Smiley face
Smiley face
Smiley face

پژاک داوای پشتگیریی بۆ ڕامین حسێن پەناهی دەکات

2018-04-17 11:48:04



ڕۆژنیوز - ناوەندی هەواڵەکان


هاوسەرۆکایەتی پارتی ژیانی ئازادی کوردستان- پژاک، بە بڵاوکردنەوەی ڕاگەیەندراوێک سزای لەسێدارەدانی ڕامین حسێن پەناهیی شەرمەزار کرد و بانگەوازیی چالاکوانانی ئێرانیی کردووە پشتگیریی ئەو زیندانییە سیاسییە بکەن.


ئەمڕۆ هاوسەرۆکایەتیی پژاک ڕاگەیەندراوێکی بڵاوکردەوە و تێیدا سیاسەتی سەرکوت و فشار و سێدارەی حکومەتی ئێرانی بە سیاسەتێک بۆ دەربازکردنی قەیرانەکانی ئەو حکومەتە ناوزەد کرد.


پژاک ئاماژەی بەوەدا، کە سێدارە و فشار و سەرکوت لەگەڵ بنەماکانی حکومەتی کۆماری ئیسلامی و ئەو قەیرانانەی وا تێیدایە لە پەیوەندی ڕاستەوخۆدان، حکومەتی ئێران بەو سیاسەتانە لە هەوڵداندایە بۆ لەناوبردنی فیزیکیی هەموو ئەوانەی وەک حکومەتی ئێران بیرناکەنەوە.


لە بەردەوامیدا پژاک تیشکی خستووەتە سەر ئەوەش، کە چیدی ئەو سیاسەتانە کاریگەرییان نەماوە، هۆشیاری و ناڕەزاییە گشتییەکانی گەلانی ئێران سەلماندوویەتی کە سیاسەتی تۆقاندنی خەڵک چیدی کاریگەرییان نەماوە، ئەوەی لەم دۆخەدا دەتوانێت کاریگەری هەبێت و دۆخەکە بگوازێتەوە بۆ دۆخێکی شیاو، نەک سیاسەتی لەناوبردن و نکۆڵیکردن، بەڵکو گۆڕانکاریی بنەڕەتیی دیموکراتییە.


لە کۆتاییشدا پژاک ڕایگەیاندوە: پارتی ژیانی ئازادی کوردستان وێڕای پشتگیریکردن لە خانەوادەی زەحمەتکێشی ڕامین حسێن پەناهی، سزای سێدارەی ناوبراو بە ڕێکارێکی سیستمانە بۆ دژایەتیکردنی گەلی کورد لە قەڵەم دەدات و بانگەوازیی هەموو ئازادیخوازان دەکات بە بێ وەستان پشتگیریی ڕامین حسێن پەناهی و زیندانییە سیاسییەکانی دیکە بکەن.


جێگای ئاماژەیە، کە ڕۆژی ٢٣ی حوزەیرانی ساڵی ڕابردوودا، دەستەیەکی چوار کەسی پێشمەرگەکانی کۆمەڵەی زەحمەتکێشانی کوردستان-ئێران، لەناو شاری سنە کەوتنە بۆسەی سوپای پاسدارانی ئێرانەوە، بەهۆیەوە سێ پێشمەرگە شەهیدبوون، ڕامین حسێن پەناهی-یش یەکێک لە پێشمەرگەکان بوو بە برینداری کەوتە دەست هێزەکانی سوپای پاسدارانی ئێران  و ئێستاش سزای لەسێدارەدانی بۆ بڕاوەتەوە.


ک.ک
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin