Smiley face
Smiley face
Smiley face

یەکێک لە دیارترین ژنانی شاعیر ئەدەبیاتی کوردیی بەجێهێشت

2018-04-24 10:51:42



ڕۆژنیوز - سەمیرا شەهابی

 

کەژاڵ ئیبراهیم، ژنە شاعیری دیاری کورد بەهۆی نەخۆشییەکی کتوپڕەوە کۆچی دواییکرد.

 

شەوی ڕابردوو ژنە شاعیری کورد، کەژاڵ ئیبراهیم خدر، بە هۆی جەڵتەی دەماخەوە لە نەخۆشخانەیەکی شار لە سلێمانی لە تەمەنی ٥٠ ساڵیدا کۆچی دوایی کرد.

 

ئەو ژنە شاعیرە لە ساڵی ١٩٦٨لە شارۆچی قەڵادزێ-ی سەر بە ئیدارەی راپەڕین لە دایکبووە و خوێندنی سەرەتایی، ناوەندی و دواناوەندی هەر لەو شارە تەواوکردووە، دەرچووی شەشی ئامادەییە و لە سەرەتای ساڵی نەوەدەکان لە گەڵ هاوسەرەکەی بە هۆی کاری ڕۆژنامەگەرییەوە ڕوو لە شاری  سلێمانی دەکات، هەروەها  لە ئامادەیی پیشەسازی سلێمانی فەرمانبەر بووە  و لە ژیانی هاوبەشدا دایکی سێ منداڵە بە ناوەکانی نامری، داری و داریاس.

 

کەژاڵ لە ساڵی ١٩٨٧ دەستی بە نووسینی شیعر و نووسینکردووە، کە سەرەتا بە نووسینەوەی شعری منداڵان هەنگاوی ناوە و دواتر وەک شاعیرێکی دیار لە ناو کۆمەڵگای کوردیدا دەرکەوتووە، کە زۆربەی بەرهەمەکانی لە ماڵپەڕ و ڕۆژنامەکاندا بڵاو کرانەونەتەوە.

 

ناوبراو خاوەنی ١٤ نامیلکەی شعرییە و لە بەر گرنگی زۆرێک لە ناوەڕۆکی بەرهەمەکانی، بۆ سەر زمانەکانی عەرەبی و فارسی وەرگێڕانی بۆ کراوە، کە ١٥ هۆنراوەی بۆ فارسی و زیاتر لە ١٢٠ هۆنراوەی کراوە بە زمانی عەرەبی و لێکۆڵینەوەیان لە سەر نووسراوەتەوە، بە تایبەت لە گۆڤار و ڕۆژنامەکانی میسر، لوبنان، عێراق، ڕۆژهەڵاتی ناوەڕاست بەگشتی و لە ئێرانیش بایەخی تایبەتی پێدراوە، هەروەها دوو لە هۆنراوەکانی کراون بە دەقیی شانۆ.

 

ئەم ژنە شاعیرە، لە ساڵانی ژیانیدا خزمەتی بە شیعر و ئەدەبیاتی کوردی کردووە، هاوکات ئەندامی دەستەی نووسەرانی کورد بووە، لە باشوری کوردستاندا ژنێکی دیار و خۆشەویست بووە، بەتایبەت کە توانییویەتی سەرجەم کلتور و ڕەگەزەکانی پیاوسالاریی ببڕێت و پەرە بە ئەدەبەکەی بدات.

 

 

کەژاڵ ئیبراهیم-ی شاعیر درەنگانی شەوی ڕابردوو، لە نەخۆشخانەی شار لە شاری سلێمانی، لە تەمەنی ٥٠ ساڵیدا کۆچی دواییکرد.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin