Smiley face
Smiley face
Smiley face

ڕژاک داوا لە هاوڵاتیان دەکات دەنگ بە کاندیدە ژنەکان بدەن

2018-04-18 11:56:36



ڕۆژنیوز - سلێمانی

 

ڕژاک، داوا لە هاوڵاتیان دەکات، کە دەنگی خۆیان بدەنە کاندیدە ژنەکان و ڕایدەگەیەنێت:" ژن زۆرتر ده‌توانێت رۆڵ بگێڕێت له‌ گۆڕانکارییه‌کاندا و به‌رژه‌وه‌ندی ده‌سه‌ڵاتخوازیی، گه‌نده‌ڵی و نادیموکراتی که‌متر لای ژنان هه‌یه‌".

 

 ١٢ی ئایاری ئەمساڵ هەڵبژاردنی ئەنجومەنی نوێنەرانی عێراق بەڕێوەدەچێت و لەکۆی شەش هەزار و٩٠٤ کەس کاندید، دوو هەزار و ٥٤ کاندید-یان ژنن و لە چوار  پارێزگاکەی هەرێمی کوردستان-یش لەکۆی ٥٠٣ کاندید، ١٤٦ کاندید-یان ژنن.

 

هەرچەندە، لە ئەنجومەنی نوێنەرانی عێراق سیستمی کۆتا بۆ ژنان هەیە و پێویستە ٢٥%ی ئەندامەکان ژن بن، بەڵام ڕێکخراوەکانی ژنان ئەو ڕێژەیە بە گونجاو نازانن بۆ نوینەرایەتییکردنی ژنان و داوا دەکەن، کە دەنگ بە کاندیدە ژنەکان بدرێت، بۆ ئەوەی نوێنەری زیاتر-یان لەو ئەنجومەنە هەبێت.

 

نەجیبە عومەر، ئەندامی ئەنجومەنی بەڕێوبەریی ڕێکخراوی ژنانی ئازادی کوردستان (ڕژاک)، بە ڕۆژنیوزی ڕاگەیاند:"ئێمه‌ وه‌کو رێکخراوه‌که‌مان پێمان خۆشه‌ که‌ زۆرترین ژن بچێته‌ په‌رله‌مانه‌وه‌، چونکە ژن زۆرتر ده‌توانێت رۆڵ بگێڕێت له‌ گۆڕانکارییه‌کاندا و به‌رژه‌وه‌ندی ده‌سه‌ڵاتخوازیی، گه‌نده‌ڵی و نادیموکراتی که‌متر لای ژنان هه‌یه‌".

 

نەجیبە عومەر، وتیشی:"ژنێکی هوشیار که‌ په‌روه‌رده‌ کرابێت و باوه‌ڕی به‌ ئیراده‌ی گه‌ل و هێزی خۆی و هێزی گه‌ل هه‌بێت، ده‌توانێت نوێنه‌رایه‌تی پیاوانیش بکات، دەبێت کاندیدی ژنیش زۆرترین پشتیوانیی لەلایەن ژنانەوە بێت و ژن دەنگ بدات بە ژن".

 

ناوبراو، ئاشکرایکرد، کە ئەندامانی ڕژاک دەنگ دەدەن بە ژنانی ناو لیستی نەوەی نوێ و سەبارەت بە هۆکاری هەڵبژاردنی ئەو لیستەش وتی:"هه‌موو کاندیدەکانی لیستی نه‌وه‌ێ نوێ که‌سانی پاکن و تا ئێستا لە ناو گەندەڵیدا جێیان نەگرتووە و کەسانێکن کە هەڵقوڵاوی گەلن و هاوکات لە گەڵ خەڵکدا هێزی ئۆپۆزسیۆن بوون، که‌سانێکن که‌ له هه‌موو چالاکییه‌ دیموکراتییه‌کاندا له‌سه‌ر شه‌قام بوون‌ و نوێنه‌رایه‌تی هه‌موو ژنان و گه‌نجانن".

 

سەبارەت بە هۆکاری ئەوەی، کە ژنان بە لیستی سەربەخۆ بەشداریی هەڵبژاردنەکان ناکەن؟، نەجیبە عومەر، وتی:"ئێمە لە ساڵی ۲۰۰٥وە بەردەوام لە گەڵ ڕێکخراوه‌کان و لایەنە سیاسییەکاندا قسەمانکردووە بۆ ئەوەی لیستی سەربەخۆی ژنان دروست ببێت، وە کارمان کردووە  کە ژنان و پیاوانیش دەنگ بدەن بە ژن و بەتایبەت پشتیوانی ئەو ژنانەمان کردووە کە بە ناسنامە، ئه‌قڵیه‌ت و ئیراده‌ی ژن بەشداریی لە هەڵبژاردنەکان ده‌کەن و بە عەقڵیەتێکی ژنانەوە بیر دەکەنەوە، بەڵام بەداخەوە لایەنەکانی تر پشتگیرییان نەکردووە".

 

ئەو ئەندامەی ئەنجومەنی بەڕێوبەرایەتیی ڕژاک، روونیکردەوە"چۆن گەل دابەش کراوە بە سەر حزبە سیاسییەکان ئەوا ژنیش دابەش کراون به سەر حزبەکاندا و لە پێناو بەرژەوەندی خۆیاندا ژنان بە کار دەهێنن، بۆیە پێویسته‌ ژنان نه‌بنه‌ دارده‌ستی پیاوانی ده‌سه‌ڵاتدار و گه‌نده‌ڵ له‌ ده‌سه‌ڵاتدا و ببنە نوێنەری ڕاستەقینەی گەل و ژنان".

 

 

ش.ف

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin