Smiley face
Smiley face
Smiley face

یەکێتی وەڵامی بێدەنگیی حکومەت لەبەرامبەر داگیرکاریی دەوڵەتی تورک دەداتەوە

2018-04-14 10:47:12



ڕۆژنیوز - دڵشاد خۆشناو

 

قادر عەزیز، ڕایدەگەیەنێت، کە کورد پێویستە ستراتیژییەکی نەتەوەیی دابڕێژێت، سەبارەت بە هەڵوێستی حکومەتی هەرێمی کوردستان-یش لەبەرامبەر داگیرکارییەکانی دەوڵەتی تورک بۆسەر خاکی باشوری کوردستان ئاشکرای دەکات، کە حکومەتی هەرێم حکومەتی پارتییە و بڕیارە سەرەکییەکان لەدەست پارتین.

 

قادر عەزیز، ئەندامی مەکتەبی سیاسی یەکێتی نیشتیمانی کوردستان و بەرپرسی مەکتەبی ڕاگەیاندنی یەکێتی لەم چاوپێکەوتنەدا لەگەڵ ئاژانسی ڕۆژنیوز، وەڵامی چەندین پرسیار دەداتەوە لەبارەی هەڵوێستەکانی یەکێتی لەسەر پرسی یەکێتی نەتەوەیی و مەترسییەکانی دەوڵەتی تورک لەسەر باشوری کوردستان و پەیوەندی یەکێتی لەگەڵ لایەنە سیاسییەکانی دیکەی کوردستان و هەڵوێستی حوکمەتی هەرێمی کوردستان.

 

دەقی چاوپێکەوتنەکە:

 

- بۆچی ئێستا دەوڵەتی تورک هێرش دەکاتە سەر باشوری کوردستان؟ مەبەستم ئەوەیە، کات چ پەیوەندی بەو هێرشانەوە هەیە؟

 

"پیلانگێڕییەک هەیە لەسەر کورد و دۆزی ڕەوای کورد لەهەموو پارچەکان"

 

قادر عەزیز: لەم ماوەیەدا پیلانگێڕییەک هەیە لەسەر کورد و دۆزی ڕەوای کورد لەهەموو پارچەکان، بەتایبەت لەدوای ڕیفراندۆم لە باشور گەلەکۆمەیەک دژی کورد کرا، هەروەها بەرامبەر بە ڕۆژئاواش کرا، ئەوە لە باکوریش دژایەتی کورد هەر بەردەوامە، ئەم گەلەکۆمەکەیە کۆمەڵێک لایەنی هەرێمیی و نێودەوڵەتیی تێدایە، هەموو کاردانەوەکانیش دژی دەستکەوتەکانی کوردە، بەتایبەت ئەو دەستکەوتانەی لە ڕۆژئاوای کوردستان بەدەست هاتوون، ڕاستە تورک لە ڕۆژئاوای کوردستان چوونەتە ناو عەفرین، لەگەڵ ئەوەشدا سەرکەوتوو نەبوون، شکست بوو بۆ ئەوان، ئەگەر بەراوردی بکەی بەو زەرە و زیانە و ئەو هەموو ماوە دوورودرێژە کە دووەمین سوپای ناتۆ نەیتوانی بەو ئاسانییە عەفرین داگیربکات، ئەوەش بۆ ئەوان کارەسات بوو، بەڵام ئەوان دانی پێدا نانێن و خۆیان پێ سەرکەوتووە، ئێستا فشارەکانیان هێناوە بۆ باشووری کوردستان هەڕەشەی داگیرکردنی قەندیل و شەنگال دەکەن، دەشبینین کە هەندێک هێزیان هاتووەتە ناو سنووری باشور، بەتایبەتی لە ناوچەی خواکورک و گەلی ڕەش ٢٠ کیلۆمەترێک هاتونەتە پێش.

 

-کشانەوەی پەکەکە لە شەنگال چۆن دەنرخێنیت؟

 

"هەنگاوێکی زۆر زانایانە و حەکیمانە بوو"

 

قادر عەزیز: پاشەکشێی هێزەکانی پارتی کرێکارانی کوردستان لە شەنگال هەنگاوێکی زۆر زانایانە و حەکیمانە بوو، بۆئەوەی بیانوو لەدەستی تورکیا دەربهێنن، لەپێناو ئەوەی کۆمەڵکوژیی لە شەنگال ئەنجام نەدات هاوشێوەی ئەوەی لە شوێنی دیکە کردوویانە.

 

- ئاماژەت بە هاتنەناوەوەی سوپای تورک کرد بۆ خاک باشوری کوردستان، پێتوایە ئامانج لەو داگیرکارییە چییە و هەڵووێستی لایەنەکان لەبەرامبەردا چۆن هەڵدەسەنگێنیت؟

 

"سوپای تورکیا هێزێکی نوێی نییە لە باشوری کوردستان"

 

قادر عەزیز: سوپای تورکیا هێزێکی نوێ نییە لە باشوری کوردستان، چەندین ساڵە کە چەنین بارەگایان هەیە، لەبەرامبەر ئەوەشدا ڕاستە کە هەڵوێستی لایەنەکان وەکیەک نییە، بەڵام هەڵوێستی یەکێتی نیشتیمانی کوردستان دیارە لە هەڵوێستە نەتەوەیەکاندا، هەڵوێستی یەکێتی بەرامبەر باکور و ڕۆژئاواش دیارە، هەر ئەوەشە بووەتە هۆی ئەوەی کە وڵاتی تورکیا سزای زۆنی سەوز بدەن، پێموایە یەکێتی باجی هەڵوێستە نەتەوەییەکانی دەدات، ئەوەش شانازییە بۆ یەکێتی، بەڵام ئێستا بارودۆخی هەرێمی کوردستان بارودۆخێکی خراپە لەدوای ڕیفراندۆمەوە، گلەیی زۆر هەیە لەسەر ئەوەی کە لایەنە سیاسییەکان، حکومەت، پەرلەمان، هەڵوێستیان لە ئاست پێویستدا نییە لەبەرامبەر هاتنی سوپای تورکیا بۆ خاکی باشوری کوردستان، بەهۆی ئەوەی کە بارودۆخەکە خۆی خراپە، ئەوان ناتوانن هیچ هەڵوێستێک بەرامبەر تورکیا نیشان بدەن.

 

- ئەی ئەمەش مەترسیی دروست ناکات لەسەر ئەزمونی باشور بە گشتی و کەرکوک بە تایبەتی؟

 

"مەترسیی هەیە، بەڵام پێویست ناکات گەورەی بکەین"

 

قادر عەزیز: مەترسیی هەیە بێگومان، بەڵام پێموانییە وا پێویست بکات، کە ئەوەندە گەورەی بکەین، خۆ ئەوە لە عەفرین خەریکە سوپای تورکیا وەدەردەنێن، بەڕای من تەنیا فشارێکە، ئەو مەترسییە گەورەیە نابینم، بە تایبەتی لەسەر باشوری کوردستان.

 

- بۆ هەڵوێستی حکومەتی هەرێم وەکو پێویست نییە؟

 

"حکومەتی هەرێمی کوردستان حکومەتی پارتییە"

 

قادر عەزیز: یەکێتی وەکو حزب هەڵوێستی خۆی دیارە، بەڵام وەکو حکومەت ناتوانێت هەڵوێستی خۆی نیشان بدات، حکومەتی هەرێمی کوردستان حکومەتی پارتییە، ڕاستە یەکێتی بەشدارە، بەڵام بڕیاری ئەساسیی لە حکومەتی هەرێمی کوردستان دەمێکە لەدەست پارتییە، هەربۆیە یەکێتی هەر ئەوەندە دەتوانێت بە ئەرکی نەتەوەیی خۆی هەڵبستێت، زیاد لە توانای خۆیشی هەڵوێستی وەرگرتووە، هەر ئەوەندەی پێدەکرێت وەک حزب داکۆکی لە پارچەکانی تری کوردستان بکات، بە تایبەتی لە ڕۆژئاوای کوردستان، لە باکوری کوردستان، خۆ گەلەکۆمەکە بەشێکی لەسەر یەکێتییە، بەڵام لەگەڵ ئەوەش هەڵوێستی نەتەوەیی هەبووە، ئەمەش پرەنسیپە لای یەکێتی.

 

- هەڵوێستی یەکێتی بەرامبەر داگیرکاریی سوپای تورکیا چییە، وا باجەکەی دەدات؟

 

"لەگەڵ ئەوەداین کێشەکان بە دیالۆگ چارەسەر بکرێن"

 

قادر عەزیز: یەکێتی لەگەڵ هاتنی ئەو سوپایەی تورکیا نییە، لەگەڵ سوپایەش نییە کە پێشتر لێرە بووە، چونکە پەرلەمانی هەرێمی کوردستان داوای کردوە ئەو سوپایە بکشێتەوە، هاوکات ئێمە وەکو یەکێتی، لەگەڵ ئەوەداین کێشەکان بە دیالۆگ چارەسەر بکرێن، بە ئاشتی چارەسەر بکرێت،  لەم ڕۆژانەش کە شاندێکی باڵای هەدەپە لێرە بوو، جەخت کرایەوە لەسەر ئەوەی کە پێویستە بگەڕێینەوە بۆ ئەو پڕۆسەی سیاسییەی کە پێشتر هەبوو، چونکە ئەردۆغان کە ئێستا سواری سەری خۆی بووە سودبە تورکیش ناگەیەنێت، جگە لە سودی کورد، لەبەر ئەوە یەکێتی ئێستا کار بۆ ئەوە دەکات ئەو شەڕ و داگیرکارییانە کۆتاییان پێبێت، چونکە خۆ لە مێژوودا دیارە کە دۆزی کورد، بە شەڕ و کوشتن خوێنڕشتن چارەسەر نەکراوە، سەدام چی بەرامبەر کورد نەکرد؟ لە کۆمەڵکوژیی و ئەنفالەوە بگرە تا کیمیابارانکردن، بەڵام دەرەنجامەکەی چی بوو؟ بۆیە پێویستە هەموومان سوود لە مێژوو وەربگرین  وبگەڕێینەوە بۆ پرۆسەی ئاشتیی.

 

- سەبارەت بە دۆخی ڕۆژئاوا، ئێوە چۆنی دەبینن؟

 

"دۆخەکە خەریکە بە قازانجی کورد دەشکێتەوە"

 

قادر عەزیز: لە ڕۆژئاوای کوردستان دۆخەکە بە تەواوەتی گۆڕاوە، چونکە هەم ڕووسەکانیش، هەم ئێرانییەکانیش، لەم کۆبوونەوەی بەم دواییانەی کە لە ئەنقەرە کرا، داوایان کردووە دەبێ هێزەکانی تورکیا لە عەفرین بکشێنەوە و پێشڕەویی زیاتر نەکات، ئەوەبوو کە ئەمریکا و فەرەنسا ڕایانگەیاند، کە ناهێڵن هێزەکانی تورک بێنە منبیج، ئەمانە هەمووی گۆڕانکاریین، ئێستاکە دۆخەکە خەریکە بە قازانجی کورد دەشکێتەوە، هەڵوێستی نێودەوڵەتیش ئێستاکە لە قازاجی کورد دەگۆڕێت، هیچ کەس لەگەڵ ئەو کۆمەڵکوژیی و داگیرکارییەی تورکیا نییە، کورد دەبێت هەوڵبدات پەیوەندیەکانی لەگەڵ ئەمریکا و ڕووسیا و فەرەنسا و دەوڵەتانی ئەوروپادا باش بکات، وە دەبێت پەنا بۆ چارەسەری دبلۆماتی ببەین.

 

- هەڵوێستی یەکێتی نیشتیمانی کوردستان چییە لەبارەی یەکێتی نەتەوەیی؟

 

"بڕیاری یەکێتی نەتەوەیی بەدەست یەکێتی نییە"

 

قادر عەزیز: یەکێتی لەساڵی 1979 وە هەوڵی بەستنی کۆنگرەی نەتەوەیی دەدات، هەتا ئەو کۆنگرەی نەتەوەییەی کە لەبرۆکسل دامەزرا، یەکێتی یەکێک بوو لە دامەزرێنەرانی، بەڵام خۆ بڕیاری یەکێتی نەتەوەیی بەدەست یەکێتی نییە بە تەنها، بەڵام پەیوەندی کورد لەسەر ئاستی نەتەوەیی بەرەوپێش چووە، بەڵام ئەوەندەش ئاسان نییە، بەڵام دەبێت هەوڵ بدەین، لەگەڵ ئەو شاندەی هەدەپە کە هاتبووە هەرێمی کوردستان باسی ئەوەمان کرد لانی کەم دەبێت پەیوەندی و هەماهەنگی لە نێوان پارچەکانی کوردستاندا هەبێت، ئێستا پەیوەندیەکان خراپ نین، بەڵام بەگوێرەی پێویست نییە، بەس ئەگەر کورد بیتوانیایە لەئێستا کۆنگرەیەکی نەتەوەیی ببەستێت و لەسەر ئاستی نەتەوەیی ستراتیژی دابڕێژێت ئەوا باشتر دەبێت، ئێستاش باشە پەیوەندی نێوان لایەنە کوردییەکان خراپ نییە، لانی کەم شەڕ نییە لە نێوانیاندا، ئەوەتا شاندی هەدەپە هاتووەتە هەرێم لەگەڵ هەموو لایەنەکاندا دانیشتووە، پێشوازی لێکراوە، پێشتر ئەمە نەبووە.

 

- دواین وتەی قادر عەزیز چییە؟

 

قادر عەزیز: ئێمە هەمیشە لە خەمی نەتەوەی خۆمانین، دڵمان ئیحساسمان و ویستمان هەموو لەگەڵ میللەتی خۆمانە لە پارچەکانی تری کوردستان.

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 RojNews. Hemû mafên portala ROJNEWS Ajansa Nûçeyan a Roj hatine parastin