک ١٠ هەزار بۆ ٢٠ هەزار لیرەی سوری دیاریکراوە.

 

لە دەستپێکی ئاڵۆزییەکانی سوریادا بازرگانەکان دەستیان بە سەر بازاڕی چیمەنتۆ دا گرت و بەهاکەی بۆ چوار هەزار لیرە بەرزبووەوە، بەڵام پاش دامەزرانی کۆمەڵەکان، ئەو کۆمەڵانە دەستیان کرد بە هاوردەکردنی چیمەنتۆ لە باشوری کوردستانەوە، ئەوەش وایکرد، کە بەهای چیمەنتۆ بە دوو هەزار لیرە کەم بێتەوە.

 

دەیان نموونەی دیکە هەن کە سەلمێنەری کاریگەریی ئەو کۆمەڵە هەرەوەزییانە لە سەر ئابوریی سوریان، لەو کۆمەڵانەدا مانگانە ٥٠ بۆ ٦٠ هەزار لیرەی سوری وەک حەقدەست دەدرێتە بەشداربووان.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin