Smiley face
Smiley face
Smiley face

کاندیدانی ژن لە نێوان بوون و نەبوونی متمانە لەناو ژناندا

2018-04-29 10:29:53



ڕۆژنیوز ـ سەمیرا شەهابی

 

بۆ هەڵبژاردنی ئەمجارەی ئەنجومەنی نوێنەرانی عێراق هەزاران ژن کاندیدن، بەڵام بەهۆی ئەدای کارکردنیانەوە لە رابڕوودا ڕووبەڕووی ڕەخنەی ژنان بوونەتەوە، هەمانکات ژنانێکی زۆریش ئومێدیان بە کاندیدە ژنەکان هەیە و داواکارن ڕێژەی ژنان لە پەرلەماندا بەرزبێتەوە.

 

بۆ هەڵبژاردنی ئەنجومەنی نوێنەرانی عێراق کە بڕیارە ١٢ی مانگی داهاتوو بەڕێوەبچێت، ١٤٦ ژن وەک کاندید لە سەر ناوی لیستە کوردییەکان بەشداریی کێبڕکێکان دەکەن، ئەگەرچی ژنان ڕەخنەشیان هەیە، بەڵام هەر ئومێدیان بە ژنان زیاتر هەیە و، وەک خۆیان باسی دەکەن، هەر ژنان دەتوانن ببنە دەنگی ژنان.

 

هەژان سیروان وەک خۆی وتی هیوای بە هەڵبژاردن نییە و ڕەخنەی لە کاندیدەکان هەیە، وتیشی: من دەنگ نادەم و وای نابینم کە گۆڕانکاری ئەوتۆ دروستبێت، چونکە ئەمە زیاتر لە ٢٦ساڵە هەر بەو شێوەیە دەڕوات و ئەوان ئیمەیان بێ هیوا کردووە، لە لایەکی دیکەشەوە ئەگەر من دەنگ نەدەم ئەوا پێویستە ئەو کەسانەی کە ئەچنە پەرلەمانەوە ئاگاداریی ئەو دەنگانەبن کە هیوایان بەو کاندیدانە هەیە، بە تایبەت کاندیدانی ژن کە پێگەی ژن بەرز بکەنەوە.

 

هەروەها ژنێک بەناوی ناسکە عەلی، وتی: ئێمە بە گەرموگووڕییەوە پێشوازی لەم هەڵبژاردنە دەکەین، پێویستە هەموومان بەشداربین تا لە پەرلەمان عێراقدا پێگەمان بەرزببێتەوە، ئەو ڕەخنەشم لە ژنانی کاندید هەیە، چونکە کە چوونە پەرلەمان و پلەوپۆستیان وەرگرت ئیتر ژنانیان بیر نامێنێت، بۆ نموونە من وەک ژنێک چەندین قوربانیم داوە، بەڵام قەت ژنێکی کاندیدم نەدی بەسەرمان بکاتەوە.

 

بەپێی لێدوانی ئەم ژنانە و ژنانی دیکەی کورد بەگشتی، ژنانی پێشویی لە پەرلەمانی عێراقدا نەیانتوانییوە ببنە وەڵام دەرەوەی خواستەکانی ژنان، هەربۆیە لە ئێستادا سەدان هەزار ژنی کورد بێ متمانەییان پێوە دیارە.

 

لەهەمان کاتدا ژنانێکی زۆریش هەن، کە ئومێدیان بە ژنان هەیە و دەخوازن لە پەرلەمانی داهاتووی عێراقدا ڕێژەی ژنان بگەیەننە بەرزترین ئاست، بۆ ئەوەی بتوانن لانیکەم چارەسەریی کێشەی ژنانی عێراق و کوردستان  بکەن، وە بەتایبەت بتوانن چارەنووسی ئەو هەزاران ژنەی لەکاتی داگیرکردنی شەنگالدا لەلایەن چەتەکانی داعشەوە ڕفێندران یەکلابکەنەوە.

 

بۆ وەڵامدانەوەی خواستەکانی ژنان و چارەسەرکردنی کێشە کۆمەڵایەتییەکان، کە بەردەوام دەبنە هۆی کوشتن و خۆسوتاندنی ژنان و هەمیشە قوربانیی یەکەمی سیستمی پیاو سالاریی و دەسەڵاتگەرایین، دەکرێت چاوەڕوانیی ئەنجامەکانی ئەم هەڵبژاردنە ببین، وەک ژنانی چالاکوانیش لە تۆڕەکۆمەڵایەتییەکاندا باسی لێوەدەکەن، بۆ باشترکردنی دۆخی ژنان گرنگە خودی ژنان خۆیان دەنگە بەکاندیدانی ژن بدەن.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin