Smiley face
Smiley face
Smiley face

ته‌شى ڕستن بەرەو لەناوچوون دەچێت.. به‌ڤیدیۆ

2018-05-03 10:00:34



ڕۆژنیوز – جیهاد هه‌ورامى

 

تەشی ڕستن، پیشەیەکی کۆنی کوردەوارییە و بەرەو لەناوچوون دەچێت، کە ڕستنی خوریی یان موو-ی ئاژەڵە و لەڕێگای ئامێری سادەی (تەشی)یەوە ژنان ئەنجامی دەدەن و دواتر بۆ دروستکردنی کەلوپەلی جۆراوجۆر بەکاردێت.

 

لە کوردستان لەدێرزەمانەوە، کاتێک لە وەرزی گەرمادا ئاژەڵی مەڕ، مێ و بزن برینە کراون و خوری و مووەکانیان لێکراوەتەوە، خوری و مووەکان بۆ دروستکردنی چەندین کەلوپەلی وەک (جاجم، بەرماڵ، لفکە، ڕاخەر، بەڕە، ڕانک و چۆغە و چەندین کەلوپەلی دیکە)، بەکارهاتووە.

 

 

سەرەتا و دوای برینەکردنی ئاژەڵەکان، خوری و مووەکە بەباشی پاک دەکرێتەوە و ده‌کرێته‌ پارچه‌ی گه‌وره‌ و ته‌نک و به‌ ئامێرێکى تایبه‌ت که‌ پێى ده‌ڵێن (شانه‌) یانیش بە دەست شى ده‌کرێته‌وه‌.


 

دواتر، ته‌شى ڕێس، کە ژنان-ن، به‌ ته‌شى یان له‌ته‌رێ، که‌ ئامێرێکى ساده‌یه‌ له‌ دارێکى کلک باریکى سه‌رخڕه‌ و قولاپێکى پێوه‌یه‌ بۆ گیرکردنی خوریی یان مووەکە، دەیڕێسن.

 

 

تەشی ڕێس، کە مووەکە دەکات بە قولاپەکەوە، بە دەستیشی کلکی تەشییەکە لەسەر ڕانی بادەدات، یانیش هەر بە دەستی بای دەدات  وخورییەکە هێوش هێوش، دەبێت بە پەتێکی باریکی نەپچڕاو و لەگەڵ ڕستنی زیاتردا ئەو پەتە درێژ دەبێت و دەکرێت بە گڵۆڵە، دواتر ڕەوانەی لای ئەو کەسانە، یاخود ئەو شوێنانە دەکرێ، کە کە کەلوپەلە جۆراوجۆرەکانی لێدروست دەکەن، هەندێک جاریش هەر تەشی ڕێس بۆ خۆی کەلوپەلەکە دروست دەکات.

 

تەشی ڕستن، زۆر بەکەمیی لە باشوری کوردستان-دا ماوە و خەریکە بەتەواویی لەناودەچێت، بەڵام لە باکور و ڕۆژهەڵات و ڕۆژئاوای کوردستان هێشتا گرنگیی بەم پیشەیە دەدرێت.

 

ته‌شى ڕێسێکى ناوچه‌ى هه‌ورامانی باشوری کوردستان، به‌ناوى ئامینه‌ حه‌مه‌ڕه‌شید، ده‌ڵێت: ئه‌م پیشه‌یه‌ هه‌ر له‌ دێرزه‌مانه‌وه‌ له‌لایه‌ن باوک و باپیرمانه‌وه‌ بۆمان ماوه‌ته‌وه‌ و ئێمه‌ش به‌رده‌وامیمان پێ داوه‌، به‌ڵام به‌داخه‌وه‌ به‌هۆى پێشکه‌وتنى ته‌کنه‌لۆجیا ئێستا چه‌ندین کارگه‌ ئه‌م ئیشه‌ ده‌که‌ن و گه‌نجانیش ئاوڕ له‌ ڕه‌سه‌نایه‌تى ئه‌م پیشه‌یه‌ ناده‌نه‌وه‌، بۆیه‌ به‌که‌میش ماوه‌ته‌وه‌.

 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin