Smiley face
Smiley face
Smiley face

ژن و هەستانەوەی دوای پرۆسەی ئەنفال

2018-04-14 17:28:04



 ڕۆژنیوز – ئاشتی ئەحمەد

 

بەشێک لە ژنە چالاکوانانی بواری جینۆسیاد و ئەنفال، باس لە ڕۆڵ و قوربانییەکانی ژنان دەکەن لە شاڵاوی ئەنفالدا، چالاکوانێکیش دەڵێت: ژن دوای ئەنفال قوربانیی زۆری داوە لە گەورەکردنی منداڵ و بەڕێوەبردنی ماڵدا.

 

ئێوارەی ئەمرۆ، زانكۆی چەرموو لە شارۆچکەی چەمچەماڵ-ی سەر بە پارێزگای سلێمانی، پانێڵێكی بەناونیشانی "ژن و هەستانەوەی دوای پرۆسەی ئەنفال"، بۆ چوار چالاكوانی ژن لە بواری پرسی ئەنفال ئەنجامدا.

 

 

لە سەرەتای پانێڵەكەدا، پەری محەمەد نوری، كە وەك چالاكوانێكی بواری ئەنفال و هاوكات سەرپەرشتی هەڵدانەوەی گۆڕە بەكۆمەڵەكانی كردووە لە وەزارەتی كاروباری شەهیدان و ئەنفالكراوانی حکومەتی هەرێم، وتی: لەسەدا ٩٠ی گۆڕە بەكۆمەڵەكان هی ناوچەی گەرمیانن، ئەگەر بەرپرسانی حكومەت بەچاوی خۆیان گۆڕەبەكۆمەڵكانیان ببینیایە، بایەخی ئەم ڕۆژەیان دەزانی.

 

 

ناوبراو، باسی لەوەشكرد، كە چۆن لە گۆڕە بەكۆمەڵەكاندا ژن و منداڵ پێكەوە زیندەبەچاڵکراون، وتیشی: دەبێت دوژمنان بزانن، کە کەسوکاری قوربانیانی ئەنفال ئەمڕۆ سەریان بەرزە و خزمەت دەكەن.

 

هەروەها، كۆچەر عەرەب، وەك كچە ئەنفال و چالاكوانی بواری ئەنفال، ئاماژەی بە ڕەنجی دایكان کرد، کە دوای ئەنفالكردنی هاوسەرەکانیان بەچی شێوەیەک منداڵەكانیان گەورەکردووە و لە ئۆردوگا زۆرەملێكان بە زۆر نیشەجێكراون بەبێ‌ ئەوەی هیچ پێداویستییەكانی ژیانیان هەبووبێت.

 

لە بەشێکی دیکەی پانێڵەکەدا، كەلسوم كریم، چالاكوانی بواری جینۆساید ئەوەی خستەڕوو، كە پرۆسەی ئەنفال كاریگەریی دەروونیی لەسەر قوربانییەكانی ئەنفال و كەسوكارەكانیان دروستكردووە، ئاماژەی بەوەشكرد: ژن لەدوای ئەنفال توانیوویەتی لەسەر پێی خۆی بەوەستێت، سەرەڕای ئەو كێشە كۆمەڵایەتیی و دەروونییانەی بەشێوەی جۆراوجۆر تووشی بووە.

 

لە کۆتایی پانێڵەکەدا، دیمەن محەمەد، وەك چالاوانێكی بواری ئەنفال، قسەیکرد و وتی: داوا لە حكومەتی هەرێم دەكەم، لە هەر شار و شارۆچكەیەك سەتنەری گەشەپێدان ڕاهێنان بۆ ژنان دابنرێت، چونكە ئەو سەنتەرە دەتوانێت گەورەترین سود بە ژنان بگەیەنێت، بەداخەوە تا ئێستا حكومەت نەیتوانیوە ئەوە بكات.

 

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin